ចិនកំណត់គោលដៅកំណើនសេដ្ឋកិច្ចប្រចាំឆ្នាំ ២០២៦ ទាបបំផុតចាប់តាំងពីឆ្នាំ១៩៩១
ទីក្រុងប៉េកាំង ៖ ប្រទេសចិនបានកំណត់គោលដៅកំណើនសេដ្ឋកិច្ចប្រចាំឆ្នាំ ២០២៦ មកនៅត្រឹមចន្លោះពី ៤,៥% ទៅ ៥% ដែលជាគោលដៅកំណើនទាបបំផុត ចាប់តាំងពីឆ្នាំ១៩៩១…
ទីក្រុងប៉េកាំង ៖ ប្រទេសចិនបានកំណត់គោលដៅកំណើនសេដ្ឋកិច្ចប្រចាំឆ្នាំ ២០២៦ មកនៅត្រឹមចន្លោះពី ៤,៥% ទៅ ៥% ដែលជាគោលដៅកំណើនទាបបំផុត ចាប់តាំងពីឆ្នាំ១៩៩១ ខណៈពេលដែលប្រទេសសេដ្ឋកិច្ចធំទី ២ ពិភពលោកមួយនេះ កំពុងតែតស៊ូជាមួយបញ្ហាប្រឈមទាំងក្នុង និងក្រៅស្រុក។ នេះបើយោងតាមប្រភពពី BBC, CNN និង Bloomberg ចេញផ្សាយនៅថ្ងៃទី៥ ខែមីនា ឆ្នាំ២០២៦។
នេះជាលើកដំបូង ដែលគោលដៅសេដ្ឋកិច្ចចិនត្រូវបានបន្ទាប បន្ទាប់ពីការកំណត់គោលដៅកំណើនប្រហែល ៥% រយៈពេល ៣ ឆ្នាំជាប់គ្នា ចាប់ពីឆ្នាំ ២០២៣ ដល់ ២០២៥ដែលប្រទេសនេះសម្រេចបាន បើទោះមានការងើបឡើងវិញយឺតពីការគ្រប់គ្រងយ៉ាងតឹងរ៉ឹងនៃជំងឺកូវីដ-១៩ និងការវាយប្រហារពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីឆ្នាំមុន យ៉ាងណាក៏ដោយ។
ការប្រកាសនេះ ត្រូវបានធ្វើឡើងអំឡុងពេលកិច្ចប្រជុំនយោបាយដ៏ធំបំផុតរបស់ប្រទេសចិន ដែលត្រូវបានស្គាល់ថា កិច្ចប្រជុំវគ្គទី ២ រួមជាមួយនឹងព័ត៌មានលម្អិតមួយចំនួននៃផែនការ ៥ ឆ្នាំ លើកទី ១៥ សម្រាប់ប្រទេសចិន ដែលត្រូវបានចេញផ្សាយ។ ហើយនេះកើតឡើងនៅពេលដែលទីក្រុងប៉េកាំងមានបំណងផ្លាស់ប្តូរសេដ្ឋកិច្ចរបស់ខ្លួន នៅចំពោះមុខបញ្ហានានា រួមទាំងកម្សោយការប្រើប្រាស់ក្នុងស្រុក វិបត្តិអចលនទ្រព្យដែលកំពុងបន្ត និងភាពតានតឹងពាណិជ្ជកម្មជាមួយលោកខាងលិច។
ព្រឹត្តិការណ៍ដ៏សំខាន់នេះ ចាប់ផ្តើមនៅថ្ងៃទី៤ ខែមីនា ឆ្នាំ២០២៦ ហើយជាធម្មតាដំណើរការយ៉ាងហោចណាស់១សប្តាហ៍ ដោយបណ្តាមេដឹកនាំចិនត្រូវមកជួបជុំគ្នាសម្រាប់កិច្ចប្រជុំជាប់ៗគ្នា។ ជាមួយគ្នានោះ នាយករដ្ឋមន្ត្រីចិន លោក លី ឈាង (Li Qiang) បានប្រាប់បណ្តាអ្នកតំណាងថា ផែនការ ៥ ឆ្នាំ នឹងរួមបញ្ចូលការវិនិយោគលើការច្នៃប្រឌិត ឧស្សាហកម្មបច្ចេកវិទ្យាខ្ពស់ ការស្រាវជ្រាវវិទ្យាសាស្ត្រ និងកិច្ចខិតខំប្រឹងប្រែងបន្ថែមទៀត ដើម្បីជំរុញការប្រើប្រាស់គ្រួសារចិន។
នៅក្នុងខែមករា ឆ្នាំ២០២៦ តួលេខផ្លូវការបានបង្ហាញថា ប្រទេសចិនសម្រេចបានគោលដៅកំណើនសេដ្ឋកិច្ច ៥% របស់ខ្លួន សម្រាប់ឆ្នាំ ២០២៥ ទាំងមូល។ ប៉ុន្តែទីក្រុងប៉េកាំងក៏បានអះអាងដែរថា ការពង្រីកសេដ្ឋកិច្ចបានថយចុះមកត្រឹម ៤,៥% ក្នុងរយៈពេល៣ខែចុងក្រោយនៃឆ្នាំ ២០២៦ ដែលរងផលប៉ះពាល់ដោយការចំណាយក្នុងស្រុកថយចុះ និងវិបត្តិអចលនទ្រព្យយូរអង្វែង។
ប្រទេសចិនបានពឹងផ្អែកជាពិសេសលើការលក់ទៅក្រៅប្រទេស ដើម្បីបំពេញចន្លោះប្រហោង។ ដ្បិតពន្ធគយរបស់លោក ត្រាំ បានដាក់សម្ពាធបន្ថែមទៀតលើសេដ្ឋកិច្ចដែលពឹងផ្អែកលើការនាំចេញរបស់ចិន។ លោក នីង ឡេង (Ning Leng) អ្នកស្រាវជ្រាវគោលនយោបាយនៃសាកលវិទ្យាល័យ Georgetown សហរដ្ឋអាមេរិក បានលើកឡើងថា ប្រទេសចិនបានឆ្លើយតបដោយការចំណាយយ៉ាងច្រើនប្តូរទិសដៅពាណិជ្ជកម្មជាមួយប្រទេសដទៃទៀត ដើម្បីធានាថា ផលិតផលរបស់ខ្លួនអាចត្រូវបានលក់ និងរក្សាដំណើរការវិស័យផលិតកម្មរបស់ខ្លួន៕
ចែករំលែកព័តមាននេះ