ទីក្រុងវ៉ាស៊ីនតោន ៖ លោក Tommy Pigott អ្នកនាំពាក្យរងក្រសួងការបរទេសសហរដ្ឋអាមេរិក បានបញ្ជាក់ជាថ្មីនូវការអំពាវនាវរបស់សហរដ្ឋអាមេរិកឱ្យកម្ពុជា និងថៃ បញ្ចប់អរិភាព និងស្វាគមន៍កិច្ចប្រជុំពិសេសរដ្ឋមន្ត្រីការបរទេសអាស៊ាន…
ទីក្រុងវ៉ាស៊ីនតោន ៖ លោក Tommy Pigott អ្នកនាំពាក្យរងក្រសួងការបរទេសសហរដ្ឋអាមេរិក បានបញ្ជាក់ជាថ្មីនូវការអំពាវនាវរបស់សហរដ្ឋអាមេរិកឱ្យកម្ពុជា និងថៃ បញ្ចប់អរិភាព និងស្វាគមន៍កិច្ចប្រជុំពិសេសរដ្ឋមន្ត្រីការបរទេសអាស៊ាន ដែលធ្វើឡើងនៅថ្ងៃទី២២ ខែធ្នូ ឆ្នាំ២០២៥។ នេះបើយោងតាមការចេញផ្សាយពីក្រសួងការបរទេសអាមេរិក នៅព្រឹកថ្ងៃទី២២ ខែធ្នូ ឆ្នាំ២០២៥ (ម៉ោងនៅកម្ពុជា)។
នៅក្នុងសេចក្តីថ្លែងការណ៍ក្រសួងការបរទេសអាមេរិក តាមរយៈលោក Tommy Pigott បានគូសបញ្ជាក់ថា សហរដ្ឋអាមេរិកបន្តអំពាវនាវឱ្យកម្ពុជា និងថៃបញ្ចប់អរិភាព ដកអាវុធធុនធ្ងន់ បញ្ឈប់ការដាក់មីន និងអនុវត្តយ៉ាងពេញលេញនូវកិច្ចព្រមព្រៀងសន្តិភាពទីក្រុងគូឡាឡាំពួ (ប្រទេសម៉ាឡេស៊ី) ដែលរួមមានយន្តការដើម្បីពន្លឿនការដោះមីនមនុស្សធម៌ និងដោះស្រាយបញ្ហាព្រំដែន។
ជាមួយគ្នានោះ លោកបានបន្ថែមទៀតថា «យើង (សហរដ្ឋអាមេរិក) សូមស្វាគមន៍ចំពោះមេដឹកនាំអាស៊ានដែលបានមកជួបគ្នានៅសប្តាហ៍នេះ ដើម្បីគាំទ្រកម្ពុជា និងថៃ ឱ្យគោរពយ៉ាងពេញលេញនូវការប្តេជ្ញាចិត្តរបស់ពួកគេក្នុងការបញ្ចប់ជម្លោះមួយនេះ»។
សូមជម្រាបថា ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា នឹងអញ្ជើញចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ានស្តីអំពីស្ថានភាពបច្ចុប្បន្នរវាងកម្ពុជា និងថៃ ដែលប្រព្រឹត្តទៅនៅថ្ងៃទី២២ ខែធ្នូ ឆ្នាំ២០២៥នេះ នៅក្នុងទីក្រុងគូឡាឡាំពួ ប្រទេសម៉ាឡេស៊ី តបតាមការសម្រេចរបស់នាយករដ្ឋមន្ត្រីម៉ាឡេស៊ី លោក Anwar Ibrahim៕
ចែករំលែកព័តមាននេះ