រាជធានីភ្នំពេញ ៖ តារាសម្តែងជើងចាស់ អ្នកនាង ចន ច័ន្ទលក្ខិណា បានគូសបញ្ជាក់ថា អ្នកនាងនៅមិនទាន់មានគោលដៅអោយកូនស្រីចូលប្រឡូកក្នុងវិស័យបវរកញ្ញាណាមួយនៅឡើយទេ បើទោះបីជាមានទស្សនិកជាច្រើនជម្រុញអោយនាងនាំកូនដើរចូលទៅកាន់វិស័យនេះក៏ដោយ ។…
រាជធានីភ្នំពេញ ៖ តារាសម្តែងជើងចាស់ អ្នកនាង ចន ច័ន្ទលក្ខិណា បានគូសបញ្ជាក់ថា អ្នកនាងនៅមិនទាន់មានគោលដៅអោយកូនស្រីចូលប្រឡូកក្នុងវិស័យបវរកញ្ញាណាមួយនៅឡើយទេ បើទោះបីជាមានទស្សនិកជាច្រើនជម្រុញអោយនាងនាំកូនដើរចូលទៅកាន់វិស័យនេះក៏ដោយ ។
មកទល់ពេលនេះ កូនស្រីតែមួយគត់ក្រោមតំណក់ឈាមរវាងអ្នកនាង ចន ច័ន្ទលក្ខិណា និងលោក
យុត្ថារ៉ា ឆានី បានឈានចូលដល់វ័យ១៨ឆ្នាំហើយ ជាមួយនឹងរូបឆោមល្អស្រស់ ។ កន្លងមក អ្នកនាង ចន ច័ន្ទលក្ខិណា ហាក់មិនបានអើពើយកកូនស្រីរបស់ខ្លួនមកបង្ហាញវត្តមានវិស័យសិល្បៈច្រើននោះឡើយ ដោយសារកូនស្រីនៅមានវ័យក្មេង និងកំពុងជាប់សិក្សា ។ ប៉ុន្តែទើបតែមួយរយៈចុងក្រោយនេះប៉ុណ្ណោះ កូនស្រីរបស់នាងក៏បានចូលខ្លួនជាបណ្តើរៗនៅក្នុងវិស័យសិល្បៈតាមរយៈការថតផ្សព្វផ្សាយគ្រឿងសម្អាងអោយម្ចាស់ប្រេនមួយដែលមានរូបនាងធ្វើការនៅទីនោះដែរ ។
តាមរយៈការចូលរួមថតផ្សព្វផ្សាយផលិតផលនេះហើយ ក៏មានទស្សនិកជនជាច្រើនមានការចាប់អារម្មណ៍លើរូបសម្រស់របស់កូនស្រីរបស់អ្នកនាងដោយនៅក្នុងនោះ ពួកគេក៏បានជម្រុញអោយនាងនាំកូនស្រីចូលរួមប្រឡូកក្នុងវិស័យបវរកញ្ញាផងដែរ ។
យ៉ាងណា ជាការឆ្លើយតប អ្នកនាង ចន ច័ន្ទលក្ខិណា បានលើកឡើងថា រហូតមកទល់នាពេលនេះ អ្នកនាងមិនទាន់មានគោលដៅអោយកូនស្រីចូលរួមប្រកួតក្នុងវិស័យបវរកញ្ញានៅឡើយទេ ខណៈពេលកូនស្រីមិនចូលចិត្តវិស័យមួយនេះផងដែរ ។
តាមរយៈបទសម្ភាសន៍ជាមួយអ្នកសារព័ត៌មាននៅក្នុងស្រុក កាលពីពេលកន្លងទៅ អ្នកនាង ចន ច័ន្ទលក្ខិណា បានអះអាងថា រឿងចូលរួមប្រកួតបវរកញ្ញាសម្រាប់កូនស្រីនោះ គឺអ្នកនាងមិនទាន់មានគោលដៅនៅឡើយទេ ដោយសារអ្នកនាងចង់អោយកូនស្រីយកពេលមកសិក្សា និងជួយការងារនាងជាមុនសិន ។
អ្នកនាងបន្តថា ពិតណាស់កន្លងមក កាលពីកូនស្រីនៅក្មេង កូនស្រីរបស់នាងក៏ធ្លាប់ប្រាប់ពីបំណងចង់ចូលរួមប្រឡងក្នុងកម្មវិធីបវរកញ្ញាដ៏ធំមួយដែរ ប៉ុន្តែនៅពេលកូនស្រីមានវ័យកាន់តែធំពេញក្រមុំនោះគឺបានប្រែចិត្ត ដោយមិនចូលចិត្តវិស័យមួយនេះទៅវិញ ។
យ៉ាងណា បើតាមអ្នកនាង ចន ច័ន្ទលក្ខិណា ប្រសិនបើកូនស្រីរបស់នាងចូលប្រឡងនៅក្នុងកម្មវិធីបវរកញ្ញានោះ អ្នកនាងជឿជាក់លើសមត្ថភាព និងរូបសម្រស់របស់កូន ប៉ុន្តែអ្នកនាងនៅមិនទាន់ជឿជាក់លើភាពក្លាហានរបស់កូននៅឡើយទេ ។
អ្នកនាងបញ្ជាក់ថា គាត់ (កូនស្រី) គឺជាមនុស្សរមទម្យ មិនចូលចិត្តនិយាយច្រើន ហេតុនេះនាងនៅមិនទាន់ជឿជាក់លើភាពក្លាហានរបស់កូនសម្រាប់ការប្រកួតក្នុងវិស័យបវរកញ្ញានេះឡើយ ប៉ុន្តែបើចូលប្រឡូកមែននោះគឺទាល់តែនាងនៅជាប់ជាមួយកូន ដើម្បីជួយគាត់លើការងារមួយនេះ ។
អ្នកនាង ចន ច័ន្ទលក្ខិណា បានលើកឡើងបន្ថែមថា បច្ចុប្បន្ន កូនស្រីរបស់នាងក៏មានដុងសិល្បៈដែរ គឺលើវិស័យចម្រៀង ដោយនាងអាចច្រៀងបានយ៉ាងពីរោះខុសពីឪពុកម្តាយ ។
នាងបញ្ជាក់ថា ដោយសារឃើញកូនមានដុងខាងច្រៀងបែបនេះ អ្នកនាងក៏មិនបានហាមឃាត់ឡើយ គឺមានតែជម្រុញបន្ថែម ហើយទៅថ្ងៃអនាគត បើមានលទ្ធភាពអ្នកនាងក៏នឹងអាចបើកផលិតកម្មខ្លួនឯងសម្រាប់អោយកូនច្រៀងផងដែរ ។
យ៉ាងណា នាងនៅតែមិនទាន់អោយកូនចូលប្រឡូកសិល្បៈពេញដៃឡើយ ដោយចង់អោយកូនរៀនអោយបានច្រើនជាងនេះ ដោយនៅក្នុងនោះ នាងមានគោលដៅបញ្ជូនកូនទៅរៀននៅក្រៅប្រទេសផ្នែកប្លង់ផងដែរ ៕
ចែករំលែកព័តមាននេះ