រយៈពេល៥ខែ ឆ្នាំនេះ ក្រសួងរកឃើញ ព័ត៌មានក្លែងក្លាយ សរុប ១,៣៩៩ករណី
រាជធានីភ្នំពេញ ៖ លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានបញ្ជាក់ថាចំនួនព័ត៌មានក្លែងក្លាយ ក្នុងរយៈពេល ៥ខែ…
រាជធានីភ្នំពេញ ៖ លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានបញ្ជាក់ថាចំនួនព័ត៌មានក្លែងក្លាយ ក្នុងរយៈពេល ៥ខែ ឆ្នាំ២០២៥នេះ គណៈកម្មការប្រឆាំងព័ត៌មានក្លែងក្លាយ នៃក្រសួងព័ត៌មាន បានកត់ត្រាទុក ព័ត៌មានក្លែងក្លាយ ចំនួន ១,៣៩៩ករណី ។
លោក ទេព អស្នារិទ្ធ បានមានប្រសាសន៍នៅថ្ងៃទី២៨ ខែឧសភា ឆ្នាំ២០២៥ថា ការកើនឡើង នៃព័ត៌មានក្លែងក្លាយ ស្របពេល ដែលការប្រើប្រាស់តាមបណ្ដាញសង្គមហ្វេសប៊ុក ទីកតុក តេឡេក្រាម អ៊ីនស្តាក្រាម ជាពិសេស ការប្រើបច្ចេកវិទ្យាទំនើប និងបញ្ញាសិប្បនិម្មិត មានសន្ទុះកើនឡើងកាន់តែខ្លាំងឡើង នៅក្នុងប្រទេសកម្ពុជា ក៏ដូចជាលើសកលលោក ។
លោកបានលើកឡើងថា ដូច្នេះ ដើម្បីទប់ស្កាត់ពត៌មានក្លែងក្លាយ កុំឱ្យបង្កគ្រោះថ្នាក់ដល់ប្រជាពលរដ្ឋ ដល់សង្គម ជាពិសេសដល់យុវវ័យ ដែលកម្ពុជាមានយុវវ័យចំនួនប្រមាណ ៦៦ភាគរយ នៃចំនួនប្រជាជនសរុប យុទ្ធនាការនិយាយថា ទេ! ចំពោះព័ត៌មានក្លែងក្លាយ បានចុះទៅផ្សព្វផ្សាយដោយផ្ទាល់ដល់សិស្សានុសិស្សតាមសាលារៀន តាមសហគមន៍ និងនៅតាមភូមិ ឃុំបងប្អូនប្រជាពលរដ្ឋទាំងអស់ ដែលរស់នៅក្នុងមូលដ្ឋានរាជធានី-ខេត្ត ។
អ្នកនាំពាក្យរូបនេះ បានបន្ដថា យុទ្ធនាការជំរុញឱ្យមានការចូលរួមខ្លាំងក្លាពីសាធារណជន តាមរយៈលើកកម្ពស់ការផ្សព្វផ្សាយតែព័ត៌មានពិត មានក្រមសីលធម៌វិជ្ជាជីវៈ មានប្រភពព័ត៌មានច្បាស់លាស់ មានភាពត្រឹមត្រូវអាចទុកចិត្តបាន ជាពិសេសតាមរយៈការលើកទឹកចិត្តឱ្យម្នាក់ៗ ចូលរួមទប់ស្កាត់ និងឈានទៅបញ្ចប់ចរាចរណ៍ព័ត៌មានក្លែងក្លាយក្នុងសង្គម ។
លោក ទេព អស្នារិទ្ធ បានចាត់ទុកការចូលរួមពីសំណាក់អ្នកបង្កើតមាតិកាលើបណ្តាញសង្គម អ្នកសារព័ត៌មាន និងពលរដ្ឋគ្រប់មជ្ឈដ្ឋាន ដែលជាអ្នកប្រើប្រាស់បណ្តាញសង្គម ត្រូវចូលរួមទាំងអស់គ្នា ដើម្បីកម្ពុជាគ្មានព័ត៌មានក្លែងក្លាយ ៕
ចែករំលែកព័តមាននេះ