ខេត្តកំពង់ស្ពឺ ៖ ជនដៃដល់ចំនួន០២នាក់ត្រូវបានកម្លាំងមូលដ្ឋានកងរាជអាវុធហត្ថស្រុកភ្នំស្រួចធ្វើការឃាត់ខ្លួន ខណៈដែលទាស់ពាក្យសម្តីតិចតួចក្លាយទៅជាហិង្សា ដោយចេតនា(វាយទៅ វាយមក)ភាគីម្ខាងរងរបួសធ្ងន់ ហើយម្តាយជនរងគ្រោះបានប្តឹងឱ្យសមត្ថកិច្ចកងរាជអាវុធហត្ថអន្តរាគមន៍ស្រាវជ្រាវឃាត់ខ្លួន។
មន្ត្រីកងរាជអាវុធហត្ថស្រុកភ្នំស្រួចបាននិយាយឱ្យដឹងថា កាលពីវេលាម៉ោង ០៤និង៤៦នាទីរសៀលថ្ងៃទី២៨ ខែធ្នូ ឆ្នាំ២០២៥ មានប្រជាពលរដ្ឋ ឈ្មោះ សេង ប៉ិច ភេទស្រី អាយុ៥៣ឆ្នាំ បានទូរស័ព្ទ(call )ទំនាក់ទំនងតាមរយៈលេខទូរស័ព្ទអន្តរាគមន៍សង្គ្រោះបន្ទាន់ HoteLine1292 បានរាយការណ៍ថា មានករណីហិង្សាដោយចេតនា(វាយទៅវាយមក)ស្ថិតនៅភូមិស្លែង ឃុំមហាសាំង ស្រុក ភ្នំស្រួច ខេត្តកំពង់ស្ពឺ។ ក្រោយពីទទួលបានពាក្យបណ្ដឹងរួចមក កម្លាំងមូលដ្ឋានកងរាជអាវុធស្រុក ភ្នំស្រួច ដែលដឹកនាំលោកមេបញ្ជាការស្រុក បានចុះដល់កន្លែងកើតហេតុ បានធ្វើការសួរនាំ ឈ្មោះ សេង ប៊ុច ត្រូវជាម្ដាយជនរងគ្រោះ ឈ្មោះ សុខ សីហា ភេទប្រុស អាយុ២៥ឆ្នាំ មុខរបរកសិករ មានទីលំនៅបច្ចុប្បន្នភូមិត្រពាំងក្រឡាញ ឃុំមហាសាំង ស្រុកភ្នំស្រួច ខេត្តកំពង់ស្ពឺ។
តាមការឆ្លើយបំភ្លឺ របស់ម្ដាយជនរងគ្រោះខាងលើ នៅវេលាម៉ោងប្រហែល០៤និង៥០នាទីរសៀលថ្ងៃដដែល មានឈ្មោះខាត់ វណ្ណណេត ភេទប្រុស អាយុ២២ឆ្នាំ និងឈ្មោះ រឿន មេសា ភេទប្រុស អាយុ១៨ឆ្នាំ អ្នកទាំង ០២ មានទីលំនៅភូមិស្លែង ឃុំមហាសាំង ស្រុក ភ្នំស្រួច ខេត្តកំពង់ស្ពឺ បានបង្កជម្លោះពាក្យសំដីជាមួយនឹងឈ្មោះសុខ សីហា និង ឈ្មោះ ខាត់វណ្ណណេត បង្កើតទៅជាហិង្សាដោយចេតនា(វាយទៅវាយមក)បណ្ដាលឱ្យរងរបួសទាំងសង្ខាង ចំណែក(ឈ្មោះសុខ សីហា )បានរងរបួសធ្ងន់ធ្ងរ។
ក្រោយកើតហេតុរួចយុវជន០២នាក់បានរត់គេចខ្លួនបាត់អស់ រីឯ ឈ្មោះ សុខ សីហា ត្រូវបានក្រុមគ្រួសារ ដឹកបញ្ជូនយកទៅព្យាបាលនៅមន្ទីរពេទ្យ ឯកជនមួយកន្លែង។
មន្ត្រីអាវុធហត្ថស្រុកភ្នំស្រួចបានបន្តឱ្យដឹងថា លុះរហូតដល់វេលាម៉ោង ១០និង៣០នាទីព្រឹកថ្ងៃទី២៩ ខែធ្នូ ឆ្នាំ២០២៥ កម្លាំងមូលដ្ឋានកងរាជអាវុធហត្ថស្រុកភ្នំស្រួច បានសហការជាមួយកម្លាំងអង្គភាពនគរបាលកងរាជអាវុធហត្ថខេត្តកំពង់ស្ពឺ ធ្វើការស្រាវជ្រាវនិងឃាត់ខ្លួនជនសង្ស័យចំនួន០២នាក់÷ ទី១~ឈ្មោះ រឿន មេសា អាយុ១៨ឆ្នាំ និងទី២~ឈ្មោះ ខាត់ វណ្ណណេត អាយុ២២ឆ្នាំ នៅចំណុចតារាងបាល់ទះស្ថិតនៅភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ ។
ក្រោយឃាត់ខ្លួនក្រុមជនដៃដល់ដកហូតវត្ថុតាងរួម
១-កាំបិតប៉័ងតោចំនួន០១ដើម
២-ឈើ(ដងកឺសម្រាប់បុកប៊ីយ៉ា)ចំនួន០១ដើម
៣- ដងអំបោសឫស្សីចំនួន ១ដើម។
បច្ចុប្បន្នក្រុមជនសង្ស័យដៃដល់រួមជាមួយនិងវត្ថុតាង ត្រូវបានបញ្ជូនទៅបញ្ជាការដ្ឋានកងរាងអាវុធហត្តខេត្តកំពង់ស្ពឺ ដើម្បីកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