ទីក្រុងប៉េកាំង៖ ថ្ងៃនេះ កងទ័ពចិនធ្វើសមយុទ្ធយោធាដ៏ធំមួយក្បែរកោះតៃវ៉ាន់ដើម្បីជាសារដាស់តឿនកោះនេះថាកុំធ្វើខ្លាំងដៃពេករហូតដល់ទៅចាត់ទុកថាតៃវ៉ាន់ និងចិនជាដែនដីដាច់ដោយឡែកពីគ្នា។ សូមរំលឹកថាកាលពីខែកុម្ភៈ ប្រធានាធិបតីតៃវ៉ាន់ លោកឡៃឈីងតេ បានហៅប្រទេសចិនពេញៗមាត់ថាជាកម្លាំងអមិត្តបរទេស។ ជាកិច្ចឆ្លើយតប ចិនចេញសេចក្ដីព្រមានធ្ងន់ៗចំពោះក្រុមដែលចង់បំបែកទឹកដី និងហៅមេដឹកនាំតៃវ៉ាន់រូបនេះថាជាមេរោគ ឬបរាសិត។
តៃវ៉ាន់បានបញ្ជូននាវាចម្បាំងជាច្រើនគ្រឿងដើម្បីចេញធ្វើអន្តរាគមន៍នៅក្នុងគ្រាអាសន្ននៅពេលកងទ័ពចិនធ្វើសមយុទ្ធកៀកនឹងតំបន់មាត់សមុទ្ររបស់ខ្លួន។ នៅក្នុងក្រសែភ្នែករបស់រដ្ឋាភិបាលទីក្រុងប៉េកាំង លោកឡៃឈីងតេជាមនុស្សចូលចិត្តបង្កបញ្ហា និងចង់ផ្ដាច់ទឹកដី។ នៅក្នុងវីឌីអូឃ្លីបដែលកាត់តអមជាមួយសេចក្ដីប្រកាសរបស់បញ្ជាការដ្ឋានកងទ័ពជើងទឹកចិននៅសមរភូមិខាងកើត ចិនគូររូបលោកឡៃឈីងតេចងផ្អោបនឹងចង្កឹះ១គូព្យួរនៅពីលើកោះតៃវ៉ាន់ដែលឆាបឆេះដោយភ្លើង។
កងទ័ពជើងទឹកចិនប្រកាសថាវិញ្ញាសាសំខាន់ៗនៃការធ្វើសមយុទ្ធយោធានេះគឺការត្រៀមខ្លួនធ្វើសង្គ្រាមនៅលើលំហសមុទ្រ និងលំហអាកាស, ការវាយដណ្ដើមកាន់កាប់ទីតាំងគ្រប់គ្រង-បញ្ជាសំខាន់ៗ, ការវាយប្រហារគោលដៅលើផ្ទៃសមុទ្រ និងលើគោក ហើយនិងការបិទខ្ទប់ទីតាំង និងច្រកផ្លូវសំខាន់ៗ។ ប្រតិកម្មចំពោះបញ្ហានេះ រដ្ឋាភិបាលទីក្រុងតៃប៉ិប្រកាសថ្កោលទោសជាទម្ងន់។ ខុទ្ទកាល័យរបស់លោកឡៃឈីងតេថ្លែងថាប្រទេសចិនត្រូវគេទទួលស្គាល់ជាអន្តរជាតិថាចូលចិត្តបង្កបញ្ហា។
មន្ត្រីជាន់ខ្ពស់តៃវ៉ាន់២នាក់ថ្លែងថាកប៉ាល់ចម្បាំងរបស់ចិនជាងដប់គ្រឿងបានបើកទៅកៀកនឹងកោះតៃវ៉ាន់។ ពោលគឺឃ្លាតឆ្ងាយគ្នាប្រហែល៤៤គីឡូម៉ែត្រ។ នៅក្នុងរយៈចម្ងាយនេះ តៃវ៉ាន់មិនអាចនៅស្ងៀមបានឡើយ។ តៃវ៉ាន់ត្រូវតែបញ្ជូនកប៉ាល់ចម្បាំងរបស់ខ្លួនដើម្បីសម្ញែងដាក់ចិនវិញ និងដើម្បីជាសារនយោបាយផ្ដាំថាខ្លួនត្រូវតែឆ្លើយតបចំពោះរឿងនេះ៕
ចែករំលែកព័តមាននេះ