ប្រទេសវៀតណាម ៖ តាមសេចក្តីរាយការណ៍ពីសារព័ត៌មានវៀតណាម VnExpress នៅថ្ងៃទី៧ ខែសីហា ឆ្នាំ២០២៥ បានឱ្យដឹងថា រដ្ឋបាលទីក្រុងហាណូយនឹងបិទផ្សារបណ្ដោះអាសន្ន (Makeshift…
ប្រទេសវៀតណាម ៖ តាមសេចក្តីរាយការណ៍ពីសារព័ត៌មានវៀតណាម VnExpress នៅថ្ងៃទី៧ ខែសីហា ឆ្នាំ២០២៥ បានឱ្យដឹងថា រដ្ឋបាលទីក្រុងហាណូយនឹងបិទផ្សារបណ្ដោះអាសន្ន (Makeshift Markets) ឬការលក់ដូរលើចិញ្ចើមផ្លូវ និងកន្លែងសត្តឃាតគ្មានការគ្រប់គ្រងត្រឹមត្រូវទាំងអស់នៅត្រឹមបំណាច់ឆ្នាំ២០២៥ ដែលជាផ្នែកមួយនៃការជំរុញទូទាំងទីក្រុងមានប្រជាជនច្រើនលំដាប់ទីពីររបស់វៀតណាមមួយនេះ ឱ្យមានអនាម័យតាមដងផ្លូវ កែលម្អសុវត្ថិភាពចំណីអាហារ និងរៀបចំជីវិតរស់នៅប្រចាំថ្ងៃនៃទីក្រុងឡើងវិញ។
សេចក្តីរាយការណ៍ពី Voice of Vietnam បានឱ្យដឹងថា ផែនការថ្មីរបស់ទីក្រុងហាណូយ កំណត់គោលដៅផ្សារលក់ដូរលើចិញ្ចើមផ្លូវ និងតូបបណ្ដោះអាសន្នដែលបានរំលោភលើចិញ្ចើមផ្លូវ និងផ្លូវថ្មើរជើងនានា។ អាជ្ញាធរនឹងណែនាំដល់ឃុំ/សង្កាត់នីមួយៗ ឱ្យបញ្ឈប់ទីតាំងលក់ដូរទាំងនោះ ក៏ដូចជាលើកទឹកចិត្តប្រជាពលរដ្ឋឱ្យផ្លាស់ប្តូរទម្លាប់ទិញទំនិញបែបនេះ ព្រមទាំងរក្សាសណ្តាប់ធ្នាប់តាមដងផ្លូវ បន្ទាប់ពីមានការបិទផ្សារបណ្តោះអាសន្ន។
ប្រភពពីសារព័ត៌មានវៀតណាម Lao Dong បានឱ្យដឹងថា ទីតាំងសត្តឃាតសត្វតូចៗ និងសត្វបក្សីជាង៧០០កន្លែង ដែលនៅរាយប៉ាយកតាមបណ្តាលំនៅដ្ឋាន ក៏នឹងត្រូវបិទផងដែរ។ ទីក្រុងហាណូយនឹងផ្លាស់ប្តូរទីតាំងសត្តឃាតទៅកន្លែងផ្សេងតែមួយជាមួយគ្នា និងទំនើប ដែលបំពេញតាមស្តង់ដារអនាម័យ និងសុវត្ថិភាព ជាមួយការលើកទឹកចិត្តសម្រាប់ការវិនិយោគ និងការគាំទ្រដល់គ្រួសារដែលរងផលប៉ះពាល់។
មន្ត្រីមានគោលបំណងបញ្ចប់ការបិទទីផ្សារបណ្ដោះអាសន្ន និងការផ្លាស់ប្តូរទីតាំងសត្តឃាតនៅមុនដំណាច់ឆ្នាំ២០២៥ ដោយសន្យាថា ផ្លូវត្រូវតែស្អាតជាងមុន អាហារត្រូវតែមានសុវត្ថិភាព ព្រមទាំងបរិយាកាសទីក្រុង ដែលរៀបចំបានល្អជាងមុន សម្រាប់អ្នករស់នៅទីក្រុងហាណូយ៕
ចែករំលែកព័តមាននេះ