រាជធានីភ្នំពេញ ៖ ក្រសួងការពារជាតិកម្ពុជាបានគូសបញ្ជាក់ឲ្យដឹង នៅព្រឹកថ្ងៃទី២៤ ធ្នូ នេះថា យោធាថៃបានបន្តបាញ់ផ្លោងចំនួន២គ្រាប់ចូលក្នុងភូមិសាស្ត្រក្រុងប៉ោយប៉ែត។ ក្រសួងបានលើកនូវស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តធ្វើសកម្មភាពបាញ់ប្រហារចូលទីតាំងប្រជាជនស៊ីវិលកម្ពុជា និងហេដ្ឋារចនាសម្ព័ន្ធស៊ីវិល…
រាជធានីភ្នំពេញ ៖ ក្រសួងការពារជាតិកម្ពុជាបានគូសបញ្ជាក់ឲ្យដឹង នៅព្រឹកថ្ងៃទី២៤ ធ្នូ នេះថា យោធាថៃបានបន្តបាញ់ផ្លោងចំនួន២គ្រាប់ចូលក្នុងភូមិសាស្ត្រក្រុងប៉ោយប៉ែត។
ក្រសួងបានលើកនូវស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តធ្វើសកម្មភាពបាញ់ប្រហារចូលទីតាំងប្រជាជនស៊ីវិលកម្ពុជា និងហេដ្ឋារចនាសម្ព័ន្ធស៊ីវិល នៅយោធភូមិភាគទី៥ ក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ នាថ្ងៃទី២៤ ខែធ្នូ ឆ្នាំ២០២៥ថា នៅវេលាម៉ោង៩:១២នាទី យោធាថៃបានបាញ់ផ្លោងចំនួន២គ្រាប់ចូលក្នុងភូមិសាស្ត្រក្រុងប៉ោយប៉ែត ដោយចំនួន១គ្រាប់ធ្លាក់នៅជិតរង្វង់មូល៥៨ និង ចំនួន១គ្រាប់ទៀតធ្លាក់នៅសង្កាត់និមិត្ត ក្រុងប៉ោយប៉ែត ។
ក្រសួងបានចាត់ទុកសកម្មភាពខាងលើ ជាការវាយប្រហារដ៏កំរោលដោយមិនរើសគោលដៅរបស់យោធាថៃ ជាការរំលោភបំពានច្បាប់មនុស្សធម៌អន្តរជាតិ ។
ក្រសួងបានអះអាងថា កងកម្លាំងកម្ពុជាបាននឹងបន្តតាមដានយ៉ាងយកចិត្តទុកដាក់ និងឈរជើងយ៉ាងរឹងមាំ ស្វាហាប់ មោះមុត និងប្រុងប្រយ័ត្នខ្ពស់ជានិច្ច ក្នុងការបំពេញតួនាទីរបស់ខ្លួន ដើម្បីការពារបូរណភាពទឹកដីរបស់កម្ពុជា និងសេចក្តីថ្លៃថ្នូររបស់យើងដោយអង់អាចក្លាហាន ដោយមិនងាករេជាដាច់ខាតទោះក្នុងតម្លៃណាក៏ដោយ ។
ជាមួយគ្នានោះដែរ ក្រសួងការពារជាតិស្នើសូមបងប្អូនប្រជាពលរដ្ឋតាមដាននិងទទួលព័ត៌មានពីប្រភពផ្លូវការ ព្រមទាំងចូលរួមសហការណ៍ និងគោរពទៅតាមការណែនាំរបស់អាជ្ញាធរមូលដ្ឋានទាំងអស់គ្នា ៕
ចែករំលែកព័តមាននេះ