អតីតតារាសម្តែងដ៏ល្បីល្បាញអ្នកនាង អម្ពរ ទេវី បានសម្តែងនូវមោទនភាពយ៉ាងខ្លាំង ក្នុងពេលដែលអ្នកនាងមានប្អូនប្រុសម្នាក់ ដែលអាចបន្តវេនសិល្បៈផ្នែកភាពយន្តដូចជានាងដែរ ខណៈពេលដែលបច្ចុប្បន្ន ប្អូនប្រុសរបស់នាងកំពុងចេញសម្តែងជាបន្តបន្ទាប់ ។ ប្អូនប្រុសដែលជាប្អូនជីដូនមួយរបស់អ្នកនាង…
អតីតតារាសម្តែងដ៏ល្បីល្បាញអ្នកនាង អម្ពរ ទេវី បានសម្តែងនូវមោទនភាពយ៉ាងខ្លាំង ក្នុងពេលដែលអ្នកនាងមានប្អូនប្រុសម្នាក់ ដែលអាចបន្តវេនសិល្បៈផ្នែកភាពយន្តដូចជានាងដែរ ខណៈពេលដែលបច្ចុប្បន្ន ប្អូនប្រុសរបស់នាងកំពុងចេញសម្តែងជាបន្តបន្ទាប់ ។
ប្អូនប្រុសដែលជាប្អូនជីដូនមួយរបស់អ្នកនាង អម្ពរ ទេវី នោះមានឈ្មោះថា ទេព កែវគីរី ក៏ជាតារាសម្តែងមួយរូបផងដែរ ក្នុងពេលដែលកន្លងមក លោកមិនដែលបង្ហើបឬបញ្ចេញពីអត្តសញ្ញាណរបស់លោកថា ជាប់ខ្សែជាមួយតារាជើងចាស់រូបនេះឡើយ ។
យ៉ាងណា ក្រោយមានការទម្លាយឲ្យដឹងពីបណ្តាញសារព័ត៌មានក្នុងស្រុកមកនោះ អ្នកនាង អម្ពរ ទេវី មិនបានបដិសេធចំពោះរឿងនេះឡើយ ផ្ទុយទៅវិញ អ្នកនាងបានសម្តែងនូវមោទនភាពដែលមានប្អូនប្រុសអាចបន្តវេនសិល្បៈភាពដូចជារូបនាង ។
តារាសម្តែងដ៏ល្បីល្បាញនាទសវត្សន៍ឆ្នាំ៩០ អ្នកនាង អម្ពរ ទេវី បញ្ជាក់តាមរយៈសំណេរបង្ហោះលើបណ្តាញសង្គមថា បងពិតជាមានមោទនភាពណាស់ ដែលមានប្អូនបន្តវេនសិល្បៈផ្នែកភាពយន្តបន្តពីរបង ជូនពរប្អូនទទួលជោគជយ័គ្រប់ការងារដែលប្អូនស្រលាញ់ ។ បើយោងតាមបទសម្ភាសន៍របស់បណ្តាញសារព័ត៌មានក្នុងស្រុកមួយលោកគីរី បានអះអាងថា រូបលោក និងអ្នកនាង អម្ពរ ទេវី គឺជាបងប្អូនជីដូនមួយបង្កើត ដោយឪពុករបស់ជាបងប្អូនបង្កើតជាមួយនឹងឪពុកអ្នកនាង អម្ពរ ទេវី ។
លោកបន្តថា ចំពោះរឿងនេះ កន្លងមក មានអ្នកសិល្បៈដូចគ្នាតិចណាស់ ដែលបានដឹងរឿងនេះ ព្រោះលោកមិនដែលបង្ហើបរឿងនេះជាសាធារណៈឡើយ ប៉ុន្តែមិនមែនលោកចង់លាក់ ឬមិនចង់បង្ហាញពីជាប់ខ្សែស្រឡាយជាមួយអ្នកនាង អម្ពរទេវី ដែលជាតារាដ៏ល្បីនោះឡើយ ។
លោកថា អ្នកនាង អម្ពរ ទេវី គាត់មានទេពកោសល្យរបស់គាត់ ហើយយើងក៏មានទេពកោសល្បរបស់ខ្លួនឯងដែរ ហើយខាងក្រុមគ្រួសាររបស់លោកក៏អ្នកចេះសិល្បៈ តួយ៉ាងឪពុករបស់លោក ទោះមិនមែនជាអ្នកសិល្បៈ ប៉ុន្តែគាត់អាចចេះលេងឧបកណ៍ភ្លេងបុរាណស្ទើរទាំងអស់ ។
លោកបញ្ជាក់ថា ដោយឡែក មូលហេតុដែលត្រកូលលោក និងអ្នកនាងអម្ពរ ទេវី ខុសគ្នានោះ ដោយឪពុករបស់លោកបានយកត្រកូលតាមតា រីឯឪពុកអ្នកនាង អម្ពរ ទេវី គឺយកត្រកូលតាមតាទួតវិញ ប៉ុន្តែពួកគាត់ទាំងពីរនាក់គឺជាបងប្អូនបង្កើតនឹងគ្នា ។
លោកបន្ថែមថា ការចូលប្រឡូកសិល្បៈរបស់លោកនោះ គឺកន្លងមក អ្នកនាង អម្ពរ ទេវី ក៏មិនបានដឹងឡើយ ព្រោះអំឡុងពេលនោះលោកត្រឹមតែឆ្លៀតចូលថតបានតិចតួចពេលដែលលោកទំនេរប៉ុណ្ណោះ ទើបតែអំឡុងឆ្នាំ២០០៩ ទើបលោកចូលប្រឡូកបានដិតដល់ ខណៈពេលដែលខ្សែភាពយន្តដំបូងនោះ គឺលោកថតអោយស្ថានីយទូរទស្សន៍បាយ័ន ក្នុងនាមជាតួឪពុកតួឯក ។
យ៉ាងណា បើតាមលោក គីរី ការចូលប្រឡូកក្នុងវិស័យសិល្បៈនាពេលនេះ គឺលោកមិនចង់ឲ្យគេគិតថា លោកតោងបង អម្ពរ ទេវី នោះឡើយ ពោលគឺលោកចង់ឲ្យគេមើលឃើញពីសមត្ថភាពលោកផ្ទាល់ ជាជាងតោងឈ្មោះបងស្រីដើម្បីល្បី ។
គួរបញ្ជាក់ថា លោក គីរី គឺជាតារាសម្តែងមួយរូបដែលតែងតែលេចវត្តមានសម្តែងតាមរយៈខ្សែភាពយន្តបែបអប់រំ និងភាពយន្តខ្នាតធំ ហើយលោកក៏ជាតារាមួយរូបដែលចូលចិត្តហាត់ក្បាច់គុណម្នាក់ផងដែរ ៕
ចែករំលែកព័តមាននេះ