រាជធានីភ្នំពេញ ៖ បច្ចុប្បន្ន ថ្នាល VERIFY ត្រូវបានទទួលស្គាល់ជាថ្នាលសាធារណៈឌីជីថលសកល និងទទួលបានការចាប់អារម្មណ៍យកទៅប្រើប្រាស់ពីសំណាក់ប្រទេសក្នុងតំបន់ រួមមាន ៖ ហ្វីលីពីន…
រាជធានីភ្នំពេញ ៖ បច្ចុប្បន្ន ថ្នាល VERIFY ត្រូវបានទទួលស្គាល់ជាថ្នាលសាធារណៈឌីជីថលសកល និងទទួលបានការចាប់អារម្មណ៍យកទៅប្រើប្រាស់ពីសំណាក់ប្រទេសក្នុងតំបន់ រួមមាន ៖ ហ្វីលីពីន ឡាវ ទីម័រឡេស្ដេ បង់ក្លាដេស និងហ្សកហ្ស៊ី ជាដើម ។ នេះជាការបញ្ជាក់របស់ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ កាលពីថ្ងៃទី ១៧ ខែកុម្ភៈ ឆ្នាំ ២០២៦ ក្នុងឱកាសជួបពិភាក្សាការងារជាមួយ លោកជំទាវ វ្លាដាំងកា អាន់ឌ្រេវ៉ា (Vladanka Andreeva) អ្នកសម្របសម្រួលអង្គការសហប្រជាជាតិប្រចាំកម្ពុជា ដែលទើបទទួលការតែងតាំង ។
ឯកឧត្តមរដ្ឋមន្ត្រី ក៏បានជម្រាបជូន លោកជំទាវ អំពីវឌ្ឍនភាពនៃការអភិវឌ្ឍថ្នាល និងកម្មវិធីរាជរដ្ឋាភិបាលឌីជីថល ជាអាទិ៍ ថ្នាលផ្ទៀងផ្ទាត់ឯកសាររបស់រាជរដ្ឋាភិបាល VERIFY.GOV.KH ថ្នាល DG SuperApp និងថ្នាលផ្សេងៗទៀត ។
ក្រសួងប្រៃសណីយ៍ និងទូរគមនាគមន៍ បានឱ្យដឹងថា លោកជំទាវ វ្លាដាំងកា អាន់ឌ្រេវ៉ា បានកោតសរសើរចំពោះសមិទ្ធផលរបស់រាជរដ្ឋាភិបាលក្នុងការអភិវឌ្ឍថ្នាល VERIFY ព្រមទាំងបានគាំទ្រ ក្រសួងប្រៃសណីយ៍ និងទូរគមនាគមន៍ ក្នុងការធ្វើពិពិធកម្មថ្នាលខាងលើចូលទៅក្នុងតំបន់ និងប្រទេសជាមិត្ត ។
ប្រភពដដែលឱ្យដឹងទៀតថា ភាគីទាំងពីរក៏បានពិភាក្សាគ្នាពាក់ព័ន្ធនឹងវិស័យបច្ចេកវិទ្យាឌីជីថល ការអភិវឌ្ឍធនធានមនុស្ស អក្ខរកម្មឌីជីថល កិច្ចការពារកុមារតាមប្រព័ន្ធអនឡាញ សន្តិសុខសាយប័រ និងការផលិតមាតិកាអនឡាញ ព្រមទាំងប្តេជ្ញាបន្តកិច្ចសហប្រតិបត្តិការឱ្យកាន់តែជិតស្និទបន្ថែមទៀតរវាង ក្រសួង និងអង្គការសហប្រជាជាតិប្រចាំកម្ពុជា ៕
ចែករំលែកព័តមាននេះ