ប្រសិនបើប្រេងឥន្ធនៈអស់ស្តុកចាស់នោះ តម្លៃប្រេងឥន្ធនៈថ្មីដែលក្រសួងពាណិជ្ជកម្ម និង ក្រសួងរ៉ែ ពនិងថាមពល ប្រកាសសម្រាប់ថ្ងៃទី២១ ខែមិថុនា ខាងមុខអាចឡើងហើយ ពីព្រោះ តម្លៃប្រេងឆៅនៅលើទីផ្សារពិភពលោកបានកំពុងឡើងថ្លៃគួរសមដោយសារតែសង្គ្រាមអ៊ីស្រាអែល…
ប្រសិនបើប្រេងឥន្ធនៈអស់ស្តុកចាស់នោះ តម្លៃប្រេងឥន្ធនៈថ្មីដែលក្រសួងពាណិជ្ជកម្ម និង ក្រសួងរ៉ែ ពនិងថាមពល ប្រកាសសម្រាប់ថ្ងៃទី២១ ខែមិថុនា ខាងមុខអាចឡើងហើយ ពីព្រោះ តម្លៃប្រេងឆៅនៅលើទីផ្សារពិភពលោកបានកំពុងឡើងថ្លៃគួរសមដោយសារតែសង្គ្រាមអ៊ីស្រាអែល និងអ៊ីរ៉ង់ ។
នៅពេលនេះ ប្រេងម៉ាស៊ូតនៅកម្ពុជា មួយលីត្រថ្លៃ៣.៥៥០រៀល ប្រេងសាំងធម្មតា គឺ៣.៧៥០រៀល ហើយប្រេងស៊ុបពែ គឺ៤.៤០០រៀល ។ តម្លៃប្រេងឥន្ធនៈនេះនឹងអស់សុពលភាព នៅថ្ងៃទី២០ ខែមិថុនា ខាងមុខ ។
អ្នកវិភាគមួយរូបបានលើកឡើងថា បើតាមនិទស្សន៍នៃតម្លៃប្រេងឆៅនៅលើទីផ្សារពិភព លោកដែលវាកញ្ជ្រោលឡើងក្រោយពេលដែលអ៊ីស្រាអែល និងអ៊ីរ៉ង់ បានផ្ទុះសង្គ្រាមតាមអាកាសតម្លៃប្រេងដែលចម្រាញ់ ហើយរួចនាំចូលមកកាន់កម្ពុជាវាអាចឡើងដល់ប្រមាណជា ៤០០០រៀល នៅក្នុងមួយលីត្រ ។
អ្នកវិភាគរូបនោះបានលើកឡើងថា នៅមុនពេលដែលសង្គ្រាមរវាងអ៊ីស្រាអែល និងអ៊ីរ៉ង់ ផ្ទុះឡើងតម្លៃប្រេងឆៅនៅលើទីផ្សារអន្តរជាតិ គឺនៅក្នុងរង្វង់ត្រឹមតែ៦៥ដុល្លារទៅ៦៨ដុល្លារទេនៅក្នុងមួយបារ៉ែល ប៉ុន្តែឥឡូវតម្លៃប្រេងឆៅវាឡើងដល់ទៅលើសពី៧០ដុល្លារទៅហើយ នៅក្នុងមួយបារ៉ែល ។
តាមសេចក្តីរាយការណ៍របស់អេភី បានឲ្យដឹងថា មកដល់ថ្ងៃទី១៨ ខែមិថុនា តម្លៃប្រេងឆៅ នៅលើទីផ្សារអន្តរជាតិ បានឡើងដល់៧៦,៧០ដុល្លារ នៅក្នុងមួយបារ៉ែល ដែលជាតម្លៃខ្ពស់បំផុតចាប់តាំងពីខែកុម្ភៈមក ។
សង្គ្រាមអ៊ីស្រាអែល និងអ៊ីរ៉ង់ បានរីករាលដាលចូលថ្ងៃទី៧ ហើយពេលនេះដោយភាគីទាំងពីរ បានបានវាយប្រហារតាមផ្លូវអាកាសទៅវិញទៅមកយ៉ាងចាស់ដៃ ខណៈដែលការខូចខាត និងការបាត់បង់អាយុជីវិត គឺមានទាំងសងខាង ។ ប៉ុន្តែតម្លៃនៃការ ខូចខាតនៅមិនត្រូវបានគេគណនាបាននៅឡើយទេ ។ មកដល់ពេលនេះកម្ពុជានៅតែបន្តពឹងផ្អែកលើការនាំចូល ប្រេងឥន្ធនៈនៅឡើយ ។
តាមរបាយការណ៍របស់ក្រសួងពាណិជ្ជកម្ម បានឲ្យដឹងថា ៥ខែកន្លងមកនេះ កម្ពុជាបាននាំចូលប្រេងឥន្ធនៈរួមទាំងហ្គាសសរុប១.០៤៥ លានដុល្លារធ្លាក់ចុះ១៣ភាគរយធៀបនឹងកាលពី៥ខែឆ្នាំមុនដែលមានតម្លៃសរុបប្រមាណជា ១.២០២ លានដុល្លារ ។
ប្រភពដដែលបានបន្តថា កម្ពុជាបាននាំចូលម៉ាស៊ូតសរុប៥៧១ លានដុល្លារ ធ្លាក់ចុះ ១១ភាគរយ ប្រេងសាំងគឺ៣៣៥លានដុល្លារ ធ្លាក់ចុះ ២១ភាគរយ និងហ្គាស១៣៩លានដុល្លារកើនឡើង១,៦ ភាគរយ ។ ជាទូទៅនៅក្នុងមួយឆ្នាំកម្ពុជាអាចត្រូវការនាំចូលប្រេង និងហ្គាសសរុបប្រមាណជា ២,៨ លានតោន ៕
ចែករំលែកព័តមាននេះ