រាជធានីភ្នំពេញ ៖ នៅទីបំផុត អតីតតារាភាពយន្តជើងចាស់អ្នកនាង សុខ ស្រីមុំ បានចេញមុខសុំទោសជាសាធារណៈហើយ នៅព្រឹកថ្ងៃទី២៧ ខែសីហា ឆ្នាំ២០២៥…
រាជធានីភ្នំពេញ ៖ នៅទីបំផុត អតីតតារាភាពយន្តជើងចាស់អ្នកនាង សុខ ស្រីមុំ បានចេញមុខសុំទោសជាសាធារណៈហើយ នៅព្រឹកថ្ងៃទី២៧ ខែសីហា ឆ្នាំ២០២៥ ក្រោយមានការរិះគន់ និងថ្កោលទោសយ៉ាងខ្លាំងពីមហាជន ពាក់ព័ន្ធរឿងអ្នកនាងប្រមាថមកលើអង្គព្រះមហាក្សត្រកម្ពុជាទាំងទ្វេ ។
យ៉ាងណា ការចេញមុខសុំទោសពីអតីតតារាសម្តែងស្រីរូបនេះ បានធ្វើឲ្យមហាជនហាក់មិនទាន់អាចទទួលយកបានឡើយទេ ដោយសារសកម្មភាពនៃការចេញសុំទោសនោះមើលទៅមិនសមរម្យស័ក្តិសមចំពោះការសុំលើកលែងទោសចំពោះអង្គព្រះមហាក្សត្រ ។ មិនសមរម្យដោយសាររូបភាពវីដេអូសុំទោសរបស់អ្នកនាង សុខ ស្រីមុំ នាពេលនេះ គឺអ្នកនាងពាក់មួក និងឈរធ្វើកាយវិការដូចជាការសម្តែង ខណៈពេលការសុំទោសនោះ ហាក់បីដូចជាការលេងសើចទៅវិញ ។
ប្រធានក្រុមដំណើរខ្មែរលោក វីរៈ វ៉ារ៉ានី បានលើកឡើងតាមរយៈសំណេរបង្ហោះលើបណ្តាញសង្គមថា នៅវេលាព្រឹកថ្ងៃទី២៧ ខែសីហា ឆ្នាំ២០២៥ អតីតតួវីដេអូ សុខ ស្រីមុំ បានចេញសូមព្រះរាជទានទោសពីហ្លួងទាំងពីរហើយ ប៉ុន្តែសូមបងប្អូនពិនិត្យរបៀបនៃការសូមប្រទានទោសនេះ តែសមជាលក្ខណៈនៃការសូមប្រទានទោស ឬជាការលេងសើច!?។
លោកបញ្ជាក់ថា ខ្ញុំមិនមែនតាមទាន់ជាន់កែងទេ តែតាមវ័យចំណាស់នេះទៅហើយមិនស្គាល់របៀបសូមទោស កើតនៅស្រុកខ្មែរ រស់នៅស្រុកខ្មែរ សម្តែងវីដេអូនៅស្រុកខ្មែរសោះ គ្រាន់តែរបៀបនៃការនិយាយសូមទោស ឬសូមប្រទានទោស ឬក៏ការទទួលទោសអោយល្អជាងនេះ និយាយមិនកើត ឬមួយការសូមទោសនេះកើតចេញពីមហាជនជេរច្រើនពេកក៏បង្ខំចិត្តធ្វើវីដេអូសូមទោសរបៀបនេះ ។ លោកថា ប្រហែលជាគាត់មានសតិមិនល្អដូចការលើកឡើងរបស់បងប្អូនមែនមើលទៅ ។
លោកបានអះអាងបន្ថែមថា សូមបញ្ជាក់ជូនបងប្អូនយើងដែលកន្លងមកយល់ថា ជាវីដេអូ AI ឃ្លីបសូមទោសសមល្មមនឹងបញ្ជាក់កាន់តែច្បាស់ថា វីដេអូប្រមាថរបស់គាត់មុននោះគឺជាវីដេអូពិត១០០ភាគរយ មិនមែនខ្ញុំមិនស្គាល់ស្អីថា AI ឬវីដេអូពិតឡើយ។
យ៉ាងណាជុំការរិះគន់នេះ គេក៏ឃើញមានមិត្តភក្តិជិតស្និទ្ធរបស់អ្នកនាង សុខ ស្រីមុំ ក៏បានចេញមុខស្នើឲ្យមហាជនមានការលើកលែងទោសចំពោះរូបនាងផងដែរ ដោយគេចាត់ទុកថា នាងរៀនសូត្របានតិចតួច សរសេរអក្សរខ្មែរមិនត្រង់ជួរទេ ហើយនាងធំដឹងក្តីក៏ចាកចេញពីក្រុមគ្រួសារ រសាត់អណ្ដែតរហូតគេហៅសម្តែងដោយសារសម្រស់ បានទៅនៅអាមេរិក ហើយចុងក្រោយបានប្តីអាមេរិកកាំង ។ សរុបសេចក្ដីមក សូមកុំប្រកាន់នាងទៀតអី.ការនិយាយមិនបានល្អ ការគិតអ្វីៗមិនជ្រៅជ្រះ ។
ជាការកត់សម្គាល់តាមរយៈវីដេអូដែលបង្ហោះលើបណ្តាញសង្គមអតីតតារាសម្តែងអ្នកនាង សុខ ស្រីមុំ បានលើកឡើងថា ថ្ងៃនេះនាងខ្ញុំចេញសុំទោសដល់បងប្អូនខ្មែរទូទាំងពិភពលោក ដោយសារមានគេផ្ញើរូបភាពក្លែងក្លាយបង្ហាញពីក្មេងក្នុងជំរុំជនភៀសសឹកអត់មានអ្វីញាំ និងគ្មានទឹកផឹក នោះជាហេតុធ្វើឲ្យនាងខឹងទប់ចិត្តមិនបាន ហើយក៏មានពាក្យសម្តីមិនល្អដាក់ព្រះអង្គទាំងពីរ ។
ដូច្នេះ នាងសុំមកលុបលាងកំហុសនៅថ្ងៃនេះ សុំព្រះអង្គទាំងពីរមេត្តាអភ័យទោសដល់រូបនាងផង និងសូមកុំប្រកែប្រកាន់ ដាក់ទោសនឹងរូបនាងដែលប្រើពាក្យសអសុរោះ ហើយចុងក្រោយ នាងសូមបួងសួងដល់ទេវតាជួយតាមថែរក្សាព្រះអង្គទាំងពីរឲ្យមានព្រះជន្មាយ៉ឺនយូរ ៕
ចែករំលែកព័តមាននេះ