អតីតតារាសម្តែងអ្នកនាង ដាញ់ ម៉ូនីកា បានចេញមុខអះអាងថា រហូតមកទល់នាពេលនេះ នាងមិនធ្លាប់ទទួលការវះកាត់កែសម្ផស្សសូម្បីតែម្តង បើទោះបីជាពេលកន្លងមក នាងក៏ធ្លាប់មានបំណងចង់ធ្វើការវះកាត់កែសម្ផស្សនោះក៏ដោយ ។ ការលើកឡើងខាងលើពីអតីតតារាស្រីរូបនេះបានធ្វើឡើង…
អតីតតារាសម្តែងអ្នកនាង ដាញ់ ម៉ូនីកា បានចេញមុខអះអាងថា រហូតមកទល់នាពេលនេះ នាងមិនធ្លាប់ទទួលការវះកាត់កែសម្ផស្សសូម្បីតែម្តង បើទោះបីជាពេលកន្លងមក នាងក៏ធ្លាប់មានបំណងចង់ធ្វើការវះកាត់កែសម្ផស្សនោះក៏ដោយ ។
ការលើកឡើងខាងលើពីអតីតតារាស្រីរូបនេះបានធ្វើឡើង បន្ទាប់ពីមានទស្សនិកជនជាច្រើនកំពុងតែផ្ទុះការវែកញែកពីការប្រៀបធៀបទៅលើរូបថតរបស់នាងពីមុន និងរូបបច្ចុប្បន្នដែលមើលទៅទម្រង់មុខគឺខុសប្លែកគ្នាខ្លាំង ដែលនោះនាំឲ្យមានការសន្និដ្ឋានពីការកែសម្ផស្សរបស់នាង ។
ជាមួយនឹងរូបភាពអំឡុងពេលដែលនាងដើរតួក្នុងរឿងទុំទាវ អមជាមួយនឹងរូបភាពនាពេលបច្ចុប្បន្នដែលបង្ហោះលើបណ្តាញសង្គម ដាញ់ ម៉ូនីកា បានភ្ជាប់ជាមួយនឹងសំណេរថា រូបនេះ គេយកវែកញែកគ្នាមួយថា អត់បានកែសម្ផស្សទេ មួយថាកែសម្ផស្សមុខប្លែកជាងមុនហើយឥឡូវ ។
នាងបញ្ជាក់ថា ការថតរឿងទុំទាវ១៦ ឆ្នាំក្នុងឆ្នាំ២០០០ ឥឡូវនេះ ចូលដល់វ័យ៣៩ឆ្នាំជិតចូល៤០ឆ្នាំ២០២៥ហើយ បើឲ្យដូចគ្នាក៏មិនកើតដែរ ។ ចង់ប្រាប់បងប្អូនថា ខ្ញុំមិនបានកែសម្ផស្សអីទេ គ្រាន់តែពីមុនខ្ញុំក្មេងឥឡូវខ្ញុំចាស់ហើយ ហើយបងប្អូនចង់និយាយយ៉ាងម៉េចក៏បានដែរខ្ញុំអត់ខឹងទេ អរគុណបងប្អូនខ្មែរជាទីស្រឡាញ់ទាំងអស់គ្នាដែលនៅតែចងចាំរូបនាងខ្ញុំ។ បន្ថែមពីការបង្ហោះលើសំណេរលើបណ្តាញសង្គមនេះ ដាញ់ ម៉ូនីកា ក៏បានអះអាងបញ្ជាក់តាមរយៈវីដេអូដែលបាន Live ថា តាំងពីឆ្នាំ២០០០ មកដល់ឥឡូវគឺមានរយៈពេល២៥ឆ្នាំហើយ ក្នុងពេលដែលទម្រង់មុខរបស់នាងពីមុនមកដល់ពេលនេះក៏មានភាពប្រែប្រួលដែរ ។
នាងបន្តថា នៅពេលដែលយើងចាស់ទៅ គឺទម្រង់មុខបែបផ្សេងគឺមិនដូចគ្នាទេ ហើយសម្រាប់នាងគឺមិនខ្លាចរឿងការកែសម្ផស្សនោះឡើយ ប្រសិនបើនាងពិតជាបានកែមែន ប៉ុន្តែតាំងពីតូចមកដល់ឥឡូវនាងមិនបានកែសម្ផស្សសូម្បីម្តង ។
នាងបញ្ជាក់ថា កន្លងមក នាងក៏ចង់កែសម្ផស្សដែរព្រោះវាមិនអាក្រក់ទេ ប៉ុន្តែរហូតមកដល់ពេលនេះនាងមិនបានធ្វើវា អញ្ចឹងគ្រាន់តែចង់ប្រាប់បងប្អូនឲ្យបានដឹង ហើយបើនាងកែសម្ផស្សមែនក៏នាងមិនខ្លាចនឹងប្រាប់បងប្អូនដែរ ។
យ៉ាងណា បើតាម ដាញ់ ម៉ូនីកា បច្ចុប្បន្ននេះ នាងគ្រាន់តែប្រើប្រាស់ដោយការញាំខូឡាជេន ដើម្បីការពារកុំឲ្យស្បែកមុខជ្រីវជ្រួញប៉ុណ្ណោះ ព្រោះវ័យកាន់តែចាស់ហេតុនេះស្បែកមុខក៏ប្រែប្រួល អញ្ចឹងនាងគ្រាន់តែរកវិធីការពារកុំស្បែកមុខជ្រីវជ្រួញទៅតាមវ័យតែប៉ុណ្ណោះ ។
ជាការកត់សម្គាល់ អតីតតារាសម្តែងស្រីល្បីឈ្មោះក្នុងរឿង «មរណមាតា» និងរឿង «ទុំទាវ» អ្នកនាង ដាញ់ ម៉ូនីកា បានសម្រេចចិត្តដកខ្លួនពីវិថីសិល្បៈ ដោយចេញទៅរស់នៅលើទឹកដីប្រទេសអូស្ត្រាលីជាមួយនឹងស្វាមី បង្កើតគ្រួសារនៅទីនោះអស់រយៈពេលជាង១០ឆ្នាំមកហើយ ។
បើទោះបីជារស់នៅក្រៅប្រទេសហើយក៏ដោយ ប៉ុន្តែតារាស្រីរូបនេះកំពុងជោគជ័យលើការរកស៊ីលក់គ្រឿងថែសម្រស់របស់ខ្លួន ដោយទទួលការគាំទ្រច្រើនផងដែរ ហើយកន្លងមករូបនាងក៏បានចុះមកស្រុកខ្មែរ ដើម្បីដាក់បង្ហាញផលិតផលរបស់ខ្លួននៅក្នុងផ្សារទំនើបនានាថែមទៀតផង ។
ដាញ់ ម៉ូនីកា ក៏ឧស្សាហ៍នាំស្វាមី និងកូនៗរបស់នាងចុះមកលេងស្រុកខ្មែរ ដើម្បីជួបជុំក្រុមគ្រួសារ ក៏ដូចជាមិត្តភក្តិដែលធ្លាប់រួមអាជីពជាមួយគ្នា ខណះពេលដែលនាងក៏បានទិញផ្ទះវីឡាដ៏ប្រណិតមួយនៅលើទឹកដីកំណើតផងដែរ ៕
ចែករំលែកព័តមាននេះ