ខេត្តស្វាយរៀង ៖ មហាជនរិះគន់ម្ចាស់ទីតាំងសណ្ឋាគារ៣៣៣ មិនខ្លាចញញើតអនុក្រឹត្យលេខ ០៣ អនក្រ.បក របស់រាជរដ្ឋាភិបាលកម្ពុជាចេញដោយ សម្ដេចបវរធិបតី ហ៊ុន ម៉ាណែត…
ខេត្តស្វាយរៀង ៖ មហាជនរិះគន់ម្ចាស់ទីតាំងសណ្ឋាគារ៣៣៣ មិនខ្លាចញញើតអនុក្រឹត្យលេខ ០៣ អនក្រ.បក របស់រាជរដ្ឋាភិបាលកម្ពុជាចេញដោយ សម្ដេចបវរធិបតី ហ៊ុន ម៉ាណែត បញ្ជាឲ្យអាជ្ញាធរគ្រប់លំដាប់ថ្នាក់សហការចុះបង្ក្រាបលុបបំបាត់ឧក្រិដ្ឋកម្មឆបោកតាមប្រពន្ធ័បច្ចេកវិទ្យា(Scams)នៅកម្ពុជា ក៏ប៉ុន្តែនៅថ្ងៃទី២៦ខែកុម្ភៈឆ្នាំ២០២៦នេះបែកធ្លាយករណីក្រុមឧក្រិដ្ឋជនឆបោកតាមប្រព័ន្ធអនឡាញ បានសម្ងំលាក់ខ្លួននៅទីតាំងសណ្ឋាគារ ៣៣៣ ស្ថិតនៅ ភូមិព្រៃវល្លិ៍ ឃុំថ្មី ស្រុកកំពង់រោទិ៍ ខេត្តស្វាយរៀង ជាប់ច្រកទ្វាព្រំដែនអន្តរជាតិព្រៃវល្លិ៍ ទំនងបែកធ្លាយ ថាសមត្ថកិច្ចចុះបង្ក្រាប ផ្អើលបាននាំគ្នាសម្រុករត់ចេញពីសណ្ឋាគារផ្អើលមហាជន និងអ្នកសារព័ត៌មានបានចុះទៅផ្ដិតយករូបភាព និងធ្វើការសាកសួរ និងខលទូរស័ព្ទ ទាក់ទងទៅអាជ្ញាធរឃុំថ្មីដើម្បីសុំការបំភ្លឺ ។
អាជ្ញាធរឃុំថ្មីបានបញ្ជាក់ថា ទីតាំងខាងលើត្រូវបានជួលឲ្យក្រុមជនជាតិចិនស្នាក់នៅ ដែលជនជាតិចិនទាំងនោះបានរត់ចេញពីទីតាំងកាស៊ីណូ ឆបោកតាមប្រព័ន្ធអនឡាញ(Scams)ស្ថិតក្នុងឃុំថ្មីនិងឃុំញរកន្លងទៅ។ទាក់ទិនករណីម្ចាស់សណ្ឋាគារ៣៣៣ ជួលឲ្យជនជាតិចិនស្នាក់នៅនេះដែរ លោកអធិការ នគបាលស្រុកកំពង់រោទ៌បានប្រាប់អ្នកសារព័ត៌មានយើងថា ទីតាំងសណ្ឋាគារ(៣៣៣)ដែលជួលឲ្យជនជាតិចិនស្នាក់នៅនេះគេមានឯកសារជួលត្រឹមត្រូវ ។
មហាជនបានលើកឡើងថា តើក្រុមឧក្រិដ្ឋជនដែលបានរត់ចេញពីកន្លែងមួយ ទៅជួលកន្លែងមួយទៀត ចាត់ទុកថាស្របច្បាប់ដែរ ឬយ៉ាងណា?
