រាជធានីភ្នំពេញ ៖ ក្លិបអ្នកកាសែតកម្ពុជា និងសមាគមអ្នកកាសែតថៃ នៅយប់ថ្ងៃទី២៨ ខែឧសភានេះ បានចេញសេចក្តីថ្លែងការណ៍រួម អំពាវនាវដល់ប្រព័ន្ធផ្សព្វផ្សាយប្រទេសទាំងពីរ មិនគួរផ្សព្វផ្សាយព័ត៌មាន ដែលគ្មានប្រភពច្បាស់លាស់…
រាជធានីភ្នំពេញ ៖ ក្លិបអ្នកកាសែតកម្ពុជា និងសមាគមអ្នកកាសែតថៃ នៅយប់ថ្ងៃទី២៨ ខែឧសភានេះ បានចេញសេចក្តីថ្លែងការណ៍រួម អំពាវនាវដល់ប្រព័ន្ធផ្សព្វផ្សាយប្រទេសទាំងពីរ មិនគួរផ្សព្វផ្សាយព័ត៌មាន ដែលគ្មានប្រភពច្បាស់លាស់ ឬព័ត៌មិនពិតទាក់ទងនឹងស្ថានភាពនៅតាមខ្សែបន្ទាត់ព្រំដែន ។
ក្នុងសេចក្តីថ្លែងការណ៍រួម ក្លិបអ្នកកាសែតកម្ពុជា (ក.អ.ក) និងសមាគមអ្នកកាសែតថៃ (ស.អ.ថ) បានសង្កេតឃើញថា នាពេលថ្មីៗនេះ ប្រព័ន្ធផ្សព្វផ្សាយមួយចំនួន ជាពិសេសអ្នកប្រើប្រាស់បណ្តាញ សង្គមបានផលិត ផ្សព្វផ្សាយ និងចែកចាយព័ត៌ដែលមិនមានប្រភពច្បាស់លាស់អំពីស្ថាន ភាពទូទៅនៅតាមតំបន់ព្រំដែនកម្ពុជា-ថៃ ដែលនាំឲ្យមានការភាន់ច្រឡំ ហើយព័ត៌មានទាំ នោះបានរីករាលដាលយ៉ាងច្រើននៅក្នុងប្រទេសទាំងពីរ ។
ក្លិបអ្នកកាសែតកម្ពុជា និងសមាគមអ្នកកាសែតថៃ មានការព្រួយបារម្ភអំពីការបន្តផ្សព្វផ្សាយ ដែលអាចនឹងជំរុញឱ្យកើត ភាពចម្រុងចម្រះផ្នែកព័ត៌មានកាន់តែធំរវាងប្រទេសទាំងពីរ។ ក្នុងកិច្ចខិតខំប្រឹងប្រែងដើម្បី ស្វែងរកដំណោះស្រាយ ថ្នាក់ដឹកនាំនៃក្លិបអ្នកកាសែតកម្ពុជា និងសមាគមអ្នកកាសែតថៃ បានបើកកិច្ចប្រជុំអនឡាញជា បន្ទាន់មួយ នៅថ្ងៃទី២៨ ខែឧសភា ឆ្នាំ២០២៥ ដើម្បីពិភាក្សាទាក់ទងនឹងការផ្សាយ ព័ត៌មានពីស្ថានការណ៍ទូទៅនៅតាមខ្សែបន្ទាត់ព្រំដែនកម្ពុជា-ថៃ និងមានសំណូមពរមួយ ចំនួនដូចខាងក្រោម៖
១. សូមអំពាវនាវដល់ប្រព័ន្ធផ្សព្វផ្សាយនៅក្នុងប្រទេសទាំងពីរគួរមានការប្រុងប្រយ័ត្ន ហើយមិនគួរផ្សព្វផ្សាយព័ត៌មានដែលគ្មានប្រភពច្បាស់លាស់ ឬព័ត៌មិនពិតទាក់ទងនឹង ស្ថានភាពនៅតាមខ្សែបន្ទាត់ព្រំដែនរវាងប្រទេសទាំង២ ដើម្បីកេងយកប្រយោជន៍នោះឡើយ។
២. ក្លិបអ្នកកាសែតកម្ពុជា និងសមាគមអ្នកកាសែតថៃ ក៏សូមអំពាវនាវដល់អ្នកប្រើប្រាស់ប្រព័ន្ធផ្សព្វផ្សាយសង្គមនៅក្នុងប្រទេសទាំងពីរ មុនពេលចែករំលែកព័ត៌មានទាក់ទងនឹងស្ថានភាពនៅតាមខ្សែបន្ទាត់ព្រំដែនកម្ពុជា-ថៃ មេត្តាពិចារណាអំពីផលវិបាកដែលអាចកើតមានដោយសារតែការចែកចាយ ព័ត៌មាននោះ។
ក្លិបអ្នកកាសែតកម្ពុជា និងសមាគមអ្នកកាសែតថៃ សង្ឃឹមថា បញ្ហាមួយចំនួនដែលកំពុងកើតមាននៅតាមខ្សែបន្ទាត់ព្រំដែននឹងត្រូវបានដោះស្រាយដោយសន្តិវិធីរវាងរាជរដ្ឋាភិបាលនៃប្រទេសទាំងពីរ ដើម្បីទប់ស្កាត់ការបង្កផលប៉ះពាល់ដល់ទំនាក់ទំនងដ៏យូរអង្វែងរវាងប្រជាពលរដ្ឋ និងប្រទេសទាំងពីរ៕
ចែករំលែកព័តមាននេះ