ខេត្តស្ទឹងត្រែង ៖ នៅថ្ងៃអាទិត្យ ទី៤ខែមករា ឆ្នាំ២០២៦ វេលាម៉ោង៥:០០រសៀលខាងមុខ រដ្ឋបាលខេត្តស្ទឹងត្រែងសូមប្រកាសដំណឹងដ៏រីករាយ ដោយនិងរៀបចំព្រឹត្តិការណ៍ «រាត្រីវប្បធម៌»ដ៏មហោឡារិកក្រោមមូលបទ«ស្ទឹងត្រែង បេះដូងនៃវប្បធម៌»នៅលើទីលានតេជោធិបតីនាមុខវេទិកានាគជ័យ…
ខេត្តស្ទឹងត្រែង ៖ នៅថ្ងៃអាទិត្យ ទី៤ខែមករា ឆ្នាំ២០២៦ វេលាម៉ោង៥:០០រសៀលខាងមុខ រដ្ឋបាលខេត្តស្ទឹងត្រែងសូមប្រកាសដំណឹងដ៏រីករាយ ដោយនិងរៀបចំព្រឹត្តិការណ៍ «រាត្រីវប្បធម៌»ដ៏មហោឡារិកក្រោមមូលបទ«ស្ទឹងត្រែង បេះដូងនៃវប្បធម៌»នៅលើទីលានតេជោធិបតីនាមុខវេទិកានាគជ័យ ។
ព្រឹត្តិការណ៍ដ៏វិសេសវិសាលនេះ គឺជាការផ្តួចផ្តើមឡើងដោយលោកសរ សុពុត្រា អភិបាលនៃគណៈអភិបាលខេត្តស្ទឹងត្រែងក្នុងស្មារតីនឹករលឹកដឹងគុណ និងការលើកស្ទួយតម្លៃវប្បធម៌ជាតិ ។
អភិបាលខេត្តស្ទឹងត្រែង លោក សរ សុពុត្រា បានលើកឡើងថា ព្រឹត្តិការណ៍«រាត្រីវប្បធម៌»នេះ គឺក្នុងគោលបំណងរក្សាបាននូវគុណតម្លៃ និងគុណបំណាច់របស់ថ្នាក់ដឹកនាំ យុទ្ធជន យុទ្ធនារី យើងដែលបានលះបង់សាច់ស្រស់ ឈាមស្រស់ក្នុងបុព្វហេតុរំដោះជាតិមាតុភូមិពីរបបដ៏សាហាវយង់ឃ្នងនៃបនក្បត់ជាតិ ប៉ុល ពត ដោយខេត្តស្ទឹងត្រែង ត្រូវបានរំដោះនាថ្ងៃទី៤ ខែមករា ឆ្នាំ១៩៧៩ និងក្នុងក្របខណ្ឌទូទាំងប្រទេសនាថ្ងៃទី៧ ខែមករា ឆ្នាំ១៩៧៩ ។
ដូច្នេះ រដ្ឋបាលខេត្តស្ទឹងត្រែងនឹងរៀបចំព្រឹត្តិការណ៍ «រាត្រីវប្បធម៌»ក្រោមមូលបទ«ស្ទឹងត្រែងបេះដូងនៃវប្បធម៌»ដើម្បីអបអរសាទរខួបលើកទី៤៧ ទិវាជ័យជម្នះ ៧មករា រួមនឹងថ្ងៃរំដោះខេត្តស្ទឹងត្រែង ព្រមទាំងការគោរពដឹងគុណចំពោះវិរភាពរបស់យុទ្ធជនជួរមុខ ។
កម្មវិធីសិល្បៈដ៏អស្ចារ្យនេះ រដ្ឋបាលខេត្តសូមអញ្ជើញវត្តមានរបស់ពុកម៉ែ បងប្អូន ប្រជាពលរដ្ឋ ក៏ដូចជាមិត្តយុវវ័យទាំងអស់នឹងផ្តល់ឱកាសទស្សនាដោយផ្ទាល់នូវទស្សនីយភាពសិល្បៈវប្បធម៌ជាតិយើងមាន៖ ទម្រង់របាំបុរាណខ្មែរ.ល្ខោនខោល ដែលជាសម្បត្តិបេតិកភណ្ឌអរូបីនៃមនុស្សជាតិ.ការប្រគំឧបករណ៍ភ្លេងបុរាណខ្មែរបង្ហាញពីមរតកតន្ត្រីដ៏ចំណាស់.ការច្រៀងចម្រៀងកងទ័ព ដើម្បីរំលឹក និងគោរពដឹងគុណចំពោះវីរភាពយុទ្ធជនជួរមុខ។
លោកអភិបាលខេត្តបានបញ្ជាក់ថា ការរៀបចំព្រឹត្តិការណ៍នេះ គឺដើម្បីធានាថា គុណតម្លៃ និងគុណបំណាច់ដ៏ឧត្តុង្គឧត្តមរបស់វីរជនយើងនឹងមិនរលាយសាបសូន្យឡើយ ។ សូមអញ្ជើញចូលរួមទស្សនាដោយសេរី វត្តមានរបស់លោកអ្នក គឺជាកម្លាំងចិត្តដ៏ធំធេង និងជាការរួមចំណែកដ៏មានតម្លៃក្នុងការថែរក្សាកេរដំណែលវប្បធម៌ និងការចងចាំប្រវត្តិសាស្ត្រជាតិរបស់យើង ៕
ចែករំលែកព័តមាននេះ