ខេត្តស្ទឹងត្រែង ៖ ក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៧ ខែកក្កដា ឆ្នាំ២០២៥ បានបើកវគ្គបណ្តុះបណ្តាលអប់រំសមត្ថភាពវិជ្ជាជីវៈ ស្តីពីបទដ្ឋានគតិយុត្ត…
ខេត្តស្ទឹងត្រែង ៖ ក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៧ ខែកក្កដា ឆ្នាំ២០២៥ បានបើកវគ្គបណ្តុះបណ្តាលអប់រំសមត្ថភាពវិជ្ជាជីវៈ ស្តីពីបទដ្ឋានគតិយុត្ត នីតិវិធី និងវិធានបច្ចេកទេសសម្រាប់ការធ្វើអាជីវកម្មថ្នាំកសិកម្ម និងជីកសិកម្មក្នុងខេត្តស្ទឹងត្រែង នៅសាលាខេត្ត ។
លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទ បានបញ្ជាក់ថា ៖ ពាក់ព័ន្ធនឹងការធ្វើអាជីវកម្មលក់ដុំ លក់រាយថ្នាំកសិកម្ម និងជីកសិកម្មគិតមកត្រឹមបច្ចុប្បន្ននេះ ការលក់ដុំ លក់រាយថ្នាំកសិកម្ម និងជីកសិកម្មនៅទូទាំងខេត្តស្ទឹងត្រែង មានចំនួន ១១៨ដេប៉ូ ក្នុងនោះ (ទីតាំងលក់ដុំ លក់រាយថ្នាំកសិកម្ម ចំនួន ៣២ដេប៉ូ និងទីតាំងលក់ដុំ លក់រាយជីកសិកម្ម ចំនួន ៩៥ ដេប៉ូ) ។
លោកប្រធានមន្ទីរកសិកម្ម ក៏បានលើកឡើងថា ៖ អាជីវករកាលពីមុនធ្វើអាជីវកម្មបែបយថាកម្ម អាចនិយាយបានថា ពួកគាត់ពុំមានរូបមន្តផ្សំតាមស្តង់ដារអ្វីនោះទេ តែរហូតមកទល់បច្ចុប្បន្ន ក្នុងសម័យទំនើប ពួកគាត់មានលទ្ធភាពអាចផលិតជីកសិកម្ម ដែលមានគុណភាពយ៉ាងល្អ ដែលអាចជួយដល់កសិករបានយ៉ាងច្រើន។ ហើយតទៅមុខទៀត យើងនឹងរំពឹងថា ការអភិវឌ្ឍន៍ចំពោះកសិកម្មនៅខេត្តស្ទឹងត្រែង នឹងទទួលបានជោគជ័យកាន់តែខ្ពស់ក្នុងការឆ្លើយតបរបស់កសិករទៅកាន់ទីផ្សារ ។
លោកប្រធានមន្ទីរបានឲ្យដឹងថា ក្នុងឆ្នាំ២០២៤នេះ ការងារបង្កបង្កើនផលដំណាំស្រូវសម្រេចបានសរុបចំនួន ២៨.៥៩២ហិកតា ស្មើនឹង១០៣%។ ដំណាំសាកវប្បកម្មអនុវត្តបានសរុបចំនួន ៥.៩៤០ ហិកតា ស្មើនឹង ២១៩% នៃផែនការ។ ដំណាំឧស្សាហកម្មអនុវត្តបានសរុប ៤៤៤.៤៥១,៣៥១.៣ ហិកតាស្មើនឹង ១២១% នៃផែនការ។
ខេត្តស្ទឹងត្រែង បានជួបប្រទះនូវគ្រោះទឹកជំនន់ ដែលធ្វើឲ្យខូចខាតដល់ដំណាំកសិកម្មរបស់ប្រជាពលរដ្ឋចំនួន ១៣៣ហិកតា។ ចំពោះទិន្នផលស្រូវនៅខេត្តស្ទឹងត្រែង គិតជាមធ្យមទទួលបានចំនួន ២,៧៥ តោន/ហិកតា បើប្រៀបធៀបនឹងបណ្តាខេត្តភាគខាងក្រោម គឺខេត្តស្ទឹងត្រែងមានទិន្នផលទាបជាង។ សម្រាប់ទិន្នផលស្រូវ ដែលប្រជាកសិករនៅខេត្តស្ទឹងត្រែងផលិតបាន គឺមានបរិមាណគ្រប់គ្រាន់សម្រាប់តម្រូវការប្រជាជនចំនួន ១៨៣.៤៧៧ នាក់ និងមានតុល្យភាពស្បៀងប្រមាណ ២៦.២៣៧ តោនគិតជាអង្ករ ស្បៀងនៅសល់ចំនួន ១៧.៤០៩ តោន។ ជាមួយគ្នានេះ ខេត្តស្ទឹងត្រែងក៏មានសហគមន៍កសិកម្មចំនួន ៣៩ សហគមន៍ផងដែរ ។
