ទីក្រុងប៊ែឡាំង៖ អធិការបតីអាល្លឺម៉ង់ដែលជិតផុតអាណត្តិ លោកសូល នៅល្ងាចថ្ងៃព្រហស្បតិ៍នេះបាននិយាយពន្លះនយោបាយដំឡើងពន្ធរបស់លោកត្រាំ១ចាស់ដៃ។ លោកសូលថានេះជានយោបាយខុសឆ្គងធ្ងន់ណាស់។ ចាំមើលទៅ នយោបាយនេះនឹងបង្កទុក្ខទោសសម្រាប់ស្ថានភាពសេដ្ឋកិច្ចពិភពលោកទាំងមូលជាមិនខានឡើយ។ លោកយល់ថាប្រព័ន្ធពាណិជ្ជដ៏ល្អផូរផង១ដែលធ្វើឱ្យពិភពលោកស្គាល់វិបុលភាពដូចសព្វថ្ងៃនេះត្រូវរងការជាន់ឈ្លីដោយសារការដំឡើងពន្ធរបស់ត្រាំ។
លោកសូលអះអាងថាសហភាពអឺរ៉ុបមានទីផ្សារខ្លួនឯងផ្ទាល់ មានន័យថាមិនចាំបាច់ពឹងលើការនាំចេញតែ១មុខនោះទេ ជាមួយនឹងអ្នកប្រើប្រាស់ទំនិញ៤៥០លាននាក់។ លោកថានេះជាខ្នងបង្អែកដ៏សំខាន់ធ្វើឱ្យអឺរ៉ុបមានទឹកមាត់ប្រៃក្នុងការនិយាយជាមួយរដ្ឋាភិបាលអាមេរិកដើម្បីកែសម្រួលនយោបាយដំឡើងពន្ធរបស់ខ្លួនឡើងវិញ។ និយាយដល់ចំណុចនេះ លោកសូលហាក់ដូចជាបន្ទន់ឥរិយាបថបន្តិច។
លោកថាយើងចង់បានកិច្ចសហការគ្នាជាជាងប្រឈមមុខដាក់គ្នា។ ប៉ុន្តែយើងនឹងការពារផលប្រយោជន៍ជាតិរបស់យើង។ អឺរ៉ុបនឹងចាត់វិធានការឆ្លើយតបឱ្យបានស្មើដៃគ្នា ពេលនោះពោរពេញដោយថាមពលខ្លាំងក្លា និងសមាមាត្រគ្នាទៅនឹងតម្លៃពន្ធរបស់ត្រាំ។ លោកសូលយល់ថាការដំឡើងពន្ធនេះមិនមែនធ្វើឱ្យអាមេរិកចំណេញនោះទេ។ ការនាំចេញរបស់អាមេរិកនឹងរងផលប៉ះពាល់ជាមិនខាន។
លោកហ៊ានដល់ទៅនិយាយពាក្យថាបើទុកជាអឺរ៉ុបមិនទាន់ចាត់វិធានការដំឡើងពន្ធទៅលើទំនិញរបស់អាមេរិកដើម្បីវាយបកក៏អាមេរិកអាចនឹងជួបបញ្ហាលំបាកផ្នែកសេដ្ឋកិច្ចជាបណ្ដើរៗបាត់ទៅហើយ។ សូម្បីតែលោកស្រីអាលីស វ៉ៃឌែល (Alice Weidel) ដែលជាស្ថាបនិកគណបក្សស្ដាំនិយមជ្រុលនៅអាល្លឺម៉ង់ក៏និយាយរិះគន់ការដំឡើងពន្ធនេះយ៉ាងខ្លាំងក្លាផងដែរ។
លោកស្រីចាត់ទុកការដំឡើងពន្ធរបស់ត្រាំជា «ការបំពុលពាណិជ្ជកម្មសេរី»។ លោកស្រីថ្លែងប្រាប់ទីភ្នាក់ងារព័ត៌មានអាល្លឺម៉ង់ឌីភីអេ (DPA) ថាគេគួរណាស់និយាយបញ្ចុះបញ្ចូលអាមេរិកដើម្បីឱ្យមានកិច្ចព្រមព្រៀង១ដោះស្រាយបញ្ហានេះជាជាងដំឡើងពន្ធទៅលើគ្នាទៅវិញទៅមកដើម្បីសងសឹក។
លោកស្រីនិយាយបន្ថែមទៀតថាបញ្ហាសំខាន់មិនមែនពាក់ព័ន្ធនឹងការស្វែងយល់ថាការដំឡើងពន្ធនាំឱ្យមានផលវិបាក ឬក៏ថាតើការដំឡើងពន្ធជារឿងសមហេតុផល ឬមិនសមហេតុផលទេ។ និយាយ១ម៉ាត់ដោយខ្លីត្រូវតែទប់ស្កាត់ការដំឡើងពន្ធតែម្ដងទើបជាការត្រឹមត្រូវ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ (Reuters), ឌីដាប់បលយូ (DW) និងប្រភពដទៃទៀត៕
ចែករំលែកព័តមាននេះ