រាជធានីភ្នំពេញ៖ យោធិន៣៤នាក់ នៃបញ្ជាការដ្ឋានវិស្វកម្ម កងទ័ពជើងគោក នៅទីបញ្ជាការដ្ឋានវិស្វកម្ម បានទទួលប្រាក់ឧបត្ថមគោលនយោបាយមួយជាលើកដំបូង។

យោងតាមការចុះផ្សាយរបស់កងទ័ពជើងគោកនៃកងយោធពលខេមរភូមិន្ទ បានឱ្យដឹងថា
នៅព្រឹក​ថ្ងៃទី២៩ ខែសីហា ឆ្នាំ២០២៥ ឯកឧត្តម ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវា ក្រសួងការពារជាតិ បានអញ្ជើញចុះចួបសំណេះសំណាល និងបើកប្រាក់ឧបត្ថមគោលនយោបាយមួយលើកដំបូង ជូនដល់យោធិន៣៤នាក់ នៃបញ្ជាការដ្ឋានវិស្វកម្ម កងទ័ពជើងគោក នៅទីបញ្ជាការដ្ឋានវិស្វកម្ម។

ជារៀងរាល់ឆ្នាំក្រសួងការពារជាតិ បានធ្វើការផ្ទេរយោធិន ដែលដល់អាយុចូលនិវត្តន៍ បាត់បង់សម្ថភាពការងារ ពលីមរណៈ និងពិការចេញពីជួរកងទ័ព ពលីមរណៈ តាមផែនការឆ្នាំរបស់ខ្លួន ក្នុងការធ្វើកំណែទម្រង់ កងយោធពលខេមរភូមិន្ទ និងអាចជ្រើសរើសយោធិនវ័យក្មេងមកជំនួសដើម្បីបន្តវេន។

ក្នុងឱកាសនោះ ឯកឧត្តម ឧត្តមសេនីយ៍ឯក សំ ចាន់ធួន បានធ្វើការផ្សព្វផ្សាយឱ្យយោធិនទំាងអស់ បានយល់អំពីច្បាប់ និងគោលរបប ដែលត្រូវទទួលបាននៅពេលនេះ ពិសេសបិទប្រកាសគោលរបបជាសាធារណជូនយោធិន ឱ្យបានដឹងមុនពេលចូលបើក។

ឯកឧត្តម ក៏បានលើកឡើងបញ្ជាក់ផងដែរអំពីរវីរភាព និងការលះបង់របស់បងប្អូន ក្នុងរយៈពេលកន្លងមកដែលបានចូលរួមរំដោះទឹកដី រកសុខសន្តិភាពជូនប្រជាពលរដ្ឋ រួមចំណែកក្នុងការអភិវឌ្ឍប្រទេស ថែរក្សាសុខសន្តិភាពរហូតមកទល់បច្ចុប្បន្ននេះ ប៉ុន្តែយើងមានភាពចាំបាច់ក្នុងការធ្វើកំណែទម្រង់កងយោធពលខេមរភូមិន្ទដែលដល់អាយុចូលនិវត្តន៍ របួសពិការ និងយោធិន ពលីមរណៈ។

ក្នុងនោះដែរ ឯកឧត្តម ឧត្តមសេនីយ៍ឯក សំ ចាន់ធួន សង្ឃឹមថាបងប្អូនទាំងអស់នៅពេលបានបើកប្រាក់គោលរបបបានហើយ និងយកប្រាក់ទាំងអស់នោះទៅប្រើប្រាស់ឱ្យចំគោលដៅរបស់រាជរដ្ឋាភិបាល ក៏ដូចក្រសួងការពារជាតិចង់បាន គឺយកទៅប្រកបរបរចិញ្ចឹមជីវិត គ្រួសារ និងកូន ដើម្បីផ្គត់ផ្គង់ជីវភាពប្រចាំថ្ងៃ៕