ទីក្រុងប៉េកាំង ៖ «តុក្កតាសេះយំ» កំពុងលក់ដាច់ខ្លាំងបំផុតនៅក្នុងប្រទេសចិន មុនពិធីបុណ្យចូលឆ្នាំថ្មីប្រពៃណីចិន ឆ្នាំសេះ ចូលមកដល់។ ការលក់ដាច់ភ្លូកទឹកភ្លូកដីនេះ កើតចេញពីកំហុសបច្ចេកទេសនៃការផលិត។ នេះបើតាមប្រភពពីសារព័ត៌មាន…
ទីក្រុងប៉េកាំង ៖ «តុក្កតាសេះយំ» កំពុងលក់ដាច់ខ្លាំងបំផុតនៅក្នុងប្រទេសចិន មុនពិធីបុណ្យចូលឆ្នាំថ្មីប្រពៃណីចិន ឆ្នាំសេះ ចូលមកដល់។ ការលក់ដាច់ភ្លូកទឹកភ្លូកដីនេះ កើតចេញពីកំហុសបច្ចេកទេសនៃការផលិត។ នេះបើតាមប្រភពពីសារព័ត៌មាន BBC និង CBC ចេញផ្សាយកាលពីពេលថ្មីៗនេះ។
បើតាមលោកស្រី Zhang Huoqing ម្ចាស់ហាងលក់តុក្កតាឈ្មោះ Happy Sister ស្ថិតនៅទីក្រុងយីវូ (Yiwu) ខេត្តហ្សឺជាំង (Zhejiang) ភាគខាងកើតប្រទេសចិន បានប្រាប់ទីភ្នាក់ងារសារព័ត៌មាន Reuters ថា តុក្កតាសេះតំណាងឆ្នាំនេះ ត្រូវបានផលិតឡើងដោយកំហុសបច្ចេកទេស បន្ទាប់ពីកម្មករម្នាក់បានដេរមាត់ញញឹមរបស់សេះបញ្ច្រាស់។ ដំបូងៗ ម្ចាស់ហាងបានរំពឹងថានឹងត្រូវសងប្រាក់ទៅអតិថិជនដែលបានទិញតុក្កតានោះវិញ ប៉ុន្តែក្រោយរូបភាពដ៏ហួសចិត្តរបស់តុក្កតា ចាប់ផ្តើមផ្ទុះឡើងលើអ៊ីនធឺណិត តុក្កតាសេះយំនេះ បែរជាចាប់ផ្តើមលក់ដាច់អស់ពីស្តុកទៅវិញ។
ម្ចាស់ហាងដដែលរូបនេះ បាននិយាយថា ទឹកមុខស្រពាប់ស្រពោនតុក្កតាសេះនេះ កំពុងទាក់ទាញចិត្តកម្មករវ័យក្មេងនៅក្នុងប្រទេសចិន។ អតិថិជនជាច្រើនចូលចិត្តវា ហើយពួកគេនិយាយថាវាសមហេតុផលនឹងស្មារតីកម្មករសាជីវកម្មសព្វថ្ងៃនេះ។ អតិថិជនម្នាក់បានលើកឡើងថា តុក្កតាសេះយំនេះ ពិតជាសមនឹងការពិតរបស់មនុស្សសម័យថ្មី។
ឯម្នាក់ទៀតបាននិយាយលេងសើចថា តុក្កតាសេះយំនេះ គឺជាទឹកមុខរបស់អ្នកកំពុងធ្វើការងារខណៈដែលតុក្កតាសេះញញឹម គឺជាទឹកមុខរបស់អ្នកក្រោយបញ្ចប់ការងារ។ អតិថិជនម្នាក់ទៀតក៏បានប្រដូចខ្លួនទៅនឹងតុក្កតាសេះយំថា «សេះតូចនេះមើលទៅសោកសៅ និងគួរឱ្យអាណិតណាស់ ដូចជាអារម្មណ៍ខ្ញុំនៅកន្លែងធ្វើការអញ្ចឹង។ ជាមួយតុក្កតាសេះយំឆ្នាំនេះ ខ្ញុំសង្ឃឹមថានឹងទុកការសោកសៅទាំងអស់របស់ខ្ញុំនៅកន្លែងធ្វើការ ហើយរក្សាតែសុភមង្គលជាប់ខ្លួនប៉ុណ្ណោះ»។
បច្ចុប្បន្នរោងចក្ររបស់លោក Zhang បានបង្កើនផលិតកម្មដើម្បីបំពេញតម្រូវការនៅក្នុងស្រុក និងប្រទេសដទៃទៀតផងដែរ។ បើតាមកាសែតហុងកុង South China Morning Post (SCMP) បានឱ្យដឹងថា តុក្កតាសេះយំមានកម្ពស់ប្រហែល ២០ សង់ទីម៉ែត្រ និង១តម្លៃ ២៥ យន់ ប្រហែល ៣,៦០ ដុល្លារអាមេរិក។ វាមានពណ៌ក្រហមតំណាងសំណាងល្អ ជាមួយខ្សែ និងកណ្តឹងកពណ៌មាស ហើយមានពាក្យស្លោកមួយឃ្លាថា «លុយចូលមកលឿន» ប៉ាក់លើខ្លួនវាជាអក្សរទឹកមាសផងដែរ៕
ចែករំលែកព័តមាននេះ