រាជធានី​ភ្នំពេញ ៖ ក្រុមបាល់ទាត់​ព្រះ​ខ័ន​រាជ​ស្វាយ​រៀង​របស់​កម្ពុជា នឹង​ត្រូវ​តទល់​ជាមួយ​ក្រុម FK Arkadag មក​ពី​ប្រទេស​តួ​ក​ម៉េ​នី​ស្ថាន នៅ​វគ្គ​ផ្ដាច់ព្រ័ត្រ​ដណ្តើម​ជើងឯក​ពានរង្វាន់​ក្លិប​បាល់ទាត់​លំដាប់​ទី​៣​អាស៊ី AFC Challenge League រដូវ​កាល ២០២៤-២៥ នៅ​ថ្ងៃ​ទី​១០ ខែឧសភា ឆ្នាំ​២០២៥ វេលា​ម៉ោង​៧​នាទី​យប់ ដែល​ធ្វើ​ឡើង​លើ​ទឹកដី​កម្ពុជា នៅ​ពហុ​កីឡដ្ឋាន​ជាតិ​មរ​ត​តេ​ជោ​។

ទាំងនេះ​ជា​រឿង​សំខាន់​ៗ ដែល​អ្នកគាំទ្រ​កម្ពុជា​គួរ​ដឹង​ពី​ក្រុម FK Arkadag ៖
ក្លិប FK Arkadag មាន​អាយុ​ត្រឹម​២​ឆ្នាំ​ប៉ុណ្ណោះ ត្រូវ​បាន​បង្កើត​ឡើង​នៅ​ថ្ងៃ​ទី​១ ខែមេសា ឆ្នាំ​២០២៣ ដោយ​លោក Gurbanguly Berdimuhamedow ប្រធានាធិបតី​ប្រទេស​តួ​ក​ម៉េ​នី​ស្ថាន អំឡុង​ឆ្នាំ ២០០៦ ដល់ ២០២២ ដោយ​មាន​មូលដ្ឋាន​នៅ​ក្នុង​ទីក្រុង​អាកា​ដាក​។ បើ​ទោះជា​ក្រុម​ដ៏​ក្មេងខ្ចី​ក៏​ពិតមែន ប៉ុន្តែ FK Arkadag គឺជា​ក្រុម​ដ៏​ជោគជ័យ​មួយ និង​អុកឡុក​លី​គ​កំពូល​តួ​ក​ម៉េ​នី​ស្ថាន Yokary Liga តាម​រយៈ​ការ​ឈ្នះ​គ្រប់​ពានរង្វាន់​ក្នុងស្រុក​ទាំងអស់​ដែល​ខ្លួន​បាន​ចូលរួម​។

ចាប់តាំងពី​បង្កើត​ឡើង​ដំបូង​មក​ទល់​ពេល​នេះ FK Arkadag នៅ​មិន​ទាន់​ស្គាល់​រសជាតិ​ចាញ់ ឬ ស្មើ ការ​ប្រកួត​ក្នុង​លី​គ​នៅឡើយ​ទេ និង​បាន​គ្រង​ជើងឯក​ក្រប​ខណ្ឌ Yokary Liga រដូវ​កាល​ដំបូង​របស់​ខ្លួន ហើយ​បន្ត​ការពារ​ជើងឯក​ដោយ​ជោគជ័យ​សម្រាប់​រដូវ​កាល​បន្ទាប់​។ បច្ចុប្បន្ន​លី​គ​កំពូល​តួ​ក​ម៉េ​នី​ស្ថាន​រដូវ​កាល ២០២៥ កំពុង​តែ​ដំណើរការ​ប្រកួត​យ៉ាង​ស្វិតស្វាញ ហើយ​ក្រុម FK Arkadag ដែល​គ្មាន​កីឡាករ​បរទេស​សូ​ម្បី​តែ​ម្នាក់​ក្នុង​ចំណោម​កីឡាករ​ទាំង​២៤​រូប​របស់​ខ្លួន ហើយ​ភាគច្រើន​ជាប់​ក្រុម​ជម្រើសជាតិ​ផង​នោះ កំពុង​តែ​ឈរ​នៅ​ចំណាត់ថ្នាក់​ទី​៣​។

