ខេត្តកំពង់ស្ពឺ ៖ ជនសង្ស័យម្នាក់ត្រូវបានកម្លាំងនគរបាលក្រុងច្បារមនធ្វើការឃាត់ខ្លួនបាន ខណៈដែលស្កាត់តាំងពីភ្នំពេញមកធ្វើសកម្មភាពលួចគាស់ឃ្លាំងស្តុកទំនិញមួយកន្លែងប៉ុនប៉ងលួចសម្ភារៈ ហើយត្រូវបានប្រជាពលរដ្ឋរាយការណ៍ជូនសមត្ថកិច្ចក៏ធ្វើការឃាត់ខ្លួនបានតែម្តង។
ការឃាត់ខ្លួនជនសង្ស័យគាស់ឃ្លាំងប៉ុនប៉ងលួចទ្រព្យសម្បត្តិក្នុងឃ្លាំងស្តុកទំនិញមួយកន្លែងបានធ្វើឡើង កាលម៉ោង១និង៤០នាទីរសៀល ថៃ្ងទី២២ ខែវិច្ឆិកា ឆ្នាំ២០២៥ នៅចំណុចឃ្លាំងស្តុកទំនិញមួយកន្លែង ស្ថិតនៅក្នុងភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ។
នគរបាលក្រុងច្បារមនបាននិយាយឱ្យដឹងថា ជនសង្ស័យដែលឃាត់ខ្លួនបានមានឈ្មោះ ឃៀង សុខុន ភេទប្រុស អាយុ៦២ឆ្នាំ មុខរបរមិនពិតប្រាកដ មានអាសយដ្ឋានមិនអចិន្ដ្រៃយ៍ស្នាក់នៅបន្ទប់ជួល ក្នុងសង្កាត់បឹងកក់១ ខណ្ឌទួលគក រាជធានីភ្នំពេញ ។
តាមការបញ្ជាក់ពីលោកវរសេនីយ៍ទោ យ័ន្ដ សង្ហារ អធិការនគរបាលក្រុងច្បារមបាននិយាយឱ្យដឹងថា នៅមុនពេលឈានដល់ការឃាត់ខ្លួនជនសង្ស័យវ័យចំណាស់ខាងលើគឺ មានប្រជាពលរដ្ឋរាយការណ៍តាមប្រព័ន្ធទូរស័ព្ទ និងបានរាយការណ៍មកលេខទាន់ហេតុការណ៍ Hotline នៅវេលាម៉ោង១និង៣០នាទីរសៀល ថៃ្ងទី២២ ខែវិច្ឆិកា ឆ្នាំ២០២៥ នៅចំណុចឃ្លាំងស្តុកទំនិញ ស្ថិតនៅក្នុងភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ថាមានករណីប៉ុនប៉ុងលួចទ្រព្យសម្បត្ដិដោយមានក្រុមចោរប្រដាប់ដោយសម្ភារមួយចំនួន បានធ្វេីសកម្មភាពជាច្រើនលើកនិងកំពុងតែប្រព្រឹត្ដ។
ក្រោយទទួលបានសេចក្តីរាយការណ៍ភ្លាម និង ដោយបានការបញ្ជាដឹកនាំដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងនគរបាលនៃអធិការនគរបាលក្រុងច្បារមន បានធ្វេីការស្រាវជ្រាវរហូតឈានទៅឃាត់ខ្លួនបានមុខសញ្ញាចោរលួចដ៏សកម្មម្នាក់ រួមជាមួយវត្ថុតាងមួយចំនួនក្នុងនោះដកហូតវត្ថុតាងរួមមាន៖ ទី១~កន្ត្រៃ កាត់ដែកចំនួន ១ ទី២~ទល់នឺវុីស១ ទី៣~ឧបករណ៍កាច់សោរក ម៉ូតូចំនួន០៣គ្រាប់ ទី៤~ កន្ត្រៃតូច១ ទី៥~ម៉ាឡេត ចំនួន ១ ទី៦~ ដែកដាប់ ចំនួន១ និងទី៧~ទូរស័ព្ទដៃមួយគ្រឿង និងសោម៉ូតូ១ផងដែរ
លោកអធិការនគរបាលក្រុងច្បារមនបានបន្តទៀតថា ក្រោយឃាត់ខ្លួនជនសង្ស័យកំលាំងបានដឹកបញ្ជូនមកអធិការដ្ឋានធ្វេីការសាកសួរ និងបានកសាងសំណុំរឿងបញ្ជូនទៅការិយាល័យព្រហ្មទណ្ឌ នៃស្នងការដ្ឋាននគរបាលខេត្ដកំពង់ស្ពឺ ដើម្បីមានចំណាត់ការបន្តតាមផ្លូវច្បាប់ ៕
ចែករំលែកព័តមាននេះ