ទីក្រុងប្រ៊ុចសែល៖ ថ្ងៃនេះ ប្រទេសនៅប៉ែកអឺរ៉ុបមានអង់គ្លេស និងសហភាពអឺរ៉ុបជាដើមប្រកាសដាក់ទណ្ឌកម្មសេដ្ឋកិច្ចថ្មីទៀតទៅលើប្រទេសរុស្ស៊ីដោយមិនចាំបាច់មានអាមេរិកចូលរួមនៅក្នុងការដាក់ទណ្ឌកម្មនេះក៏បានដែរ។ ចំណាត់ការនេះធ្វើឡើង១ថ្ងៃបន្ទាប់ពីលោកត្រាំសន្ទនាគ្នាតាមទូរស័ព្ទជាមួយលោកពូទីន។ នៅពេលឮថាលោកពូទីនមិនបានទទួលយកបទឈប់បាញ់ អឺរ៉ុប និងអង់គ្លេសក៏ប្រកាសដាក់ទណ្ឌកម្មតែម្ដង។ ពួកគេប្រកាសគម្រោងនេះតាំងពីប៉ុន្មានថ្ងៃមុនមកម៉្លេះ។
អង់គ្លេស និងសហភាពអឺរ៉ុបថ្លែងថាវិធានការថ្មីនេះនឹងចាត់ការទៅលើនាវាដឹកប្រេងឆៅរបស់រុស្ស៊ី និងក្រុមហ៊ុនហិរញ្ញវត្ថុដែលជួយសម្រួលឱ្យរុស្ស៊ីគេចចេញពីការទទួលរងផលប៉ះពាល់ដោយសារការដាក់ទណ្ឌកម្មសេដ្ឋកិច្ចកាលពីពេលកន្លងមក។ ប្រតិកម្មចំពោះបញ្ហានេះ ប្រមុខដឹកនាំអ៊ុយក្រែន លោកហ្សេឡិនស្គីគាំទ្រយ៉ាងពេញទំហឹង។ លោកបង្ហោះសារនៅលើតេឡេក្រាមថាការដាក់ទណ្ឌកម្មពិតជាមានឥតប្រយោជន៍ឡើយ។ លោកសូមថ្លែងការកោតសរសើរចំពោះអ្នករាល់គ្នាដែលចាត់វិធានការកាន់តែក្ដៅគគុកចំពោះរុស្ស៊ីដែលលោកចាត់ទុកថាជាអ្នកដុតបញ្ឆេះភ្នក់ភ្លើងសង្គ្រាម។
ការប្រកាសដាក់ទណ្ឌកម្មនេះធ្វើឡើងដោយមិនចាំបាច់មានសញ្ញាភ្លើងខៀវពីទីក្រុងវ៉ាស៊ីនតោនទេ។ គ្រាន់តែថាកាលពេលថ្មីៗនេះ អឺរ៉ុបក៏បាននិយាយបញ្ចុះបញ្ចូលរដ្ឋាភិបាលរបស់លោកត្រាំឱ្យសហការគ្នាដាក់ទណ្ឌកម្មផងដែរ។ រដ្ឋមន្ត្រីការបរទេសអាល្លឺម៉ង់ថ្លែងថាយើងធ្វើបែបនេះដើម្បីចង់បញ្ជាក់ឱ្យបានច្បាស់ថាអ្វីដែលយើងចង់បានពីរុស្ស៊ីគឺការទទួលយកបទឈប់បាញ់ដោយគ្មានបុរេលក្ខខណ្ឌ។
លោកថ្លែងថាដោយសាររុស្ស៊ីមិនបានទទួលយកបទឈប់បាញ់ យើងត្រូវតែបញ្ចេញប្រតិកម្មតប។ យើងរំពឹងថាសម្ព័ន្ធមិត្តអាមេរិករបស់យើងក៏នឹងមិនអនុគ្រោះចំពោះរុស្ស៊ីដែរ។ ទណ្ឌកម្មប្រហែលជាមិនទាន់បញ្ចប់ត្រឹមនេះទេ។ ប្រធានគណៈកម្មការអឺរ៉ុប លោកស្រីឡីយឹន (Leyen) ថ្លែងថាលោកស្រីបាននិយាយជាមួយលោកហ្សេឡិនស្គីរួចហើយ ហើយអឺរ៉ុបក៏កំពុងរៀបចំកញ្ចប់ទណ្ឌកម្មថ្មីផងដែរ។ លោកស្រីយល់ថានេះជាពេលវេលាដែលត្រូវដាក់សម្ពាធរុស្ស៊ីដើម្បីទទួលយកបទឈប់បាញ់។
ទោះជាយ៉ាងណាក្ដី រុស្ស៊ីមិនទាន់បង្ហាញសញ្ញាដកថយនៅក្នុងរឿងនេះទេ។ អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា (Maria Zhkarova) ថ្លែងប្រាប់អ្នកសារព័ត៌មានថារុស្ស៊ីនឹងមិនចុះញ៉មជាដាច់ខាត។ បន្ទាប់ពីសន្ទនាគ្នាតាមទូរស័ព្ទកាលពីយប់មិញ លោកពូទីនប្រកាសត្រៀមខ្លួនសហការគ្នាជាមួយអ៊ុយក្រែនដើម្បីបង្កើតកិច្ចព្រមព្រៀងសន្តិភាព។
មានន័យថាលោកមិនត្រូវការបទឈប់បាញ់ទេ។ លោកអ៊ូសាកូស (Ushakov) ដែលជាទីប្រឹក្សាជាន់ខ្ពស់របស់លោកពូទីនថ្លែងថានៅក្នុងការសន្ទនាគ្នាកាលពីយប់មិញនោះ លោកពូទីនមិនបាននិយាយអំពីបទឈប់បាញ់ទេ។ គ្រាន់តែថាលោកត្រាំស្នើសុំឱ្យរុស្ស៊ីទទួលយកបទឈប់បាញ់។ លោកស្រីសាការ៉ូវ៉ាថ្លែងថានៅពេលនេះ គ្រាប់បាល់កំពុងស្ថិតនៅក្នុងដៃរបស់អ៊ុយក្រែន៕
ចែករំលែកព័តមាននេះ