វៀតណាម ៖ ជ្រូកងា.ប់ដោយគ្រុនផ្តាសាយជ្រូកអាហ្វ្រិករាប់រយក្បាល ត្រូវបានជីកចេញពីកន្លែងកប់ចោល យកលក់លើទីផ្សារ
ប្រទេសវៀតណាម ៖ ប៉ូលិសប្រចាំខេត្ត ខាញ់ ហ័រ (Khanh Hoa) ភាគកណ្តាលប្រទេសវៀតណាម កាលពីថ្ងៃទី២៥ ខែធ្នូ…
ប្រទេសវៀតណាម ៖ ប៉ូលិសប្រចាំខេត្ត ខាញ់ ហ័រ (Khanh Hoa) ភាគកណ្តាលប្រទេសវៀតណាម កាលពីថ្ងៃទី២៥ ខែធ្នូ ឆ្នាំ២០២៥ បានចោទប្រកាន់បុរសម្នាក់ និងមនុស្ស ៦ នាក់ផ្សេងទៀត ពីបទជីកយកជ្រូកងាប់ដោយសារឆ្លងជំងឺគ្រុនផ្តាសាយជ្រូកអាហ្វ្រិក ឬប៉េស្តជ្រូកអាហ្វ្រិករាប់រយក្បាល ដែលត្រូវបានកប់ចោល ដើម្បីយកមកកែច្នៃ និងបង្កក មុនពេលលក់នៅលើទីផ្សារ។ នេះបើតាមប្រភពពីសារព័ត៌មានវៀតណាម VnExpress និង Tuoi Tre បានចេញផ្សាយ។
អាជ្ញាធរបានអះអាងថា ជនជាប់ចោទ ឈ្មោះ Dang Hoang Dinh បានជួលកម្មករមួយក្រុម (៦នាក់) ដើម្បីទៅជីកយកជ្រូកដែលពីមុនត្រូវបានសម្លាប់ និងកប់ចោល ដើម្បីទប់ស្កាត់ជំងឺគ្រុនផ្តាសាយជ្រូកអាហ្វ្រិក។ ជ្រូកទាំងនោះត្រូវបានដឹកជញ្ជូនទៅកាន់កន្លែងដែលក្រុមពួកគេយកទៅសម្អាត និងបង្កកសាច់សម្រាប់លក់បន្តលើទីផ្សារ។ មន្ត្រីស៊ើបអង្កេតបានព្រមានថា ប្រតិបត្តិការនេះ បានបង្កការគំរាមកំហែងដោយផ្ទាល់ដល់សុខភាពសាធារណៈ និងអាចរីករាលដាលមេរោគដ៏គ្រោះថ្នាក់ ប្រសិនបើបរិភោគ។
ការចុះត្រួតពិនិត្យដ៏ភ្ញាក់ផ្អើលពាក់ព័ន្ធនឹងបញ្ហានេះ បានកើតឡើងតាំងថ្ងៃទី៣០ ខែវិច្ឆិកា ឆ្នាំ២០២៥ ដោយនាយកដ្ឋានស៊ើបអង្កេតប្រឆាំងអំពើពុករលួយ ឧក្រិដ្ឋកម្មសេដ្ឋកិច្ច និងការរត់ពន្ធនៃនគរបាលខេត្ត ខាញ់ ហ័រ បានរកឃើញជ្រូកងាប់ និងឈឺធ្ងន់សរុប ៣០៤ក្បាល នៅទីតាំងកើតហេតុ។ ក្នុងចំណោមនេះ ជ្រូក ១៤៦ ក្បាលត្រូវបានសម្លាប់ និង ៣៣ ក្បាលនៅរស់តែស្ថិតក្នុងស្ថានភាពខ្សោយខ្លាំង។
តម្លៃសរុបនៃវត្ថុតាងដែលរឹបអូសត្រូវបានប៉ាន់ប្រមាណថាមានតម្លៃប្រហែល ៨៥០ លានដុង ឬជាង៣២ ០០០ ដុល្លារ។ ក្រុមដែលបានរៀបរាប់ខាងលើក៏បានកែច្នៃសាច់ជ្រូកជាង ៥ តោន ដែលមានតម្លៃជាង ៥០០ លានដុង ឬ ១៩ ០០០ ដុល្លារ។ លទ្ធផលការធ្វើតេស្តក្រោយមកបង្ហាញថា សំណាកចំនួន ២៩៥ ក្បាលក្នុងចំណោម ៣០៤ ក្បាលមានលទ្ធផលវិជ្ជមានមេរោគគ្រុនផ្តាសាយជ្រូកអាហ្វ្រិក។
អាជ្ញាធរខេត្ត ខាញ់ ហ័រ បានវាយតម្លៃថា សកម្មភាពខាងលើមិនត្រឹមតែរំលោភយ៉ាងធ្ងន់ធ្ងរលើបទប្បញ្ញត្តិសុវត្ថិភាពចំណីអាហារប៉ុណ្ណោះទេ ថែមទាំងគំរាមកំហែងដោយផ្ទាល់ដល់អាយុជីវិត និងសុខភាពអ្នកប្រើប្រាស់ រួមទាំងប៉ះពាល់យ៉ាងខ្លាំងដល់ឧស្សាហកម្មចិញ្ចឹមសត្វ និងបំពុលបរិស្ថាន។
បច្ចុប្បន្ន នាយកដ្ឋាននគរបាលស៊ើបអង្កេតខេត្ត ខាញ់ ហ័រ កំពុងបន្តពង្រីកការស៊ើបអង្កេត និងដោះស្រាយករណីនេះតាមបទប្បញ្ញត្តិ៕
ចែករំលែកព័តមាននេះ