ខេត្តកំពង់ធំ ៖ ក្នុងស្មារតីទទួលខុសត្រូវខ្ពស់ លើកិច្ចការពារសម្បត្តិធម្មជាតិរបស់ជាតិ ទោះបីជាត្រូវប្រឈមនឹងភារកិច្ចមមាញឹកលើច្រើនសមរភូមិក៏ដោយ កងកម្លាំងនៃតំបន់ប្រតិបត្តិការសឹករងកំពង់ធំ នៅតែបន្តបេសកកម្មបង្ក្រាបបទល្មើសនេសាទយ៉ាងសកម្មបំផុត ។ បើយោងតាមផេកកងទ័ពជើងគោកនៃកងយោធពលខេមរភូមិន្ទ បានប្រកាសនាថ្ងៃទី១៨…
ខេត្តកំពង់ធំ ៖ ក្នុងស្មារតីទទួលខុសត្រូវខ្ពស់ លើកិច្ចការពារសម្បត្តិធម្មជាតិរបស់ជាតិ ទោះបីជាត្រូវប្រឈមនឹងភារកិច្ចមមាញឹកលើច្រើនសមរភូមិក៏ដោយ កងកម្លាំងនៃតំបន់ប្រតិបត្តិការសឹករងកំពង់ធំ នៅតែបន្តបេសកកម្មបង្ក្រាបបទល្មើសនេសាទយ៉ាងសកម្មបំផុត ។
បើយោងតាមផេកកងទ័ពជើងគោកនៃកងយោធពលខេមរភូមិន្ទ បានប្រកាសនាថ្ងៃទី១៨ ខែកុម្ភៈ ឆ្នាំ២០២៦នេះថា ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍ នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិនៅក្នុងភូមិសាស្ត្រខេត្តកំពង់ធំ បានបញ្ជាក់ថា ៖ ទោះបីមមាញឹកក្នុងភារកិច្ចការពារបូររណភាពទឹកដី និងការបង្ក្រាបបទល្មើសការលួចកាប់ទន្ទ្រានព្រៃឈើ យកដីរបស់រដ្ឋធ្វើជាកម្មសិទ្ធិក្នុងរដូវប្រាំងនេះ យ៉ាងណាក្តី តែការបង្ក្រាបបទល្មើសនេសាទខុសច្បាប់ នៅតែធ្វើសកម្មភាពដូចភ្លៀងរលឹម មិនមានការដកថយឡើយ ។
ជាក់ស្ដែងនៅព្រឹកថ្ងៃទី១៨ ខែកុម្ភៈ ឆ្នាំ២០២៦នេះ កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ យោធភូមិភាគទី ៤ ដឹកនាំដោយលោកអនុសេនីយ៍ឯក ប៊ុត ទ្រី នាយទាហានប្រចាំការនៅទីបញ្ជាការស្រាល នៅឃុំពាមបាង ស្រុកស្ទោង ខេត្តកំពង់ធំ បានបន្តដឹកនាំកងកម្លាំងទៅបង្ក្រាបឧបករណ៍នេសាទខុសច្បាប់ ដាក់កាត់ទទឹងព្រែក នៅតំបន់ព្រែកឆេះកែវ ក្នុងឃុំពាមបាង ស្រុកស្ទោង ដោយបានបំផ្លាញចោលឧបករណ៍នេសាទខុសច្បាប់នៅនឹងកន្លែង មានសាច់អួនក្រឡាញ់ញឹកចំនួន ៤របាំង ដែលមានប្រវែង៣៧៥ ម៉ែត្រ ឡុកសាច់អួនចំនួន៤ឡុក លបលូ ចំនួន៤មាត់ ចាក់លែងត្រីចម្រុះប្រមាណជាង ១៩គីឡូក្រាម និងបំផ្លាញចោលនូវឧបករណ៍នេសាទខុសច្បាប់មួយចំនួនទៀត ។
ឧត្តមសេនីយ៍ទោ សោម ស៊ុន បានបញ្ជាក់ថា ៖ កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ នៅតែប្តេជ្ញាចិត្តដាច់ខាត អនុវត្តតាមបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងបទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ព្រមទាំងការដឹកនាំណែនាំដោយផ្ទាល់ពីឯកឧត្តម នួន ផារ័ត្ន អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យមានប្រសិទ្ធភាព ។
ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិនៅខេត្តកំពង់ធំ បានសំណូមពរដល់អាជ្ញាធរដែនដីគ្រប់លំដាប់ថ្នាក់ រួមជាមួយប្រជាពលរដ្ឋ ពិសេសប្រជានេសាទ ត្រូវចូលរួមគោរពនិងអនុវត្តតាមច្បាប់ស្ដីពីជលផលថ្មី ដែលបានកែសម្រួលរួចហើយ ក្នុងការបង្កលក្ខណៈងាយស្រួលដល់ប្រជានេសាទ ដើម្បីមានលទ្ធភាពប្រកបមុខរបរនេសាទ សម្រាប់ចិញ្ចឹមជីវិត និងដោះស្រាយជីវភាពគ្រួសារបានសមស្រប ៕
ចែករំលែកព័តមាននេះ