ទីក្រុងរ៉ង់ហ្គូន៖ ទោះបីមានគ្រោះរញ្ជួយដីស្លាប់មនុស្សរាប់ពាន់នាក់ របបសឹកមិនទាន់បន្ធូរដៃនៅក្នុងការវាយប្រហារនៅឡើយទេ។ សូម្បីតែភ្នាក់ងារផ្ដល់ជំនួយមនុស្សធម៌ក៏ត្រូវពួកគេបាញ់បង្អើលផងដែរ។ ថ្មីៗនេះ គេទទួលដំណឹងថាទាហានភូមាបាញ់ឡើងទៅលើអាកាសជាលក្ខណៈព្រមានទៅក្បួនរថយន្តដឹកជំនួយមនុស្សធម៌របស់កាកបាទក្រហមចិន។ បើដូច្នេះមែន ការដឹកជញ្ជូនជំនួយទៅឱ្យជនរងគ្រោះដោយសារហេតុការណ៍រញ្ជួយដីនោះនឹងជួបប្រទះឧបសគ្គជាមិនខានឡើយ។
អ្នកនាំពាក្យរបបសឹកភូមា ឧត្ដមសេនីយ៍ហ្សាវមីនទុន (Zaw Min Tun ) ថ្លែងថាកាកបាទក្រហមចិនមិនបានជម្រាបជូនដំណឹងទុកជាមុនទៅអាជ្ញាធរភូមាដើម្បីជួយសម្រួលផ្លូវធ្វើដំណើរ។ នៅពេលនោះយប់ថ្ងៃអង្គារ ពួកគេបើកបររថយន្តឆ្លងកាត់តំបន់ដែលប្រឈមនឹងការប្រយុទ្ធគ្នាយ៉ាងសកម្ម។ ហេតុនេះ ទាហាននៃរបបសឹកភូមាក៏បាញ់កាំភ្លើងទៅលើអាកាសនៅពេលរថយន្តទាំងនោះមិនបានឈប់ដើម្បីឱ្យទាហានឆែកឆេរតាមសម្រួល។
អ្នកនាំពាក្យក្រសួងការបរទេសចិនបញ្ជាក់ថាជំនួយដែលដឹកតាមឡាននោះនៅល្អទាំងអស់មិនមានខូចខាតអ្វីទេ រីឯភ្នាក់ងាររបស់ខ្លួនក៏គ្មានរងរបួសស្នាមអ្វីដែរ។ ប៉ុន្តែលោកថាផ្លូវដឹកជញ្ជូនជំនួយគួរណាស់បើកចំហជានិច្ច និងមិនត្រូវមានការរារាំងនោះទេ។ ហេតុការណ៍បាញ់ព្រមានក្បួនរថយន្តរបស់ចិននេះកើតឡើងចំពេលចំនួនអ្នកស្លាប់ដោយសារការរញ្ជួយដីកើនឡើងដល់២៨៨៦នាក់ហើយ ហើយអ្នករបួសកើនដល់៤៦៣៩នាក់។ ក្រៅពីនេះ មនុស្សជាង៣០០នាក់ទៀតនៅបាត់ខ្លួន។
តំបន់ដាច់ស្រយាលដែលកើតមានការបាញ់ព្រមាននោះជាទីតាំងប្រយុទ្ធគ្នាដ៏ក្ដៅគគុក ហើយភាគច្រើនស្ថិតនៅក្រោមការគ្រប់គ្រងរបស់ពួកឧទ្ទាម។ ទីនេះប្រហែលជាពិបាកខ្លាំងមែនទែនសម្រាប់ការឆ្លងកាត់របស់ទីភ្នាក់ងារផ្ដល់ជំនួយមនុស្សធម៌។ បើដឹកចូលពីទឹកដីដែលគ្រប់គ្រងដោយរបបសឹករបស់លោកមីនអុងឡាំងក៏ពិបាក បើដឹកចូលពីខាងក្រុមឧទ្ទាមក៏ពិបាក៕
ចែករំលែកព័តមាននេះ