ទីក្រុងប៊ែឡាំង៖ ប្រមុខដឹកនាំអ៊ុយក្រែន លោកហ្សេឡិនស្គី បានធ្វើដំណើរទៅដល់ប្រទេសអាល្លឺម៉ង់ហើយដើម្បីពិភាក្សាការងារ១ចំនួនជាមួយអធិការបតីអាល្លឺម៉ង់ លោកហ្វ្រីតរីច មើស (Friedrich Merz)។ នេះជាផ្នែក១នៃកិច្ចខិតខំប្រឹងប្រែងរបស់អ៊ុយក្រែនដើម្បីស្វះស្វែងរកការគាំទ្របន្ថែមទៀត។ គេរំពឹងថាថ្នាក់ដឹកនាំទាំង២នឹងពិគ្រោះគ្នាអំពីការផ្ដល់ជំនួយយោធារបស់អាល្លឺម៉ង់…
ទីក្រុងប៊ែឡាំង៖ ប្រមុខដឹកនាំអ៊ុយក្រែន លោកហ្សេឡិនស្គី បានធ្វើដំណើរទៅដល់ប្រទេសអាល្លឺម៉ង់ហើយដើម្បីពិភាក្សាការងារ១ចំនួនជាមួយអធិការបតីអាល្លឺម៉ង់ លោកហ្វ្រីតរីច មើស (Friedrich Merz)។ នេះជាផ្នែក១នៃកិច្ចខិតខំប្រឹងប្រែងរបស់អ៊ុយក្រែនដើម្បីស្វះស្វែងរកការគាំទ្របន្ថែមទៀត។ គេរំពឹងថាថ្នាក់ដឹកនាំទាំង២នឹងពិគ្រោះគ្នាអំពីការផ្ដល់ជំនួយយោធារបស់អាល្លឺម៉ង់ និងការជួយជ្រោមជ្រែងឱ្យមានបទឈប់បាញ់។ នេះបើយោងតាមអ្នកនាំពាក្យរដ្ឋាភិបាលអាល្លឺម៉ង់ប្រាប់ឱ្យដឹង។
ក្រៅពីជួបអធិការបតីអាល្លឺម៉ង់ លោកហ្សេឡិនស្គីក៏គ្រោងជួបប្រធានាធិបតីអាល្លឺម៉ង់ លោកស្ទែនម៉ៃអឺ ផងដែរ (Steinmeier)។ ទស្សនកិច្ចនេះធ្វើឡើងចំពេលមានពាក្យចចាមអារ៉ាមថាអាល្លឺម៉ង់ក្រោមការដឹកនាំរបស់លោកមើសខុសពីជំនាន់លោកសូល។ លោកមើសអាចនឹងបញ្ជូនគ្រាប់មីស៊ីលម៉ាកថូរ៉ូស(Taurus)ទៅឱ្យអ៊ុយក្រែនដើម្បីសាកកម្លាំងគ្នាជាមួយរុស្ស៊ី។ នេះជាប្រភេទមីស៊ីលបណ្ដែត ឬគ្រូស (cruise) ដែលវាយប្រហារចំគោលដៅបានល្អនៅក្នុងរង្វង់ប្រតិបត្តិការចម្ងាយ៥រយគីឡូម៉ែត្រ។
អ៊ុយក្រែនធ្លាប់បានស្នើសុំគ្រាប់មីស៊ីលនេះជាយូរមកហើយដើម្បីវាយប្រហារចូលជ្រៅៗទៅក្នុងទឹកដីរុស្ស៊ី។ ប៉ុន្តែលោកសូលមិនហ៊ានប្រគល់ឱ្យអ៊ុយក្រែនទេព្រោះខ្លាចរុស្ស៊ីសងសឹក។ សងសឹកនៅត្រង់ចំណុចនេះចង់មានន័យថារុស្ស៊ីអាចនឹងវាយបកវិញមិនត្រឹមតែអ៊ុយក្រែនប៉ុណ្ណោះទេ ប៉ុន្តែអាចបាញ់ចូលទឹកដីអាល្លឺម៉ង់តែម្ដង។ សូម្បីតែជំនាន់លោកមើសក៏លោកមិនទាន់បង្ហាញសញ្ញាភ្លើងខៀវជាចំហនៅឡើយទេ។ មីស៊ីលម៉ាកថូរ៉ូសនៅតែជាបញ្ហាដ៏ចម្រូងចម្រាសដែលគណបក្សនៅក្នុងរដ្ឋាភិបាលចម្រុះជាមួយគ្នាមិនទាន់ឯកភាពទេ។
