រាជធានីភ្នំពេញ ៖ នៅតែមាន ឧក្រិដ្ឋជនក្លែងបន្លំ ធ្វើជាសាច់ញាតិរបស់អ្នកផ្សេង ឬប្រើប្រាស់រូបភាពផ្សេងៗដើម្បើបោកបញ្ឆោតអោយលោកអ្នក ឲ្យផ្ញើសាច់ប្រាក់ទៅអោយគណនីពួកគេ តាមរបៀបធ្វើជាសប្បុរសធម៌ក្លែងក្លាយ ជាក់ស្ដែងនៅថ្ងៃទី២០ ឧសភា…
រាជធានីភ្នំពេញ ៖ នៅតែមាន ឧក្រិដ្ឋជនក្លែងបន្លំ ធ្វើជាសាច់ញាតិរបស់អ្នកផ្សេង ឬប្រើប្រាស់រូបភាពផ្សេងៗដើម្បើបោកបញ្ឆោតអោយលោកអ្នក ឲ្យផ្ញើសាច់ប្រាក់ទៅអោយគណនីពួកគេ តាមរបៀបធ្វើជាសប្បុរសធម៌ក្លែងក្លាយ ជាក់ស្ដែងនៅថ្ងៃទី២០ ឧសភា ២០២៥នេះ មានគណនីហ្វេសប៊ុកឈ្មោះ Seng Ratha បានបង្ហោះរូបភាព និងសរសេររៀបរាប់ថា ៖ «សូមបងប្អូនចំណាំផេកវានឹងឈ្មោះ លេខកុងវាទុកផងណា វាជាជនឆបោក ពួកវាបានយករូបកូនខ្ញុំផុស ក្នុងន័យ បោកប្រាស់ប្រជាជនខ្មែរយើង សូមបងប្អូនជួយស៊ែរផងណា កូនរបស់ខ្ញុំអាយុ៤ឆ្នាំហើយ ជាយូរហើយ ពួកវាមានក្រុមរបស់ពួកវាផងដែរ ខ្ញុំមិនអាចចូលខមិនបានទេ ព្រោះវាបិទខមិន» ។
គណនីហ្វេសប៊ុកដដែលជាម្តាយក្មេងប្រាប់បន្តថា កូនគាត់អាយុ៤ឆ្នាំហើយ នោះជារូបភាពចាស់ទេ។ ច្បាស់ណាស់ផេកហ្វេសប៊ុកឈ្មោះ «Chhay Phallin-ឆាយ ផល្លីន» ជាផេកបោកប្រាស់។ ការចូលរួមផ្តល់លុយមិនចេះគិតរបស់ពួកគាត់ មិនត្រឹមតែបង្ហាញថា គាត់ឆោតចាញ់បោកគេទេ តែជាការរួមចំណែកលើកទឹកចិត្តអំពើបោកប្រាស់ដោយមិនដឹងខ្លួន ។ ផេកពួកវាដំណើរការច្រើនឆ្នាំមកហើយ ខ្ញុំមិនជឿថា គ្មានមន្ត្រីប៉ូលិសប្រឆាំងបទល្មើសបច្ចេកវិទ្យាណាម្នាក់ លេងហ្វេសប៊ុក អូសមិនឃើញករណីបែបនេះសោះនោះទេ ។
យោងតាមអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ធ្លាប់បានបញ្ជាក់ថា បទល្មើសក្លែងបន្លំឆបោកតាមរយៈគម្រោងមូលនិធិ ជាការឆបោកក្លែងបន្លំជាអង្គការសប្បុរសធម៌ គឺជាអំពើឆបោកផ្នែកហិរញ្ញវត្ថុ( financial crime) ពីសប្បុរសជនតាមរយៈការស្នើសុំជំនួយ ក្រោមរូបភាពធ្វើអំពើសប្បុរសជួយជនរងគ្រោះដោយសារទឹកជំនន់ ក្មេងកំព្រា ជនពិកា បរិស្ថាន និងសត្វពាហណៈជាដើម។ ឧក្រិដ្ឋជនបច្ចេកវិទ្យាអាចប្រើប្រាស់ឈ្មោះអង្គការ ឬជនរងគ្រោះ ដើម្បីស្វែងរកជំនួយនៅលើបណ្តាញសង្គមនានា និងអ៊ីនធឺណេត។ ឧក្រិដ្ឋជនបច្ចេកវិទ្យាប្រើប្រាស់វិធីសាស្ត្រឆបោកដូចខាងក្រោម ៖
-សប្បុរសធម៌ក្លែងក្លាយ ៖ ឧក្រិដ្ឋជនក្លែងបន្លំ បង្កើតអង្គការសប្បុរសធម៌ក្លែងក្លាយ ឬបង្កើតវែបសាយក្លែងបន្លំស្រដៀងនឹងអង្គការស្របច្បាប់ផ្សេងៗ ដោយប្រើប្រាស់ និមិត្តសញ្ញា និងពាក្យស្លោក ដើម្បីបំភាន់សប្បុរសជន ។
-ស្វែងរកមូលនិធិ ៖ ឧក្រិដ្ឋជនប្រើប្រាស់បណ្តាញសង្គម ដើម្បីផ្សព្វផ្សាយ ឬចែកចាយរូបភាពជនរងគ្រោះដោយសារទឹកជំនន់ ជនពិកា និងក្មេងកំព្រា ដើម្បីស្វែងរកមូលនិធិដោយតម្រូវឲ្យសប្បុរសជនបរិច្ចាគថវិកាតាមរយៈគណនីបណ្តាញសង្គម ឬគេហទំព័រក្លែងបន្លំដែលបង្កើតឡើងដោយក្រុមឧក្រិដ្ឋជន ។
-លួចយកទិន្នន័យជនរងគ្រោះ ៖ ឧក្រិដ្ឋជនលួចប្រមូលយកទិន្នន័យ គណនីធនាគារពីជនរងគ្រោះតាមរយៈតំណរភ្ជាប់ក្លែងបន្លំ ដែលជនរងគ្រោះបានធ្វើការបរិច្ចាគប្រាក់ដោយប្រើប្រាស់កាតធនាគារជាដើម ។
ក្រុមការងារបច្ចេកទេសនាយកដ្ឋានការពារសុវត្ថិភាពបច្ចេកវិទ្យាឌីជីថល នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សូមក្រើនរំលឹកដល់ប្រជាពលរដ្ឋប្រុងប្រយ័ត្នចំពោះល្បិចឆបោកតាមរយ:គម្រោងមូលនិធិដូចខាងក្រោម ៖
-កុំធ្វើការបរិច្ចាកប្រាក់ទៅលើមូលនិធិដែលគ្មានប្រភពច្បាស់លាស់តាមបណ្តាញសង្គម
-សូមកុំចុចតំណរភ្ជាប់នានា ដែលគ្មានប្រភពច្បាស់លាស់
-សូមរាយការណ៍មកកាន់សមត្ថកិច្ចជំនាញ ករណីលោកអ្នកប្រទះឃើញមានគម្រោងឆបោកនានាលើបណ្តាញសង្គម ៕
ចែករំលែកព័តមាននេះ