លោកប្រធានមន្ទីរ បានបញ្ជាក់ទៀតថា ខេត្តស្ទឹងត្រែងមានក្រុមហ៊ុនសម្បទានដីសេដ្ឋកិច្ចចំនួន ១៣ ក្រុមហ៊ុន មានផ្ទៃដីសរុបចំនួន ៨១.៣៦៨ ហិកតា កំពុងធ្វើការដាំដុះសរុបចំនួន ២០.១៣០ ហិកតា។ ក្នុងនោះរួមមាន កៅស៊ូ ម៉ៃសាក់ ចេក ស្វាយ ស្វាយចន្ទី និងដំណាំផ្សេងៗមួយចំនួនទៀត។
លោក សរ សុពុត្រា អភិបាលខេត្តស្ទឹងត្រែង មានប្រសាសន៍គាំទ្រយុទ្ធសាស្ត្រនេះ ព្រោះបច្ចុប្បន្នក្រសួងកសិកម្ម បានសម្រេចឲ្យមានមន្ត្រីកសិកម្មប្រចាំនៅតាមឃុំសង្កាត់និមួយៗ ដើម្បីជួយគ្រប់យន្តការក្នុងការធ្វើឲ្យសម្រេចសន្តិសុខស្បៀង ។
លោកក៏បានណែនាំទៅមន្ត្រីក្នុងក្របខ័ណ្ឌប្អូនៗ ដែលជាកាតព្វកិច្ចជាប់ចំណងនិងឯកសណ្ឋាន តួនាទីក្របខ័ណ្ឌរបស់ប្អូនៗ ដូច្នេះសូមឲ្យលោកលោកស្រីមេឃុំចៅសង្កាត់ យកចិត្តទុកដាក់អប់រំតម្រង់ទិសប្អូនៗ ដែលជាមន្ត្រីកសិកម្មឃុំ ឲ្យគាត់រួមចំណែកដើម្បីផ្សព្វផ្សាយ និងវគ្គដែលយើងបានរៀបចំ ដែលប្អូនៗបានឈរនៅលើឆន្ទៈ មនសិកា និងវិជ្ជាជីវៈក្នុងនាមជាអ្នកបម្រើប្រជាពលរដ្ឋដ៏ពិតប្រាកដ ។
លោក គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា បេសកកម្មដ៏ធំនេះ ដើម្បីធ្វើឲ្យសម្រេចទៅបាន ត្រូវមានការចូលរួមពីគ្រប់ភាគីទាំងមន្ត្រីកសិកម្ម អាជ្ញាធរមូលដ្ឋាន អាជីវករ កសិកររួមគ្នាលើកកម្ពស់ផ្នែកសន្តិសុខស្បៀង និងធ្វើឲ្យសម្រេចបានជោគជ័យនៅក្នុងវិស័យកសិកម្មនៅកម្ពុជាយើង ។
លោកបន្តថា នៅក្នុងវិស័យកសិកម្ម នៅពេលដែលយើងនិយាយអំពីការងារកសិកម្ម យើងនិយាយការងារ៣ គឺទីមួយ ធានាឲ្យមានសន្តិសុខស្បៀង បានន័យថា មិនខ្វល់ពេលមានកូវីដ, មិនខ្វល់ថាមានគ្រោះទឹកជំនន់, មិនខ្វល់មានគ្រោះរាំងស្ងួត។ បេសកកម្មធំបំផុត គឺធ្វើឲ្យមានស្បៀងហូបគ្រប់គ្រាន់សម្រាប់ប្រជាពលរដ្ឋ។ ស្បៀងនេះមានហូបគ្រប់គ្រាន់ មិនមែនយើងត្រូវផលិតគ្រប់មុខទាំងអស់ទេ តែយើងផលិតអ្វីដែលជាផលិតផលចម្បងៗ ហើយសម្របសម្រួលឲ្យមានការនាំចូលអ្វីដែលយើងផលិតមិនបាន ឬមិនទាន់ផលិតបាន ដើម្បីធានាឲ្យបងប្អូនក្នុងស្រុកមានស្បៀងអាហារហូបគ្រប់គ្រាន់៕
ចែករំលែកព័តមាននេះ