ចាប់តាំងពី​បង្កើត​ឡើង​ដំបូង​រហូត​មក​ដល់​ថ្ងៃ​ទី​៩ ខែឧសភា ឆ្នាំ​២០២៥ ប្រកួត​ក្នុងស្រុក​របស់​ក្រុម FK Arkadag ឈ្នះ​ច្រើន​ប្រកួត​ជាប់​ៗ​គ្នា ពោល​រហូត​ដល់​៦៤​ប្រកួត ដោយ​បាន​វ៉ា​ដាច់​កំណត់​ត្រា​ពិភពលោក Guinness World Records របស់​ក្លិប Celtic របស់​ប្រទេស​ស្កុ​តឡែ​ន ដែល​ឈ្នះ​ច្រើន​ប្រកួត​ជាប់​ៗ​គ្នា ពោល​ចំនួន​៦២​ប្រកួត​នៅ​ចន្លោះ​ឆ្នាំ ១៩១៥ ដល់ ១៩១៧​។

ដ្បិត​មិន​ស្គាល់​ចាញ់ ឬ​ស្មើ​ការ​ប្រកួត​ស្រុក​ក៏​ពិតមែន ប៉ុន្តែ​ចាប់តាំងពី​បង្កើត​ឡើង​រហូត​មក​ទល់​ពេល​នេះ FK Arkadag ស្គាល់​បរាជ័យ​៤​លើក ដោយ​លើក​ដំបូង ចាញ់​ក្រោយ​ថ្វី​ជើង​ក្រុម​ខ្លាំង​អ៊ុយ​ក្រែ​ន Shakhtar Donetsk ជំនួប​មិត្តភាព​អន្តរជាតិ​ក្នុង​លទ្ធផល ៤-១ កាលពី​ថ្ងៃ​ទី​៨ ខែកុម្ភៈ ឆ្នាំ​២០២៤​។ លើក​ទី​២​ចាញ់​ក្រុម Dnipro-1 របស់​អ៊ុយ​ក្រែ​ន​ជំនួប​មិត្តភាព​ដូច​គ្នា លទ្ធផល ១-០ កាលពី​ថ្ងៃ​ទី​១០ ខែកុម្ភៈ ឆ្នាំ​២០២៤​។ លើក​ទី​៣​ចាញ់​ក្រុម Al Arabi របស់​គុយ​វ៉ែត ការ​ប្រកួត​ជម្រុះ​ក្នុង​ពូ​ល​ពានរង្វាន់ AFC Challenge League លទ្ធផល ៣-២ កាលពី​ថ្ងៃ​ទី​១ ខែវិច្ឆិកា ឆ្នាំ​២០២៤ និង​ចុង​ក្រោយ​ចាញ់​ក្រុម Al Arabi ដដែល​នៅ​វគ្គ​ពាក់កណ្តាល​ផ្តាច់ព្រ័ត្រ​ជើង​ទី​១ លទ្ធផល ២-០ កាលពី​ថ្ងៃ​ទី​៩ ខែមេសា ឆ្នាំ​២០២៥​។

ក្រៅ​អំពី​គ្រង​ជើងឯក​លី​គ​កំពូល​តួ​ក​ម៉េ​នី​ស្ថាន​២​រដូវ​កាល​ជាប់​គ្នា FK Arkadag ក៏​ឈ្នះ​ពានរង្វាន់​ក្នុងស្រុក​ផ្សេង​ទៀត​ដែល​ខ្លួន​ចូលរួម​មាន​ដូច​ជា Turkmenistan Cup ២​ដង Turkmenistan Super Cup ១​ដង និង Turkmenistan Football Federation Cup ១​ដង​ផង​ដែរ​។

