រាជធានីភ្នំពេញ ៖ យុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងពលរដ្ឋទូទៅជាង ៥ ម៉ឺននាក់បានទទួលការងារធ្វើក្រោយបញ្ចប់ការសិក្សាក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ…
រាជធានីភ្នំពេញ ៖ យុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងពលរដ្ឋទូទៅជាង ៥ ម៉ឺននាក់បានទទួលការងារធ្វើក្រោយបញ្ចប់ការសិក្សាក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ចំនួន ១,៥លាននាក់ របស់រាជរដ្ឋាភិបាល។ នេះបើតាមលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ។
អ្នកនាំពាក្យរូបនេះបានឱ្យដឹងនៅថ្ងៃទី២០ ខែមករា ឆ្នាំ២០២៦នេះថា គិតត្រឹមដំណាច់ឆ្នាំ២០២៥ ជួយយុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងពលរដ្ឋទូទៅសរុបចំនួន ៥១,៥៩១នាក់ ទទួលបានការងារធ្វើ ក្នុងនោះអ្នកមានបណ្ណសមធម៌ចំនួន ២៦,៨៦៦នាក់ ។
លោកបន្តថា លទ្ធផលនេះបានបង្ហាញពីប្រសិទ្ធភាពនៃកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស របស់រាជរដ្ឋាភិបាល ដើម្បីលើកកម្ពស់ជំនាញបច្ចេកទេស និងសមត្ថភាពការងារឆ្លើយតបទៅនឹងតម្រូវការពីទីផ្សារការងារបច្ចុប្បន្ន។
បើតាមលោក ស៊ុន មេសា កម្មវិធីនេះមិនត្រឹមតែផ្តោតលើការបណ្តុះបណ្តាលជំនាញបច្ចេកទេសប៉ុណ្ណោះទេ ប៉ុន្ដែថែមទាំងភ្ជាប់ជាមួយឱកាសការងារជាក់ស្តែង តាមរយៈការសហការជាមួយវិស័យឯកជន និងស្ថាប័នពាក់ព័ន្ធនៅតាមបណ្ដារាជធានី-ខេត្តផងដែរ។ តាមរយៈកម្មវិធីនេះ ពិតជាបានរួមចំណែកយ៉ាងសំខាន់ក្នុងការជួយឲ្យប្រជាពលរដ្ឋមានជំនាញពិតប្រាកដ រកប្រាក់ចំណូលសមរម្យសម្រាប់គ្រួសារ និងរួមចំណែកអភិវឌ្ឍសេដ្ឋកិច្ច និងសង្គមជាតិ ៕ អត្ថបទសហការ
ចែករំលែកព័តមាននេះ