ខេត្តសៀមរាប៖ ដើម្បីចូលរួមចំណែកថែរក្សាវប្បធម៌ សិស្សានុសិស្សសាលាបឋមសិក្សាក្របីរៀល បានធ្វើទស្សនកិច្ចសិក្សា នៅតាមប្រាសាទមួយចំនួនក្នុងក្រុងអង្គរធំជាក់ស្ដែង បន្ទាប់ពីបានសិក្សានៅក្នុងថ្នាក់រៀន អស់រយៈពេលជាច្រើនខែមក។

យោងតាមការចុះផ្សាយរបស់អាជ្ញាធរជាតិអប្សរា បានឱ្យដឹងថានៅថ្ងៃទី២៩ ខែសីហា ឆ្នាំ២០២៥ សិស្សានុសិស្សថ្នាក់ទី៥ និងទី៦ នៃសាលាបឋមសិក្សាក្របីរៀល នៃសង្កាត់ក្របីរៀល ក្រុងសៀមរាប ចំនួន១០០នាក់បានធ្វើទស្សនកិច្ចនៅតាមប្រាសាទមួយចំនួនក្នុងក្រុងអង្គរធំ។

ដំណើរទស្សនកិច្ចសិក្សានេះ បន្ទាប់ពីបានសិក្សានៅក្នុងថ្នាក់រៀន អស់រយៈពេលជាច្រើនខែមក អំពីកម្មវិធីអប់រំបេតិកភណ្ឌ។ សិស្សានុសិស្សត្រូវអនុញ្ញាតឱ្យចុះសិក្សាផ្ទាល់នៅទីតាំងប្រវត្តិសាស្រ្ត ដើម្បីឱ្យកុមារបានសិក្សាពីប្រវត្តិសាស្រ្ត តាមលក្ខណៈវិទ្យាសាស្ត្រ ដែលបានបង្ហាញនៅតាមប្រាង្គប្រាសាទជាក់ស្តែង និងឱ្យកុមារសិក្សាអំពីកិច្ចការថែរក្សា អភិរក្សវត្ថុសិល្បៈ ដែលបានមកពីកំណាយស្រាវជ្រាវនានា ដើម្បីឱ្យពួកគាត់ក្លាយទៅជាធនធានមនុស្ស ជាអ្នកបន្តវេន ថែរក្សា មរតកវប្បធម៌ ដែលបុព្វបុរសបានបន្សល់ទុក៕
​
​
​​