បរទេស៖ តម្លៃមាសអន្តរជាតិបានបន្តកើនឡើងដល់កម្រិតខ្ពស់បំផុតមិនធ្លាប់មាន នៅថ្ងៃទី២៦ ខែធ្នូ ឆ្នាំ២០២៥ ដោយសារតែតម្រូវការកើនឡើងនៃលោហៈធាតុដ៏មានតម្លៃមួយនេះ និងការរំពឹងទុកកាន់តែខ្លាំងឡើងអំពីការកាត់បន្ថយអត្រាការប្រាក់បន្ថែមទៀតដោយធនាគារកណ្តាលសហរដ្ឋអាមេរិក (Fed) នៅឆ្នាំក្រោយ។ នេះបើតាមប្រភពពីទីភ្នាក់ងារសារព័ត៌មាន…
បរទេស៖ តម្លៃមាសអន្តរជាតិបានបន្តកើនឡើងដល់កម្រិតខ្ពស់បំផុតមិនធ្លាប់មាន នៅថ្ងៃទី២៦ ខែធ្នូ ឆ្នាំ២០២៥ ដោយសារតែតម្រូវការកើនឡើងនៃលោហៈធាតុដ៏មានតម្លៃមួយនេះ និងការរំពឹងទុកកាន់តែខ្លាំងឡើងអំពីការកាត់បន្ថយអត្រាការប្រាក់បន្ថែមទៀតដោយធនាគារកណ្តាលសហរដ្ឋអាមេរិក (Fed) នៅឆ្នាំក្រោយ។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
គិតត្រឹមម៉ោង ០២:៣៥ នាទីរសៀល ថ្ងៃទី២៦ ខែធ្នូ ឆ្នាំ២០២៥ តម្លៃមាសអន្តរជាតិបានរក្សាតម្លៃនៅ ៤ ៥១១ ដុល្លារក្នុង១អោន ឬ ៥ ៤៣៤ ដុល្លារក្នុង១តម្លឹង បន្ទាប់ពីបានហក់ឡើងដល់កម្រិតខ្ពស់បំផុតមិនធ្លាប់មានពីមុន ៤ ៥៣០ ដុល្លារ/អោន ឬ ៥ ៤៥៧ ដុល្លារ/តម្លឹង នៅព្រឹកដដែល។ អ្នកវិភាគអន្តរជាតិមួយចំនួនលើកឡើង តម្លៃមាសកំពុងកំណត់គោលដៅដល់ ៥ ០០០ ដុល្លារ/អោន ឬ ៦ ០២៤ ដុល្លារ/តម្លឹង នៅរយៈពេល ៦ ទៅ ១២ ខែខាងមុខ។
មាសបានឡើងថ្លៃខ្លាំងនៅឆ្នាំនេះ ដោយកត់ត្រាការកើនឡើងប្រចាំឆ្នាំខ្ពស់បំផុតចាប់តាំងពីឆ្នាំ ១៩៧៩ ជំរុញដោយការបន្ធូរបន្ថយគោលនយោបាយរបស់ Fed ភាពមិនប្រាកដប្រជាខាងភូមិសាស្ត្រនយោបាយ តម្រូវការមាសដ៏រឹងមាំជាសកល ការសម្រុកទិញស្កុកទុកជាទុនបម្រុងរបស់បណ្តាធនាគារកណ្តាលលើពិភពលោក គួបផ្សំនឹងកម្សោយប្រាក់ដុល្លារអាមេរិក។
មាសត្រូវបានចាត់ទុកជាទ្រព្យសកម្មដ៏មានសុវត្ថិភាពបំផុត។ តម្លៃវាកើនឡើងនៅពេលភាពតានតឹងភូមិសាស្ត្រនយោបាយ និងពាណិជ្ជកម្មកាន់តែខ្លាំងឡើង ខណៈកម្សោយប្រាក់ដុល្លារអាមេរិកបានធ្វើឱ្យមាសមានតម្លៃថោកជាង សម្រាប់អ្នកទិញនៅបរទេស៕ ប្រភព ៖ Reuters
ចែករំលែកព័តមាននេះ