រាជធានីភ្នំពេញ ៖ ក្មេងប្រុស និងស្រី ចំនួន៤នាក់ នាំគ្នាចុះលេងទឹកស្រះក្នុងវត្តជម្រៅជាង១០ម៉ែត្រ តាមកាំជណ្ដើរស្រះទឹកនោះ ចំណែកក្មេងស្រីម្នាក់ទៀត ទៅជាមួយគ្នាដែរ ប៉ុន្តែអត់ចុះលេងនឹងគេឡើយ…
រាជធានីភ្នំពេញ ៖ ក្មេងប្រុស និងស្រី ចំនួន៤នាក់ នាំគ្នាចុះលេងទឹកស្រះក្នុងវត្តជម្រៅជាង១០ម៉ែត្រ តាមកាំជណ្ដើរស្រះទឹកនោះ ចំណែកក្មេងស្រីម្នាក់ទៀត ទៅជាមួយគ្នាដែរ ប៉ុន្តែអត់ចុះលេងនឹងគេឡើយ ហើយកាំជណ្ដើរស្រះនោះត្រាំទឹកយូរមានស្លែរកាន់ ។
ខណៈនោះមានបុរសម្នាក់ ដែលទៅលេងនៅក្នុងវត្តនោះដែរ បានទៅហាមឃាត់ក្មេងៗខាងលើ៥ទៅ៦ដង កុំឲ្យលេងទឹកអី ព្រោះខ្លាចលង់ស្លាប់ ប៉ុន្តែក្មេងៗអត់ព្រមស្ដាប់ ហើយសើចឌឺទៀត ហើយបុរសនោះក៏ដើរចេញ ។
លុះក្រោយមកក្មេងៗទាំងនោះ រអិលស្លែធ្លាក់ចេញពីកាំជណ្ដើរ បណ្ដាលឲ្យក្មេងស្រីម្នាក់លង់លិចបាត់ទៅក្នុងទឹក ចំណែកមិត្តភក្ដិ៣នាក់ទៀត ម្នាក់ចេះហែលទឹក រីឯ ២នាក់ត្រូវបានមិត្ដភក្ដិម្នាក់ ដែលនៅលើគោក បោះខ្សែឲ្យតោង ទើបរួចផុតពីសេចក្ដីស្លាប់ ។
ហេតុការណ៍នេះបានកើតឡើង បង្កឲ្យមានការភ្ញាក់ផ្អើលកាលពីវេលាម៉ោង២និង៤៥នាទីរសៀលថ្ងៃទី២៣ ខែសីហា ឆ្នាំ២០២៥ នៅចំណុចស្រះទឹកក្នុងវត្តតាំងកសាងខាងជើង ស្ថិតនៅក្នុងភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ក្មេងស្រីដែលស្លាប់ឈ្មោះ សុខ មុនី កញ្ចនា អាយុ៩ឆ្នាំ ជាសិស្សថ្នាក់ទី៤ រៀននៅសាលាបឋមសិក្សាវត្តតាំងកសាងខាងត្បូង នាងមានម្ដាយឈ្មោះខិល មុំ អាយុ៤១ឆ្នាំ មុខរបរកម្មការិនីរោងចក្រកាត់ដេរ មានឪពុកឈ្មោះសុខ សាយ អាយុ៤៩ឆ្នាំ ជាជនពិការ ។ គ្រួសារមួយនេះ មានគ្នាតែ៣នាក់ ឪពុក ម្ដាយ និងកូនស្រីតែប៉ុណ្ណោះ មានស្រុកកំណើតនៅភូមិគោល ឃុំស្វាយអង្គ ស្រុកស្វាយជ្រុំ ខេត្តស្វាយរៀង។ សាកសពរបស់នាង ត្រូវបានក្រុមរុករក និងសង្គ្រោះកងពលតូចទ័ពពិសេសឆ័ត្រយោង៩១១ រាវរកឃើញនៅវេលាយប់ថ្ងៃកើតហេតុដដែលនោះ ។
ស្ត្រីជាម្ដាយបាននិយាយថា គាត់និងប្ដីមានតែកូនស្រីម្នាក់នេះគត់ រាល់ថ្ងៃគាត់ និងកូនស្រីបានស្នាក់នៅជាមួយគ្នានៅផ្ទះជួលក្នុងភូមិចំការឪឡឹក១ សង្កាត់កាកាបទី២ ខណ្ឌពោធិ៍សែនជ័យ ចំណែកប្ដីគាត់ស្នាក់នៅផ្ទះមួយទៀតនៅសង្កាត់កំបូល ខណ្ឌកំបូល។ ជារៀងរាល់ថ្ងៃ នៅពេលកំពុងធ្វើការ ហើយកូនទៅរៀន ឬចេញពីរៀនគាត់តែងតែខលទៅរកកូនស្រី៣ទៅ៤ដង ហាមមិនឲ្យកូនដើរលេងផ្ដេសផ្ដាសទេ ។
