ទីក្រុងខូផឹនហាហ្គឹន៖ ដាណឺម៉ាកផ្ដាំទៅអាមេរិកថា «អ្នកមិនអាចចេះតែដើរយកប្រទេសដទៃធ្វើជាទឹកដីរបស់ខ្លួនបានឡើយ»។ ការថ្លែងសារនយោបាយនេះធ្វើឡើងតាមរយៈនាយករដ្ឋមន្ត្រីដាណឺម៉ាកដែលទើបតែបញ្ចប់ទស្សនកិច្ចរយៈពេលបីថ្ងៃនៅកោះហ្គ្រីនលេន។ ដាណឺម៉ាកយល់ថាមិនត្រូវលើកហេតុផលចង់បានកោះហ្គ្រីនលេនដោយសារសភាពការណ៍ពិភពលោកប្រែប្រួលនោះទេ។
លោកស្រីមេតេ ហ្វ្រេដេរីកសឹន (Mette Frederiksen) ធ្វើដំណើរទៅពិនិត្យមើលកោះដែលស្ថិតនៅលើទីតាំងយុទ្ធសាស្ត្រសំខាន់នៃតំបន់អាកទិចបន្ទាប់ពីលោកត្រាំប្រកាសយកកោះនេះមកគ្រប់គ្រងឱ្យទាល់តែបាន។ បើមិនព្រមប្រគល់ឱ្យតាមសម្រួលទេ លោកព្រមានថានឹងប្រើប្រាស់កម្លាំងយោធា។ លោកត្រាំថ្លែងថាហ្គ្រីនលេនដែលសព្វថ្ងៃនេះជាដែនដីពាក់កណ្ដាលស្វយ័ត និងពាក់កណ្ដាលមើលការខុសត្រូវដោយដាណឺម៉ាកជាចំណុចសំខាន់សម្រាប់សន្តិសុខជាតិអាមេរិក។
មុននេះ១ប្ដាហ៍ អនុប្រធានាធិបតីអាមេរិក លោកជេឌីវេន (JD Vance) ទើបតែទៅសួរសុខទុក្ខកងទ័ពអាមេរិកនៅលើកោះហ្គ្រីនលេន និងឆ្លៀតរិះគន់ដាណាម៉ាកខ្លាំងៗ។ លោកថាដាណឺម៉ាក់ចំណាយលុយតិចតួចក្រោមកម្រិតស្តង់ដារដើម្បីការពារសន្តិសុខជាតិរបស់កោះនេះ។ លោកចង់មានន័យថាបើប្រគល់ឱ្យអាមេរិកគ្រប់គ្រង អាមេរិកនឹងចំណាយច្រើនជាងនេះ។
តាមទស្សនៈរបស់ដាណឺម៉ាក អាមេរិក និងដាណឺម៉ាកមិនគួរបង្ហាញទំនាស់ជាចំហបែបនេះទេព្រោះនៅពេលប្រទេសនៅក្នុងសម្ព័ន្ធភាពជាមួយគ្នា និងនៅក្នុងអង្គការណាតូជាមួយគ្នាបើឈ្លោះគ្នា អ្នកដែលចំណេញនយោបាយ និងអង្គុយចាំសើចគឺសត្រូវរបស់អាមេរិក។ លោកស្រីហ្វ្រេដេរីកសឹនថ្លែងថាលោកស្រីនឹងខិតខំឱ្យអស់ពីសមត្ថភាពដើម្បីកុំឱ្យបែកបាក់គ្នា។
លោកស្រីថាប្រទេសរបស់លោកស្រីបានខិតខំអស់ប៉ុណ្ណឹងហើយដើម្បីផ្គាប់ចិត្តអាមេរិក។ នៅពេលអាមេរិកទាមទារឱ្យយើងវិនិយោគឱ្យបានច្រើនថែមទៀតនៅអាមេរិក យើងធ្វើតាម, នៅពេលអាមេរិកទាមទារឱ្យចូលរួមវិភាគទានឱ្យបានច្រើនចូលទៅក្នុងកញ្ចប់ថវិការបស់អង្គការណាតូ យើងក៏ធ្វើតាម។ ឥឡូវនេះ អាមេរិកទាមទារឱ្យយើងចំណាយថវិកាច្រើនថែមទៀតដើម្បីការពារសន្តិសុខជាតិរបស់កោះហ្គ្រីនលេន យើងក៏ត្រៀមធ្វើតាម។
ប៉ុន្តែចំណុចមួយដែលដាណឺម៉ាកមិនអាចធ្វើតាមបាននោះគឺការប្រគល់កោះហ្គ្រីនលេនទៅឱ្យអាមេរិកគ្រប់គ្រង។ លោកស្រីដាក់ជាសំណួរថាតើឱ្យយើងរំពឹងអ្វីទៀត? ប្រទេស១ដែលយើងធ្លាប់កោតសរសើរថាគ្រាន់បើ ហើយជាសម្ព័ន្ធមិត្តដ៏ជិតស្និទ្ធរបស់យើងទៅទៀតឥឡូវនេះបែរជាមកដាក់សម្ពាធ និងកំហែងយកកោះ១ទាំងមូលស្រស់ៗ។ នេះជាចំណោទបញ្ហាពាក់ព័ន្ធនឹងការគោរពសណ្ដាប់ធ្នាប់ពិភពលោកដែលយើងធ្លាប់កសាងរួមគ្នាជាច្រើនជំនាន់មកហើយនៅមហាសមុទ្រអាត្លង់ទិច។
ថ្នាក់ដឹកនាំដាណឺម៉ាករូបនេះយល់ថាអាមេរិកមិនអាចនៅសុខៗមកកំហែងយកទឹកដីប្រទេសដទៃដូច្នេះទេ ហើយមិនគួរលើកហេតុផលថាដើម្បីការពារសន្តិសុខពិភពលោកនោះដែរ។ ដាណឺម៉ាកយល់ថាបើអាមេរិកចង់ពង្រឹងសន្តិសុខជាតិនៅតំបន់អាកទិច យើងអាចរួមគ្នាធ្វើរឿងនេះបានទេតើ។
នៅក្នុងបទសម្ភាសកាលពីថ្ងៃព្រហស្បតិ៍ លោកជេឌីវេននៅតែនិយាយដដែលឡើងវិញថាដាណឺម៉ាកបានចំណាយថវិកាតិចតួចជាងអ្វីដែលពួកគេត្រូវចំណាយដើម្បីការពារសន្តិសុខជាតិនៅលើកោះហ្គ្រីនលែន។ លោកថ្លែងថាការដែលលោកត្រាំចង់បានកោះហ្គ្រីនលេនមកគ្រប់គ្រងដោយផ្ទាល់ដៃព្រោះដើម្បីការពារសន្តិសុខជាតិអាមេរិក។ ឧទាហរណ៍បើមានបញ្ហាអ្វីមិនស្រួលកើតឡើង វាអាចប៉ះពាល់ទីតាំងដាក់ជើងទម្របាញ់មីស៊ីលអាមេរិក។ លោកថ្លែងថាអាមេរិកត្រូវតែការពារផលប្រយោជន៍របស់ខ្លួនទោះបីនៅក្នុងតម្លៃណាក៏ដោយ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី និងប្រភពដទៃទៀត៕
ចែករំលែកព័តមាននេះ