ខេត្តកំពង់ស្ពឺ ៖ សង្ក្រាន្តកំពង់ស្ពឺឆ្នាំ២០២៥ បាននិងកំពុងធ្វើការសាងសង់សម្រេចលទ្ធផលបាន ជាង៩០%ហើយ ដើម្បីត្រៀមចូលរួមបើកព្រឹត្តិការណ៍សង្ក្រាន្តឆ្នាំថ្មី ដែលនឹងបែងចែកជា១១តំបន់ ដែលអាចបម្រើដល់ការកម្សាន្តសប្បាយរបស់ប្រជាពលរដ្ឋ យុវវ័យ និងទេសចរណ៍ជាតិអន្តរជាតិ។…
ខេត្តកំពង់ស្ពឺ ៖ សង្ក្រាន្តកំពង់ស្ពឺឆ្នាំ២០២៥ បាននិងកំពុងធ្វើការសាងសង់សម្រេចលទ្ធផលបាន ជាង៩០%ហើយ ដើម្បីត្រៀមចូលរួមបើកព្រឹត្តិការណ៍សង្ក្រាន្តឆ្នាំថ្មី ដែលនឹងបែងចែកជា១១តំបន់ ដែលអាចបម្រើដល់ការកម្សាន្តសប្បាយរបស់ប្រជាពលរដ្ឋ យុវវ័យ និងទេសចរណ៍ជាតិអន្តរជាតិ។
លោក ជាម ចន្ទ័សោភ័ណ អភិបាលខេត្តកំពង់ស្ពឺ បាននិយាយឱ្យដឹងថា ព្រឹត្តិការណ៍សង្ក្រាន្តកំពង់ស្ពឺឆ្នាំនេះ ពិតជាមានកម្មវិធីពិសេសជាច្រើនសម្រាប់បង្កលក្ខណៈសប្បាយជូនប្រជាពលរដ្ឋ និងភ្ញៀវទេសចរ ហើយនៅពេលរាត្រីក៏មានការបាញ់កាំជ្រួចរយៈពេល៣ថ្ងៃជាប់គ្នាផងដែរ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ខាងមុខនេះ។
អភិបាលខេត្តកំពង់ស្ពឺ លោក ជាម ចន្ទ័សោភ័ណ បានបញ្ជាក់ថា ក្នុងព្រឹត្តិការណ៍កំពង់ស្ពឺសង្ក្រាន្ត រដ្ឋបាលខេត្តបានត្រៀមជាស្រេចនូវកម្លាំងសមត្ថកិច្ចទាំង ២ប្រភេទ មាននគរបាល និងកម្លាំងអាវុធហត្ថជិត ២ពាន់នាក់ ដើម្បីការពារសុវត្ថិភាពជូនប្រជាពលរដ្ឋ យុវជន យុវនារី ភ្ញៀវទេសចរណ៍ជាតិ អន្តរជាតិបានលេងកម្សាន្តដោយគ្មានក្តីបារម្ភ។
ក្នុងកម្លាំងការពារប្រមាណជិត ២ពាន់នាក់នោះ មានប្រមាណជិត៩០% ត្រូវបានបង្កប់នៅក្នុងហ្វូងមហាជនក្នុងរូបភាពស៊ីវិល ដើម្បីបង្កលក្ខណៈងាយស្រួល និងទាន់ហេតុការណ៍ក្នុងការបង្ក្រាបជនឱកាសនិយមដែលឆ្លៀតពេលបង្កអសន្តិសុខ និងលួចឆក់ទ្រព្យសម្បត្តិពេលកំពុងតែសប្បាយ។
ចំពោះជនឆ្លៀតឱកាសនេះដែរ លោកអភិបាលខេត្តកំពង់ស្ពឺ បានប្រកាសថា នឹងមិនលើកលែងឱ្យទេ នៅពេលដែលសមត្ថកិច្ចចាប់ខ្លួនបាន ត្រូវតែអនុវត្តទោសឱ្យបានធ្ងន់ធ្ងរបំផុត។ ដូច្នេះជនឱកាសនិយមទាំងអស់គួរតែប្តូរទិសដៅ ឬកែប្រែគម្រោងដែលចង់បង្កអសន្តិសុខ ឬឆ្លៀតយកឱកាសនេះដើម្បីរកផលប្រយោជន៍៕
ចែករំលែកព័តមាននេះ