រាជធានី​ភ្នំពេញ ៖ លោក ហេង រតនា អគ្គនាយក​នៃ​មជ្ឈមណ្ឌល​សកម្មភាព​កំចាត់​មីន​កម្ពុជា (CMAC) បាន​ឲ្យ​ដឹង​ថា នៅ​ថ្ងៃ​ចន្ទ ទី​០៤ ខែសីហា ឆ្នាំ​២០២៥ នៅ​ទីតាំង​គ្រាប់បែក MK-84 ស្ថិត​នៅ​ភូមិ​ថ្ម​ដូន ឃុំ​គោក​មក ស្រុក​បន្ទាយ​អំពិល ខេត្តឧត្តរមានជ័យ ក្រុម​ជំនាញ​គ្រាប់បែក​ទម្លាក់​របស់​អង្គភាព​ស៊ី​ម៉ាក់ អង្គការ Golden West និង​អង្គការ NPA (Norwegian People Aid) បាន​ចុះ​ត្រួតពិនិត្យ​បច្ចេកទេស​គ្រាប់បែក​នេះ​ជា​លម្អិត ដោយ​បាន​បញ្ជាក់​ថា គ្រាប់បែក MK-84 នេះ មាន​លេខ Lot No. IMI 96G015-11 និង​ផលិត​ក្នុង​ឆ្នាំ​១៩៩៦ ។

លោក ហេង រតនា បន្ត​ថា ប្រធាន​អង្គការ Golden West ប្រចាំ​កម្ពុជា និង​ជា​អតីត​កងទ័ព​ម៉ា​រី​ន​សហរដ្ឋអាមេរិក​ខាង​ជំនាញ​គ្រាប់​យុទ្ធភណ្ឌ ជា​ជំនាញ​ខាង​គ្រាប់បែក​ទម្លាក់​ពី​យន្តហោះ នៃ​ប្រទេស​ក្នុង​តំបន់​នេះ បាន​ចូលរួម​កំណត់​លក្ខណៈ​បច្ចេកទេស​គ្រាប់បែក MK-84 នេះ ក៏​បាន​បញ្ជាក់​អំពី​អត្តសញ្ញាណ​គ្រាប់បែក MK-84 នេះ​ផលិត​នៅ​ឆ្នាំ​១៩៩៦ និង​អាច​សៀម​ទិញ​ពី​ក្រុមហ៊ុន IMI (Israel Military Industries) របស់​អ៊ី​ស្រា​អ៊ែ​ល បាន​ទទួល​សិទ្ធ​ផលិត​និង​លក់​គ្រាប់បែក​ត្រកូល MK នេះ ។

លោក ហេង រតនា បញ្ជាក់​ថា ៖ «​គ្រាប់បែក MK-84 នេះ ផលិត​ក្នុង​ឆ្នាំ​១៩៩៦ ដូចនេះ វា​មិន​អាច​ជា​គ្រាប់បែក​សំណល់​ពី​ការ​ទម្លាក់​គ្រាប់បែក​ក្នុង​សម័យ​សង្គ្រាម​ឆ្នាំ​១៩៧០-១៩៧៣​កើត​ទេ​។ ខ្ញុំ​មាន​ជំនឿ​យ៉ាង​មុតមាំ​ថា ពិភពលោក​យល់​ច្បាស់​ណាស់​អំពី​រឿង​នេះ​!» ៕