ខេត្តព្រៃវែង ៖ នៅព្រឹកថ្ងៃទី 24 កក្កដា អាជ្ញាធរស្រុកពាមរក៍ សហការជាមួយនឹងកម្លាំងសហគមន៍ពាមមានជ័យ បានចុះបង្ក្រាបបទល្មើសនេសាទប្រភេទរបាំងស្បែមុង នៅចំណុចវាលបឹងធម្មជាតិ ក្បែរព្រំប្រទល់ស្រុកល្វាឯម…
ខេត្តព្រៃវែង ៖ នៅព្រឹកថ្ងៃទី 24 កក្កដា អាជ្ញាធរស្រុកពាមរក៍ សហការជាមួយនឹងកម្លាំងសហគមន៍ពាមមានជ័យ បានចុះបង្ក្រាបបទល្មើសនេសាទប្រភេទរបាំងស្បែមុង នៅចំណុចវាលបឹងធម្មជាតិ ក្បែរព្រំប្រទល់ស្រុកល្វាឯម ខេត្តកណ្ដាល ដោយបានកាត់បំផ្លាញរបាំងស្បៃមុងរាប់រយម៉ែត្រ និងបានចាក់ព្រលែងកូនត្រីចំរុះជាង១តោន ចូលទៅក្នុងបឹងធម្មជាតិវិញ។
លោក ប៉ែត សាវេន អភិបាលរងស្រុកពាមរក៍ បានឲ្យដឹងថា ក្នុងរដូវបិទនេសាទនេះ រូបលោកតែងតែដឹកនាំមន្ត្រីជំនាញ សហការជាមួយនឹងកម្លាំងសហគមន៍ ធ្វើការចុះល្បាតនៅតាមដងទន្លេ ព្រែកបឹងធម្មជាតិក្នុងភូមិសាស្ត្រស្រុកពាមរក៍ ជាប់ជា ប្រចាំ ដើម្បីការពារកុំឲ្យមានជនឆ្លៀតឱកាសលួចធ្វើការនេសាទ ដែលធ្វើឲ្យប៉ះពាល់ទៅដល់ប្រភពធនធានមច្ឆាជាតិរបស់យើង។
ជាក់ស្ដែងនៅព្រឹកថ្ងៃទី 24 កក្កដានេះនៅពេលដែលកម្លាំងរបស់លោក ជិះទូកល្បាតទៅដល់ចំណុចវាលបឹងធម្មជាតិ ក្បែរព្រំប្រទល់ស្រុកល្វាឯម ខេត្តកណ្ដាល ក៏បានប្រទះឃើញរបាំងស្បៃមុងរាប់រយម៉ែត្រ ត្រូវបានអ្នកភូមិលួចដាក់ពង្រាយពេញវាលដើម្បីចាប់ត្រី ទើបរូបលោកនិងមន្ត្រីជំនាញនាំគ្នាធ្វើការបង្ក្រាបភ្លាមៗតែម្ដង។
លោក ប៉ែត សាវេន បានបន្តថា ជាលទ្ធផលក្នុងការបង្ក្រាបនេះ កម្លាំងរបស់លោកបានកាត់បំផ្លាញរបាំងស្បៃមុងបានចំនួន 3780 ម៉ែត្រ ដកបំផ្លាញបង្គោលស្បៃមុំបានចំនួន 630 បង្គោល ដុតបំផ្លាញលូស្បៃមុងបានចំនួន 54 មាត់លូ និងចាក់កូនត្រីចម្រុះព្រលែងចូលទៅក្នុងបឹងធម្មជាតិវិញបានចំនួន 1350 គីឡូ។
លោកអភិបាលរងស្រុកបានបញ្ជាក់ថា ក្នុងពេលដែលកម្លាំងរបស់លោក កំពុងបង្ក្រាបបទល្មើសនេសាទនេះ ក៏មានប្រជាពលរដ្ឋប្រមាណជា 10 គ្រួសារ មានការភ្ញាក់រលឹក ហើយក៏បានចូលខ្លួនមកសុំអាជ្ញាធរ ធ្វើការសារប្រមូលរបាំងស្បៃមុងរបស់ខ្លួនចេញវិញ ហើយសន្យាថា ឈប់លួចដាក់របាំងស្បៃមុងនេះតទៅទៀតហើយ ៕
ចែករំលែកព័តមាននេះ