មុនគ្រងម្កុដ! ល្អ ហួស បោះពាក្យសម្តីឆ្លើយតបអ្នករិះ.គ.ន់.រឿងប្រើលុយដើម្បីឈ្នះ
- ភ្នំពេញ
រាជធានីភ្នំពេញ ៖ ដូចការរំពឹងទុក នៅទីបំផុត បេក្ខភាព ជូរី ល្អ ហួស បានគ្រងម្កុដ Miss…
រាជធានីភ្នំពេញ ៖ ដូចការរំពឹងទុក នៅទីបំផុត បេក្ខភាព ជូរី ល្អ ហួស បានគ្រងម្កុដ Miss teen Cambodia 2025 ហើយ បន្ទាប់ពីរូបនាងបានយកឈ្នះលើបណ្តាបេក្ខភាពជាច្រើនរូប ដែលបានចូលរួមប្រកួតប្រជែងក្នុងវគ្គផ្តាច់ព្រ័តដែលបានធ្វើឡើងនៅយប់ថ្ងៃទី១៦ ខែវិច្ឆិកា ឆ្នាំ២០២៥ ។
យ៉ាងណា មុនការឈ្នះម្កុដនាពេលនេះ ល្អ ហួស ក៏បានបោះពាក្យសម្តីទៅកាន់អ្នករិះគន់មកលើរូបនាងថា អ្នកមានតែងតែឈ្នះ ក្នុងពេលដែលនាងចាត់ទុកការលើកឡើងនេះ គឺមិនត្រឹមត្រូវឡើយ ដ្បិតនាងតែងតែយកសមត្ថភាពដែលខ្លួនមានសម្រាប់ការប្រកួត ពោលនាងមិនបានប្រើប្រាស់លុយនោះឡើយ ។
តាមរយៈសំណេរបង្ហោះលើបណ្តាញសង្គម ល្អ ហួស បានលើកឡើងថា បងគិតមកលើ ល្អ ហួស គឺខុសហើយ នាងខ្ញុំតែងតែយកសមត្ថភាពរបស់ខ្លួនឯងទៅប្រកួតប្រជែង មិនមែនប្រើលុយដើម្បីឈ្នះនោះទេ ។ នាងបញ្ជាក់ថា កម្មវិធីតែងតែជ្រើសរើសអ្នកមានសមត្ថភាពពិតប្រាកដ តែបើបងៗដែលមានធនធាន និងបងៗដែលមិនមានធនធាន តែបើសមត្ថភាពគាត់លើសគេខ្លាំងជាងគេ គាត់និងឈ្នះម្កុដដោយសេចក្តីថ្លៃថ្នូរ ។
ជាការកត់សម្គាល់ សម្រាប់ការលើកឡើងពីអ្នករិះគន់មកលើ ល្អ ហួស នាពេលនេះ មហាជន ជាពិសេស បណ្តាអ្នកគាំទ្ររូបនាងជាច្រើន ក៏បានសម្តែងការមិនពេញចិត្តផងដែរ ដ្បិតមតិភាគច្រើនយល់ឃើញដូចគ្នាថា ល្អ ហួស ពិតជាស័ក្តិសមក្នុងការគ្រងម្កុដ ដោយមិនបាច់ប្រើប្រាស់លុយ ដោយសារតែនាងមានរូបសម្រស់ និងសមត្ថភាពគ្រប់គ្រាន់ ។
គួរបញ្ជាក់ថា ល្អ ហួស បានបង្ហាញសមត្ថភាព និងរូបសម្រស់របស់ខ្លួនយ៉ាងលេចធ្លោនៅក្នុងការប្រកួត Miss teen Cambodia 2025 វគ្គផ្តាច់ព្រ័ត រហូតធ្វើឲ្យនាងអាចឈ្នះ និងបានគ្រងម្កុដនៅក្នុងកម្មវិធីប្រកួតបវរកញ្ញាមួយនេះ ។ ល្អ ហួស ពិតជាមានការជឿជាក់សម្រាប់ការប្រកួតមួយនេះ ដោយសារតែនាងមើលឃើញពីសមត្ថភាពរបស់ខ្លួន បូករួមនាងមានបទពិសោធន៍ធ្លាប់ឆ្លងកាត់ការប្រកួតរហូតអាចគ្រងម្កុដនៅឯក្រៅប្រទេសផងនោះ ទើបនាងបានបង្ហាញពីសកម្មភាពយ៉ាងរស់រវើក និងធ្វើបានល្អពីមួយវគ្គទៅមួយវគ្គ ។
អ្វីដែលទស្សនិកជនមានការចាប់អារម្មណ៍ខ្លាំងនោះ គឺវគ្គតស៊ូមតិ ដែល ល្អ ហួស បានជ្រើសរើសយកប្រធានបទពីការឈ្លានពានពីសំណាក់ភាគីសៀមមកលើប្រទេសកម្ពុជា កាលពីថ្ងៃទី២៤ ខែកកក្កដា ដែលកងទ័ពថៃបានបាញ់ប្រហារមកលើកងទ័ពខ្មែរ ។ ល្អ ហួស បានលើកឡើងថា ២៤ កក្តដា ២០២៥ ទាហានថៃបានបើកការបាញ់ប្រហារមកលើកម្ពុជា ហើយបណ្តាលអោយវីរៈកងទ័ពកម្ពុជាបានបូជាសាច់ស្រស់ ឈាមស្រស់ និងពលីនៅក្នុងសង្គ្រាមការពារទឹកដី ។ សង្គ្រាមដែលថៃបានបង្កនោះ ក៏ធ្វើឲ្យខូចខាតផ្ទះសម្បែងរបស់ប្រជាពលរដ្ឋខ្មែរយ៉ាងច្រើន ហើយថៃបានបាញ់បំផ្លាញប្រាសាទព្រះវិហារដែលជាបេតិកភណ្ឌពិភពលោកដោយគ្មានញញើតដៃថែមទៀតផង ។
ល្អ ហួស ក៏បានលើកឡើងពីការចាប់ខ្លួនដោយខុសច្បាប់ពីសំណាក់កងទ័ពថៃមកលើកងទ័ពកម្ពុជាចំនួន១៨រូប ក្រោយកិច្ចព្រមព្រៀងឈប់បាញ់ចូលជាធរមាន ហើយរហូតមកទល់នាពេលនេះ វីរៈកងទ័ពកម្ពុជាមិនទាន់ត្រូវបានដោះលែងមកវិញនៅឡើយទេ ។
យ៉ាងណា ក្នុងនាមរូបនាងតំណាងប្រជាពលរដ្ឋខ្មែរទាំងអស់ សូមស្នើឲ្យភាគីថៃត្រូវដោះលេងវីរៈកងទ័ពកម្ពុជាមកវិញដោយសុខសុវត្ថិភាព ដើម្បីឲ្យពួកគាត់មកជួបជុំគ្រួសារវិញ ស្របតាមច្បាប់មនុស្សធម៌អន្តរជាតិឲ្យបានឆាប់រហ័សបំផុត ៕
ចែករំលែកព័តមាននេះ