ជាមួយ​គ្នា​នោះ​ផង​ដែរ អ្វី​ដែល​អាច​ជា​ផល​លំបាក់​សម្រាប់​ក្រុមព្រះ​ខ័ន​រាជ​ស្វាយ​រៀង នៅ​ការ​ប្រកួត​ស្អែក​នេះ​ជាមួយ​ក្រុម FK Arkadag នោះ គឺ​ក្រុម​ជើង​ខ្លាំង​មក​ពី​តួ​ក​ម៉េ​នី​ស្ថាន​មួយ​នេះ ក្រៅ​អំពី​មាន​កំណត់​ត្រា​ដ៏​អស្ចារ្យ និង​ទម្រង់​លេង​កាច​ហើយ​នោះ ពួក​គេ​ក៏​មាន​ពោល​ពេញ​ទៅ​ដោយ​កីឡាករ​មាន​កម្ពស់​ខ្ពស់​។ ជាក់ស្តែង បើ​យោង​តាម​ទិន្នន័យ​ពី​គេហទំព័រ transfermarkt បង្ហាញ​ថា កម្ពស់​កីឡាករ​ក្រុម FK Arkadag ភាគច្រើន​គឺ​១,៨០​ម៉ែត្រ​ឡើង ដោយ​កីឡាករ​ខ្ពស់​ជាងគេ​ប្រចាំ​ក្រុម​កម្ពស់ ១,៩៤​ម៉ែត្រ ខណៈ​ដែល​កីឡាករ​ទាប​ជាងគេ​មាន​កម្ពស់ ១,៧០​ម៉ែត្រ​។

សូម​ជម្រាប​ថា ពានរង្វាន់ AFC Challenge League រដូវ​កាល ២០២៤-២៥ ត្រូវ​បាន​សហព័ន្ធ​បាល់ទាត់​ទ្វីបអាស៊ី AFC បែងចែក​ជា​២​តំបន់ តំបន់​ខាងកើត និង​តំបន់​ខាងលិច ដោយ​ប្រកួត​វគ្គ​ចែក​ពូ​លតា​ម​តំបន់​រៀងខ្លួន ដើម្បី​ចម្រាញ់​យក​ក្រុម​បន្ត​ទៅ​កាន់​វគ្គ​៨​ក្រុម​ចុង​ក្រោយ រហូត​ដល់​ទាល់តែ​រក​ឃើញ​មួយ​ក្រុម​ពី​តំបន់​ខាងកើត​គឺ​ព្រះ​ខ័ន​រាជ​ស្វាយ​រៀង និង​មួយ​ក្រុម​ពី​តំបន់​ខាងលិច​គឺ FK Arkadag ដើម្បី​ទូទាត់​គ្នា​នៅ​វគ្គ​ផ្ដាច់ព្រ័ត្រ​។

ការ​បែងចែក​ប្រាក់​រង្វាន់​សរុប​ចំនួន ៤ ៤២០ ០០០​ដុល្លារ នៅ​ក្នុង​ពានរង្វាន់ AFC Challenge League
-​វគ្គ​ជម្រុះ​ក្នុង​ពូ​ល ៖ ១០​ម៉ឺន​ដុល្លារ​/១​ក្រុម
-​វគ្គ​៨​ក្រុម ៖ ៨​ម៉ឺន​ដុល្លារ​/១​ក្រុម
-​វគ្គ​ពាក់កណ្តាល​ផ្តាច់ព្រ័ត្រ ៖ ១២​ម៉ឺន​ដុល្លារ​/១​ក្រុម
-​ក្រុម​រងជើង​ឯក ៖ ៥០​ម៉ឺន​ដុល្លារ
-​ក្រុម​ជើងឯក ៖ ១​លាន​ដុល្លារ​៕ រូបភាព ៖ TFF, AFC និង Preah Khan Reach Svay Rieng FC