បញ្ហានេះមានលក្ខណៈស្មុគស្មាញបន្តិចព្រោះមិនដឹងថាតើអាល្លឺម៉ង់នឹងគិតយ៉ាងដូចម្ដេចទៀត។ លោកមើសទើបតែប្រកាសកាលពីប៉ុន្មានថ្ងៃមុននេះថាអាល្លឺម៉ង់ និងក្រុមប្រទេសជាដៃគូមួយចំនួនទៀតសម្រេចចិត្តលុបចោលវិញហើយនូវការដាក់កំហិតលើការបញ្ជូនអាវុធទៅឱ្យអ៊ុយក្រែន។ មានន័យថាអាចបញ្ជូនគ្រឿងសព្វាវុធគ្រប់ម៉ាក គ្រប់ធុនដោយគ្មានបញ្ហា។
កាលពីដើមខែឧសភា អាល្លឺម៉ង់ប្រកាសថាចាប់ពីពេលនេះតទៅខ្លួនលែងផ្សព្វផ្សាយជាសាធារណៈតទៅទៀតហើយនូវអាវុធដែលខ្លួនបញ្ជូនទៅឱ្យអ៊ុយក្រែន។ មានន័យថាបើទុកជាអាល្លឺម៉ង់បញ្ជូនមីស៊ីលថូរ៉ូសទៅឱ្យអ៊ុយក្រែនក៏គ្មាននរណាដឹងដែរ។ កន្លងមក អ៊ុយក្រែនទទួលបានមីស៊ីលរបស់អាមេរិក អង់គ្លេស និងបារាំងដូចជាម៉ាកអាត់តាខំ (ATACMS) និងស្តំសេដូ (Storm Shadow)ជាដើម។
ប៉ុន្តែពួកគេសុទ្ធតែផ្ដាំទុកមុនថាអនុញ្ញាតឱ្យបាញ់ទៅលើមូលដ្ឋានកងទ័ពរុស្ស៊ីនៅលើទឹកដីអ៊ុយក្រែនតែប៉ុណ្ណោះ។ បៃដិនរហូតដល់ជិតផុតអាណត្តិទៅហើយទើបលោកបើកដៃឱ្យអ៊ុយក្រែនបាញ់មីស៊ីលចូលទឹកដីរុស្ស៊ី។ ម៉្យាងទៀត ទោះបីលោកបើកដៃឱ្យបាញ់ក៏ដោយ ក៏អ៊ុយក្រែនមិនប្រាកដជាមានគ្រាប់មីស៊ីលនេះច្រើនគ្រប់គ្រាន់សម្រាប់បាញ់ដោយសេរីនោះឡើយ។
អាល្លឺម៉ង់ជាអ្នកផ្គត់ផ្គង់អាវុធច្រើនជាងគេនៅក្នុងចំណោមសម្ព័ន្ធមិត្តនៅទ្វីបអឺរ៉ុប។ ពេលនេះរឹតតែសំខាន់ខ្លាំងជាងមុនទៅទៀតនៅពេលទីក្រុងវ៉ាស៊ីនតោនមិនសូវជួយអ៊ុយក្រែនឱ្យបានពេញដៃពេញជើងទេនៅក្នុងសករាជរបស់លោកត្រាំ។ លោកមើសនិយាយជារឿយៗថាទ្វីបអឺរ៉ុបគួររួមគ្នាចាត់ការរុស្ស៊ីឱ្យបានខ្លាំងក្លាបន្តិច។ លោកសន្យាថានឹងដាក់ទណ្ឌកម្មបន្ថែមទៀត
បើរុស្ស៊ីមិនព្រមទទួលយកបទឈប់បាញ់។ ខាងលើនេះជាការដកស្រង់ប្រភពពីកៀវ អីនឌីផឹនដឹន (Kyiv Independent)៕
ចែករំលែកព័តមាននេះ