មហាជន ជាពិសេស អ្នកលេងបណ្តាញសង្គមកំពុងដាក់ការសង្ស័យថា តារាសម្តែងនាង មាន សូនីតា ទំនងត្រូវបានគូស្នេហ៍បំពាក់ចិញ្ចៀនសុំនាងរៀបការហើយ បន្ទាប់ពីតារាស្រីរូបនេះបានទម្លាយចេញនូវរូបភាពប៉ុន្មានសន្លឹក ដោយបង្ហាញចិញ្ចៀនពេជ្រមួយវង់យ៉ាងស្រស់ស្អាត ។…
មហាជន ជាពិសេស អ្នកលេងបណ្តាញសង្គមកំពុងដាក់ការសង្ស័យថា តារាសម្តែងនាង មាន សូនីតា ទំនងត្រូវបានគូស្នេហ៍បំពាក់ចិញ្ចៀនសុំនាងរៀបការហើយ បន្ទាប់ពីតារាស្រីរូបនេះបានទម្លាយចេញនូវរូបភាពប៉ុន្មានសន្លឹក ដោយបង្ហាញចិញ្ចៀនពេជ្រមួយវង់យ៉ាងស្រស់ស្អាត ។
នៅលើគណនេយ្យហ្វេសប៊ុក តារាសម្តែងដែលមានរហស្សនាមជារាជនីក្រមារូបនេះបានបង្ហោះរូបភាពប៉ុន្មានសន្លឹកដោយនៅក្នុងរូបភាពនោះ ក៏មានការបង្ហាញចិញ្ចៀនពេជ្រមួយវង់ពាក់នៅនឹងដៃ និងរូបភាព បុរសរូបសង្ហារម្នាក់ឈរឱបនាងពីក្រោយ ដោយមានបាច់ផ្កាជាប់នឹងដៃផងដែរ ។
ជាមួយនឹងរូបភាពនោះ មាន សូនីតា ក៏បានភ្ជាប់ជាមួយនឹងសំណេរដ៏ខ្លីនឹងមានន័យថា អរគុណសម្រាប់គ្រប់យ៉ាង ដែលនោះមានន័យថា ទំនងជាគូស្នេហ៍របស់នាងសុំនាងរៀបការទៅតាមបំណងរបស់នាង ក្រោយពីអ្នកទាំងពីរមានទំនាក់ទំនងជាមួយអស់ពេលជាច្រើនឆ្នាំមកនេះ ។
យ៉ាងណា គេនៅមិនទាន់ប្រាកដទេថា រឿងរ៉ាវខាងលើនេះ វាជាការពិត ឬយ៉ាងណា ដោយសារគេនៅមិនទាន់ឃើញមានការចេញមុខបញ្ជាក់អះអាងពីតារាសម្តែងនាង មាន សូនីតា នៅឡើយទេ ប៉ុន្តែក្រោយការបង្ហោះរូបភាពទាំងអស់នេះ គេឃើញមានអ្នកគាំទ្រ ជាពិសេស មិត្តភក្តិក្នុងចង្កោមសិល្បៈដូចគ្នា បានចូលទៅខមមិន ដោយម្នាក់សម្តែងការអបអរសាទរចំពោះរូបនាង ។
ជាការកត់សម្គាល់ កន្លងមក មាន សូនីតា ធ្លាប់បានអះអាងថា នាងអាចនឹងចូលរោងការនៅបំណាច់ឆ្នាំ២០២៣ បន្ទាប់ពីគោលបំណងសំខាន់ៗរបស់នាងបានសម្រេចជោគ
ជ័យ ។
គោលបំណងរបស់នាងនោះ គឺការបានដើរលេងកំសាន្តតាមបណ្តាលប្រទេសធំៗមួយចំនួន ជាពិសេសតំបន់អឺរ៉ុប និងអាមេរិក ហេតុនេះ ជារឿយៗគេតែងតែឃើញនាងចំណាយពេលវេលាច្រើនកម្សាន្តនៅតាមទីកន្លែងនានាមិនថា ក្នុងស្រុកឬក្រៅស្រុកនោះឡើយ ។
ទន្ទឹមគ្នានោះ មាន សូនីតា ក៏ធ្លាប់សារភាពថា នាងពិតជាគូស្នេហ៍រួចហើយ ប៉ុន្តែរហូតមកទល់នាពេលនេះ នាងមិនដែលបើកបង្ហាញពីមុខមាត់ពិតរបស់គូស្នេហ៍របស់នាងឡើយ ដោយនាងនៅតែបន្តលាក់មុខគូស្នេហ៍ជាអាថ៌កំបាំងដដែល ។
យ៉ាងណា គោលដៅចូលរោងការនៅបំណាច់ឆ្នាំ២០២៣នោះ នៅមិនទាន់លិចចេញជារូបរាងនៅឡើយទេ ដោយតារាស្រីរូបនេះនៅតែបន្តរស់នៅបែបជីវិតឯករាជ្យដដែល ខណៈពេលដែលដំណឹងចូលរោងការជាថ្មីនោះ ក៏នាងមិនទាន់បានបង្ហើបឲ្យដឹងនោះដែរ ។
ទោះជាយ៉ាងណា នាពេលនេះ មហាជន ជាពិសេស បណ្តាអ្នកគាំទ្ររូបនាងជាច្រើនពិតជាចង់ឃើញ មាន សូនីតា ចូលរោងការឆាប់ៗនេះ ដោយសារបំណងប្រាថ្នារបស់នាងបានសម្រេចជាបន្តបន្ទាប់រួចហើយ ស្របពេលមកទល់នាពេលនេះនាងក៏មានវ័យកាន់តែជ្រេបន្តិចហើយដែរ ៕
ចែករំលែកព័តមាននេះ