ស្ត្រីរូបនោះបាននិយាយបន្តទៀតថា ដោយឡែកនៅថ្ងៃកើតហេតុ ខណៈដែលគាត់កំពុងធ្វើការកូនស្រីបានខលសុំទៅដើរលេងវត្តតាំងកសាងខាងជើង ពេលនោះគាត់បានសួរថា «កូនឯងទៅប៉ុន្មាននាក់ ? កូនឆ្លើយថាទៅ៥នាក់» ហើយគាត់ក៏អនុញ្ញាតឲ្យទៅ ប៉ុន្តែគាត់បានហាមកូនកុំឲ្យចុះលេងទឹក។ បន្ទាប់មកគាត់ក៏បានធ្វើការជាធម្មតា លុះក្រោយស្រាប់តែមានគេខលប្រាប់ថាកូនស្រីគាត់លង់ទឹកស្លាប់ហើយ ពេលនោះគាត់ក៏ចេញពីធ្វើការទៅកាន់កន្លែងកើតហេតុទាំងការតក់ស្លុតបំផុត ។
បើតាមក្មេងៗ ៤នាក់ទៀត ដែលនៅរស់បាននិយាយថា នៅថ្ងៃកើតហេតុនោះពួកគេទាំង៤នាក់រួមនិងជនរងគ្រោះបាននាំគ្នាទៅលេងទឹកស្រះក្នុងវត្តខាងលើនោះ លុះពេលទៅដល់បានចុះលេងទឹក៤នាក់ក្នុងនោះប្រុស១នាក់និងស្រី៣នាក់ ដោយបានចុះតាមកាំជណ្ដើរស្រះទឹក។ ចំណែកមិត្តភក្ដិស្រីម្នាក់ទៀតឈរនៅខាងលើអត់ចុះលេងនោះទេ ខណៈនោះដោយសារកាំជណ្ដើរមានស្លែកាន់ ក៏បានរអិលជើងធ្លាក់ចេញពីកាំជណ្ដើរចូលទៅក្នុងទឹកស្រះ ហើយផុតជើងផុតដៃទាំងអស់គ្នា ។
ក្មេងៗទាំងនោះបាននិយាយរៀបរាប់ទៀតថា ពេលនោះមិត្តស្រីម្នាក់ដែលនៅលើគោកអត់ចុះលេងទឹកនោះ បានរត់ទៅយកខ្សែបោះឲ្យតោង ហើយជួយបានស្រីម្នាក់និងប្រុសសម្នាក់។ រីឯមិត្តស្រីម្នាក់ទៀតចេះហែលទឹក ក៏បានហែលឡើងគោករួចផុតពីសេចក្ដីស្លាប់ចំណែកក្មេងស្រីរងគ្រោះបានលង់លិចបាត់ទៅក្នុងទឹកតែម្ដង បន្ទាប់មកអ្នកនៅរស់បាននាគគ្នារត់ទៅប្រាប់បុរសម្នាក់នៅជិតនោះឲ្យជួយបង្កឲ្យមានការភ្ញាក់ផ្អើល ។
បើតាមបុរសម្នាក់បាននិយាយថា នៅមុនពេលកើតហេតុគាត់បានទៅលេងនៅក្នុងវត្តនោះ ហើយបានឃើញក្មេងទាំង៥នាក់ខាងលើកំពុងលេងទឹកស្រះ ពេលនោះគាត់បានទៅហាមឃាត់៥ទៅ៦ដងកុំឲ្យពួកគេលេងទឹកអី។ ប៉ុន្តែក្មេងៗទាំងនោះមិនស្ដាប់សោះ ហើយសើចឌឺគាត់ថែមទៀតផង ហើយគាត់ក៏នៅឈរមើលព្រោះខ្លាចក្មេងៗនេះលង់ទឹក លុះក្រោយមកដោយសារតែមានភ្លៀងធ្លាក់ គាត់ក៏ដើរចេញពីទីនោះទៅជ្រកនៅចេតិយ៍ក្នុងវត្ត ។ ស្រាប់តែឃើញក្មេង៤នាក់រត់ទៅប្រាប់គាត់ថា ជួយពួកម៉ាកខ្ញុំផងពួកម៉ាកខ្ញុំលង់ទឹកហើយ ទើបមានការភ្ញាក់ផ្អើល ហើយគាត់រត់ទៅមើលតែក្មេងស្រីនោះលិចទៅក្នុងទឹកបាត់ទៅហើយ ។
ក្រោយពេលកើតហេតុសមត្ថកិច្ចមូលដ្ឋានបានចុះទៅកាន់កន្លែងកើតហេតុ ហើយទាក់ទងទៅក្រុមរុករកនិងសង្គ្រោះកងពលតូចទ័ពពិសេសឆ័ត្រយោង៩១១ ដើម្បីរាវរកនិងបានរកឃើញសពនៅវេលាម៉ោង៧និង៣០នាទីយប់ថ្ងៃដដែលរួចប្រគល់សពឲ្យឪពុកម្ដាយនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