រាជធានីភ្នំពេញ ៖ សិស្សសាលាអន្តរជាតិសិង្ហបុរី ចំនួន១៥០នាក់ បានចូលរួមអបអរសាទរខួបលើកទី៣នៃការបញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក កាលពីថ្ងៃទី៧ កក្កដា ដោយឈរកាន់ទង់ជាតិគ្រវីគ្រប់គ្នា ទូងស្គរ និងច្រៀងបទពង្សាវតារខ្មែរនៅខាងក្រៅសាលា។
លោកស្រីងឿង ផល្លីន ពោធីតា នាយិកាសាលាអន្តរជាតិសិង្ហបុរី បានថ្លែងថា សាលារបស់លោកស្រីរៀបចំអបអរសាទរខួបលើកទី៣នេះ គឺដើម្បីថ្លែងអំណរគុណដល់អង្គការយូណេស្កូ និងគណៈកម្មាធិការបេតិកភណ្ឌពិភពលោក ដែលបានបញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោក។ ជាមួយនេះ ដើម្បីថ្លែងអំណរគុណដល់រាជរដ្ឋាភិបាលក្រោមការដឹកនាំដ៏ភ្លឺស្វាង របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានខិតខំប្រឹងប្រែងពុះពារសុំបញ្ចូលប្រាសាទព្រះវិហារជាបេតិកភណ្ឌពិភពលោក និងដើម្បីថ្លែងអំណរគុណដល់បងៗកងទ័ពដែលបានខិតខំធ្វើពលិកម្មគ្រប់បែបយ៉ាង ដើម្បីការពារប្រាសាទព្រះវិហារ បាននៅគង់វង្សជាមរតករបស់ជាតិខ្មែរ តកូន តចៅ ប្រឆាំងនឹងការរំលោភឈ្លានពានម្តងហើយម្តងទៀតពីកងទ័ពថៃ។
ប្រាសាទព្រះវិហារត្រូវបានកសាងដោយព្រះមហាក្សត្រជាបុព្វបុរសខ្មែរចាប់តាំងពីសតវត្សទី៩មក ហើយតាមរយៈក្បូរក្បាច់រចនាដ៏រស់រវើក ជាការបង្ហាញឱ្យឃើញពីថ្វីដៃ ការប៉ិនប្រសប់ អំណត់ព្យាយាមរបស់បុព្វបុរសខ្មែរនៅសម័យនោះ។ ឆ្លងកាត់រយៈពេលដ៏យូរអង្វែង ធាតុអាកាសក្តៅត្រជាក់ និងសង្គ្រាមឥតឈប់ឈរ ប្រាង្គប្រាសាទព្រះវិហារ ត្រូវបាក់បែកខូចខាតគួរឱ្យសោកស្តាយ មិនតែប៉ុណ្ណោះនៅឆ្នាំ១៩៥៤ ប្រាសាទព្រះវិហារត្រូវកងទ័ពឈ្លានពានសៀមចូលមកទន្ទ្រានកាន់កាប់ ប៉ុន្តែក៏បានវិលត្រឡប់មកជាសម្បត្តិមាតុភូមិកម្ពុជាយើងវិញ តាមរយៈសាលាដីការបស់តុលាការអន្តរជាតិក្រុងឡាអេ ថ្ងៃទី១៥ មិថុនា ឆ្នាំ១៩៦២។
ដោយមើលឃើញពីតម្លៃ និងការភ័យព្រួយដល់ប្រាសាទព្រះវិហារ ទើបរាជរដ្ឋាភិបាលក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោហ៊ុន សែន បានខំតស៊ូពុះពារសុំបញ្ចូលប្រាសាទព្រះវិហារជាសម្បត្តិបេតិកភណ្ឌពិភពលោកទាល់តែបានសម្រេចនៅថ្ងៃទី៧ កក្កដា ឆ្នាំ២០០៨ ក្នុងសម័យប្រជុំនៅទីក្រុងកេបិច ប្រទេសកាណាដា ៕
ចែករំលែកព័តមាននេះ