មហាជនមានការសោកស្ដាយជាទីបំផុត កាលពីថ្ងៃទី២៧ ខែកុម្ភៈឆ្នាំ២០២៦ កម្លាំងរបស់ក្រសួងមហាផ្ទៃ សហការជាមួយអាជ្ញាធរមានសមត្ថកិច្ចគ្រប់ជាន់ថ្នាក់របស់ខេត្តស្វាយរៀង ចុះឆែកឆេរ និងបិទទីតាំងឆបោកតាមប្រព័ន្ធអនឡាញ នៅមូលដ្ឋានស្រុកកំពង់រោទិ៍ ត្រង់ចំណុចកាស៊ីណូ(ScamsOnline)មួយកន្លែង ដែលមានទីតាំងស្ថិតនៅភូមិត្រពាំងត្រាវ ឃុំញរដែលជាទីតាំងក្រុមឧក្រិដ្ឋជននាំគ្នារត់ចេញ កាលពីថ្ងៃទី១៥មករា២០២៦កន្លងទៅដើម្បីបិទទីតាំង។
ហើយបានព័ត៌មានថា មានក្រុមឧក្រិដ្ឋជន រត់ចេញ មកសម្ងំលាក់ខ្លួន នៅសណ្ឋាគារ ៣៣៣នេះ ស្របពេលដែលក្រុមអ្នកសារព័ត៌មានយើង កំពុងចុះយកព័ត៌មាន នៅច្រកទ្វាព្រំដែនអន្តរជាតិព្រៃវល្ល័រជិតទីតាំងសណ្ឋាគារ ៣៣៣ នាថ្ងៃទី២៦ កុម្ភ៖ នោះ ក៏បានប្រទះឃើញជនជាតិចិនរាប់រយនាក់បាននាំគ្នារត់សម្រុកចេញពីទីតាំង សណ្ឋាគារ៣៣៣នេះ ដោយមានរថយន្តជាច្រើនគ្រឿងសម្រុកចូលមកដឹកជញ្ជូនជនជាតិចិនទាំងនោះចេញដោយសុវត្ថិភាពសមត្ថកិច្ចដាក់ការសង្ស័យថា ជាក្រុមឧក្រិដ្ឋជនឆបោកតាមប្រពន្ធ័បច្ចេកវិទ្យា(Scams Online)ដែលសមត្ថកិច្ចបង្ក្រាបកន្លងមកហើយបានគេចខ្លួនមកជួលសណ្ឋាគារ៣៣៣ ដើម្បីសម្ងំលាក់ខ្លួន ហើយពេលសមត្ថកិច្ចចុះទៅបង្ក្រាបគឺអ្វីៗយឺត១ជំហ៊ានទៅហើយ ។ មហាជនដាក់ការសង្ស័យថា ទំនងបែកធ្លាយ ព័ត៌មានថា សមត្ថកិច្ចក្រសួងមហាផ្ទៃចុះបង្ក្រាប ទើបនាំគ្នារត់គេចខ្លួនមុន។
គួរបញ្ជាក់ផងដែរថា កាលពីថ្ងៃទី១៥ ខែមករា ឆ្នាំ២០២៦ កន្លងមកនេះមានករណី ក្រុមឧក្រិដ្ឋជនឆបោកតាមប្រពន្ធ័បច្ចេកវិទ្យា ជាង២ពាន់នាក់បាននាំគ្នាសំរុករត់ចេញពីកាស៊ីណូឆបោកតាមប្រពន្ធ័អនឡាញ ដើរតាមដងផ្លូវប្រសេចប្រសាចមួយចំនួនបានឡើងជិះរថយន្តក្រុងនិងរថយន្តទំនើបគេចខ្លួននិងមួយចំនួនបានទៅជួលសណ្ឋាគារ៣៣៣ដើម្បីសម្ងំលាក់ខ្លួន។
ប្រភពបញ្ជាក់ថា នៅរសៀលថ្ងៃទី២៧ខែកុម្ភៈឆ្នាំ២០២៦សមត្ថកិច្ចចម្រុះនៃក្រសួងមហាផ្ទៃបានចុះទៅបិទទីតាំងកាស៊ីណូScams Online ស្ថិតនៅភូមិត្រពាំងត្រាវ ឃុំញរ រួចបន្ត ទៅចុះបង្ក្រាបនៅទីតាំងសណ្ឋាគារ ៣៣៣ ក៏ប៉ុន្តែក្រុមឧក្រិដ្ឋជនដឹងខ្លួនមុននាំគ្នារត់គេចខ្លួនដោយសុវត្ថិភាព ។ អាជ្ញាធរបានត្រឹម ហៅម្ចាស់សណ្ឋាគារ៣៣៣ មកអប់រំនិងធ្វើកិច្ចសន្យាបិទសណ្ឋាគារប៉ុណ្ណោះ ។
ទាក់ទិនករណីដែរ ម្ចាស់សណ្ឋាគារ ៣៣៣ បានឆ្លើយប្រាប់អ្នកសារព័ត៌មានយើងនៅព្រឹកថ្ងៃទី០២ខែមិនា២០២៦នេះថា ករណីខាងលើនេះលោកបានធ្វើកិច្ចសន្យាជួលត្រឹមត្រូវ និងពេលបិទ លោកក៏បានធ្វើកិច្ចសន្យាបិទត្រឹមត្រូវចំពោះមុខសមត្ថកិច្ចដែរ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