សង្គ្រាមអ៊ុយក្រែន ៖ ក្រុងវ៉ាស៊ីនតោន ប្រកាសកាលពីថ្ងៃទី១ កក្កដា ផ្អាកការផ្ដល់ជំនួយយោធាមួយផ្នែកដល់អ៊ុយក្រែន ដោយលើកឡើងពីការថែរក្សាបរិមាណនៃការស្តុកគ្រឿងសព្វាវុធរបស់ខ្លួន។ ការផ្អាកនោះ ប្រកាសឡើងពេលដែលរុស្ស៊ី កំពុងតែបង្កើនការវាយប្រហារលើដែនដីអ៊ុយក្រែន។…
សង្គ្រាមអ៊ុយក្រែន ៖ ក្រុងវ៉ាស៊ីនតោន ប្រកាសកាលពីថ្ងៃទី១ កក្កដា ផ្អាកការផ្ដល់ជំនួយយោធាមួយផ្នែកដល់អ៊ុយក្រែន ដោយលើកឡើងពីការថែរក្សាបរិមាណនៃការស្តុកគ្រឿងសព្វាវុធរបស់ខ្លួន។ ការផ្អាកនោះ ប្រកាសឡើងពេលដែលរុស្ស៊ី កំពុងតែបង្កើនការវាយប្រហារលើដែនដីអ៊ុយក្រែន។
អ្នកនាំពាក្យរងសេតវិមានលោកស្រីអានណាកែលលី ដែលអះអាងពីព័ត៌មាននោះថ្លែងថា សេចក្ដីសម្រេចនេះត្រូវបានធ្វើដើម្បីជាការគិតគូរដំបូងគេដល់ផលប្រយោជន៍អាមេរិក។ លោកស្រីមិនបានផ្ដល់ភាពលម្អិតជាងនេះទេ តែបើតាមបណ្ដាសារព័ត៌មានអាមេរិកថា មកពីការព្រួយបារម្ភរបស់មន្ទីរប៉ង់តាហ្គោន លើគ្រឿងសព្វាវុធក្នុងស្តុក ព្រោះតែការដកយកដោយផ្ទាល់សម្រាប់ជំនួយអាវុធដល់អ៊ុយក្រែន។ ការផ្អាកផ្ដល់អាវុធដល់អ៊ុយក្រែនទាក់ទិនដល់មីសីុលការពារអាកាសនិងគ្រាប់ផ្លោង។
ការផ្អាកផ្ដល់អាវុធអាមេរិកដល់អ៊ុយក្រែន ប្រកាសឡើង ពេលដែលប្រទេសនេះកំពុងតែប្រឈមមុខ នឹងការបង្កើនការវាយប្រហារតាមអាកាសរបស់រុស្សុីកាន់តែខ្លាំង។ ចំនួនដ្រូនរយៈឆ្ងាយរបស់រុស្ស៊ី បញ្ជូនទៅវាយប្រហារអ៊ុយក្រែន មានការកើនឡើងដល់៣៦,៨%ក្នុងខែមិថុនា។
និយាយពីសង្គ្រាមដ្រូនកាលពីថ្ងៃទី១កក្កដាអ៊ុយក្រែនបានបញ្ជូនដ្រូនរយៈឆ្ងាយ១គ្រឿង វាយប្រហាររោងចក្ររុស្ស៊ី មួយ ដែលស្ថិតនៅចម្ងាយដល់១៣០០គីឡូម៉ែត្រ។ ការវាយប្រហារនេះធ្វើឡើងបន្ទាប់ពីប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី បានផ្ដល់អាទិភាពដល់ការផលិតដ្រូនវាយប្រហារ ហើយរុស្ស៊ី បង្កើនការវាយប្រហារដោយដ្រូន ក្នុងចំនួនច្រើនកាលពីខែមិថុនា។ ក្នុងខែមិថុនានោះរុស្ស៊ី បានបញ្ចេញដ្រូនដល់ទៅ៥៤៣៨គ្រឿងមកវាយប្រហារអ៊ុយក្រែនដែលនោះជាចំនួនដ្រូនដ៏ច្រើនបំផុតក្នុងពេលតែមួយខែ។
តាមអ្នកទទួលខុសត្រូវនៃភ្នាក់ងារសន្តិសុខអ៊ុយក្រែនម្នាក់ថា ដ្រូនមួយគ្រឿងបានវាយប្រហាររោងចក្រអេឡិចត្រូម៉ាញ៉េទិករុស្ស៊ី មួយនៅគូប៉ុល ដែលរោងចក្រនេះផលិតប្រព័ន្ធការពារអាកាសនិងដ្រូនសម្រាប់កងទ័ពរុស្ស៊ី ។ ការវាយប្រហារនេះបណ្ដាលឲ្យមានការប៉ះពាល់ដល់បណ្ដាអគាររោងចក្រ ហើយមនុស្ស៣នាក់ស្លាប់និង៣៥នាក់ទៀតរងរបួស។ អ៊ុយក្រែនចាប់តាំងពីច្រើនខែមកហើយ បានប្រើដ្រូនរយៈឆ្ងាយផលិតក្នុងស្រុក ដើម្បីវាយប្រហារបណ្ដារោងចក្រ បណ្ដាទីតាំងស្តុកនិងទីតាំងភស្ដុភារ ស្ថិតនៅជ្រៅក្នុងដែនដីរុស្ស៊ី ៕
ចែករំលែកព័តមាននេះ