ខេត្តប៉ៃលិន ៖ បើតាមសេចក្តីរាយការណ៍ពីសមត្ថកិច្ចនគរបាលនៅកន្លែងកើតហេតុបានអះអាងឱ្យដឹងថា កាលពីវេលាម៉ោង៥ និង១៣នាទីល្ងាចថ្ងៃទី០៤ ខែឧសភា ឆ្នាំ២០២៥ មានករណីគ្រោះថ្នាក់ចរាចរណ៍ដ៏គួរឱ្យរន្ធត់មួយ រវាងរថយន្តបុកជាមួយនឹងម៉ូតូ នៅលើដងផ្លូវជាតិលេខ៥៧…
ខេត្តប៉ៃលិន ៖ បើតាមសេចក្តីរាយការណ៍ពីសមត្ថកិច្ចនគរបាលនៅកន្លែងកើតហេតុបានអះអាងឱ្យដឹងថា កាលពីវេលាម៉ោង៥ និង១៣នាទីល្ងាចថ្ងៃទី០៤ ខែឧសភា ឆ្នាំ២០២៥ មានករណីគ្រោះថ្នាក់ចរាចរណ៍ដ៏គួរឱ្យរន្ធត់មួយ រវាងរថយន្តបុកជាមួយនឹងម៉ូតូ នៅលើដងផ្លូវជាតិលេខ៥៧ ចន្លោះបង្គោលគីឡូម៉ែត្រលេខ៧២-៧៣ ត្រង់ចំណុចភូមិភូមិប៉ាងរលឹម សង្កាត់អូតាវ៉ៅ ក្រុងប៉ៃលិន ខេត្តប៉ៃលិន បណ្ដាលឱ្យនិស្សិតស្រីផ្នែកច្បាប់ម្នាក់ ស្លាប់ភ្លាមៗ នៅនឹងកន្លែងកើតហេតុ ទទួលរងខូចខាតម៉ូតូ០១គ្រឿងកម្រិតធ្ងន់ និងរថយន្ត០១ គ្រឿងកម្រិតមធ្យម ។
បើតាមប្រភពព័ត៌មានពីសាក្សីនៅកន្លែងកើតហេតុ បានឱ្យដឹងថា អ្នកបើកបរម៉ូតូបង្ក មាន ឈ្មោះ សារិន នីតា ភេទស្រី អាយុ២២ឆ្នាំ ជានិស្សិតផ្នែកច្បាប់ឆ្នាំទី៣ រៀននៅខេត្តបាត់ដំបង រស់នៅភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ស្លាប់នៅនឹងកន្លែងកើតហេតុ ដោយបើកបរម៉ូតូម៉ាកហុងដាទ្រីម ពណ៌ខ្មៅ ពាក់ផ្លាកលេខប៉ៃលិន 1C-2762 បើកបរក្នុងល្បឿនលឿន វ៉ាជែងក្នុងស្ថានភាពគ្រោះថ្នាក់ក្នុងទិសដៅពីកើតទៅលិច។
ចំណែកភាគីខាងរថយន្តរងគ្រោះមានឈ្មោះ មិន សុវណ្ណ ភេទប្រុស អាយុ៣២ឆ្នាំ មុខរបររត់តាក់ស៊ី ជនជាតិខ្មែរ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន គ្មានរបួស (រត់គេចពីកន្លែងកើតហេតុ ដោយទុករថយន្តចោល) ដោយបើកបររថយន្តម៉ាក តូយ៉ូតាអាល់ហ្វាដ (toyota Alphard) ពណ៌ស ពាក់ស្លាកលេខ ភ្នំពេញ 2BX-5278 បើកបរក្នុងទិសដៅស្របគ្នា ។ ចំណែកឯអ្នករួមដំណើរ មានឈ្មោះ សុខ បញ្ញា ភេទស្រី អាយ៣៥ឆ្នាំ ត្រូវជាប្រពន្ធអ្នកបើកបរ មុខរបរមេផ្ទះ។
តាមប្រភពដដែលបន្តទៀតថា មូលហេតុដែលបង្កឲ្យមានករណីគ្រោះថ្នាក់ចរាចរណ៍ គឺបណ្ដាលមកពីអ្នកបើកបរម៉ូតូវ៉ាជែងក្នុងស្ថានភាពគ្រោះថ្នាក់ រំលោភទៅលើចំណែកផ្លូវរថយន្ត ទើបបណ្តាលឱ្យរថយន្តបើកបរក្នុងល្បឿនលឿនបុកពីក្រោយពេញទំហឹងបោកក្បាលទៅនឹងផ្លូវថ្នល់ស្លាប់តែម្តង។
បច្ចុប្បន្ន សពនិស្សិតស្រីផ្នែកច្បាប់ខាងលើ ត្រូវបានរថយន្តមន្ទីរពេទ្យបង្អែកខេត្តប៉ៃលិនដឹកយកទៅផ្ទះប្រគល់ជូនក្រុមគ្រួសារសព ដើម្បីរៀបចំធ្វើបុណ្យតាមប្រពៃណី។ ចំណែកម៉ូតូ និងរថយន្តត្រូវបាននគរបាលយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានខេត្តប៉ៃលិន ដើម្បីដោះស្រាយតាមនីតិវិធីច្បាប់ ៕
ចែករំលែកព័តមាននេះ