រាជធានីភ្នំពេញ ៖ តារាម៉ូដែល ឆឹង ច័ន្ទមុនីរស្មី ជានារីអ្នកលើកស្លាកទឹក ក្នុងវីដេអូ ដែលពិធីកររបស់ស្ថានីយ៍ទូរទស្សន៍មួយ បានប្រើប្រាស់ពាក្យសម្តីបៀតបៀនទៅកាន់រូបនាងនោះ នាល្ងាចថ្ងៃទី០៣…
រាជធានីភ្នំពេញ ៖ តារាម៉ូដែល ឆឹង ច័ន្ទមុនីរស្មី ជានារីអ្នកលើកស្លាកទឹក ក្នុងវីដេអូ ដែលពិធីកររបស់ស្ថានីយ៍ទូរទស្សន៍មួយ បានប្រើប្រាស់ពាក្យសម្តីបៀតបៀនទៅកាន់រូបនាងនោះ នាល្ងាចថ្ងៃទី០៣ មីនា ២០២៥នេះ កញ្ញាសម្តែងការមិនពេញចិត្តទេ ទៅនឹងការចេញវីដេអូសុំទោសរបស់ពិធីករកីឡា (Mc Vutha) រូបនេះថា ជាការសុំទោស មិនចេញពីចិត្តឡើយ ។
យោងតាមគណនីហ្វេសប៊ុករបស់តារាម៉ូដែល ឆឹង ច័ន្ទមុនីរស្មី បានរៀបរាប់ថា ៖ នាងខ្ញុំ មុនីរស្មី ដែលជាម៉ូដែលនៅក្នុងវីដេអូ «កំពុងធ្វើឲ្យមហាជន និងអ្នកសិល្បៈ ប្រតិកម្មទៅលើពិធីករមួយរូប ក្រោយប្រើពាក្យមិនសមរម្យទៅកាន់នារីលើកទឹកប្រដាល់» ដែលពុកម៉ែបងប្អូនបានឃើញនេះ។ នៅពេលនេះ នាងខ្ញុំ ចេញមកអរគុណដល់ ពុកម៉ែ បងប្អូន មិត្តរួមការងារ មហាជនទាំងអស់ ដែលបានបញ្ចេញមតិ និងបង្ហាញនូវក្តីស្រលាញ់មកចំពោះនាងខ្ញុំ។ ក្តីស្រលាញ់រាប់អាន ការផ្ញើសារលើកទឹកចិត្តរបស់បងប្អូន បានជួយសម្រាលការខូចចិត្ត និងសេចក្តីខ្មាសអៀនរបស់ខ្ញុំច្រើន។ នាងខ្ញុំពិតជាអរគុណ នូវទឹកចិត្ត ដែលមិនអាចកាត់ថ្លៃបាន ។
តារាម៉ូដែល ឆឹង ច័ន្ទមុនីរស្មី បានបញ្ជាក់ថា ការនិយាយបៀតបៀនជាសាធារណៈ និងការសុំទោសតាមវីដេអូ មករូបនាងខ្ញុំ ដែលមាននូវអត្ថន័យ ទទួលកំហុសរបស់ពិធីករ ដែលខ្ញុំមិនសូវស្គាល់ដែរនោះ នៅមានលក្ខណៈមិនពេញលេញ នៅចំណុចខ្លះ រួមមាន ៖
១- មិនសំពះសុំទោស ឥរិយាបថមិនចេញពីចិត្ត (អាចប្រហែលគាត់គិតថា ខ្ញុំដូចជាឈ្មោះ រស្មីហ្នឹង មានអាយុតិចជាងគាត់) តែកន្លែងគាត់គួរច្បាស់ជាងនេះ គឺខ្ញុំ និងគាត់ ខ្មែរដូចគ្នា ហើយគាត់បាននិយាយបៀតបៀនខ្ញុំជាស្រី ។
២- ខ្លឹមសារនៅក្នុងវីដេអូសុំទោសនោះ គឺខុសពី admin ដែលផុសទៅវិញ ច្រើនជាងការនិយាយបៀតបៀន ។ មានន័យថា គាត់នៅចាត់ទុកថា វាគឺជាការនិយាយលេងសើច ដដែល ។
៣- មិនបានបញ្ជាក់ថា ឈប់ពោលពាក្យបៀតបៀនមនុស្សស្រី ស្ត្រី និងក្មេងស្រី ។
៤- មិនបញ្ជាក់ថា ខ្លួនមិនត្រូវនិយាយបៀតបៀនចំពោះបុគ្គលណាក៏ដោយ (មិនមែនត្រឹមខ្ញុំ មនុស្សគាត់មិនស្គាល់ទេ គឺក្មេង ចាស់ ប្រុស ស្រី ភេទណាក៏ដោយ សុទ្ធតែមិនត្រូវ មិនស័ក្តិសមឲ្យមានការបៀតបៀន តាមគ្រប់រូបភាព) ។
តារាម៉ូដែល ឆឹង ច័ន្ទមុនីរស្មី បញ្ជាក់ទៀតថា នៅមានចំណុចផ្សេងទៀត តែមិនដឹងនិយាយពីណា ទៅណាឲ្យសម ព្រោះមិនចង់រំលឹកនូវពាក្យដែលនាងខ្ញុំ ទទួលបានពីគាត់ និងមជ្ឈដ្ឋានរបស់គាត់ឡើងវិញ។ នាងខ្ញុំ បានតាំងចិត្តមកសរសេរនៅពេលនេះជាលើកដំបូង និងតែម្តងគត់ សម្រាប់រឿងរ៉ាវ ដែលបានកើតឡើងនេះ ព្រោះមិនចង់និយាយច្រើន គិតច្រើន តែក៏មានចិត្តមួយទៀតថា ខ្ញុំក៏មិនត្រូវអនុញ្ញាតឲ្យសកម្មភាពបែបនេះ កើតឡើងទៀតចំពោះនាងខ្ញុំ ឬបុគ្គលណាម្នាក់បន្តទៀតឡើយ ។
ជាមួយគ្នានេះដែរ តារាម៉ូដែល ឆឹង ច័ន្ទមុនីរស្មី ក៏បានសុំមតិយោបល់ និងដំបូន្មានរបស់បងប្អូន ដោយនាងលើកឡើងឃាសំណួរថា ៖ តើនាងខ្ញុំគួរធ្វើបែបណា ? តើវីដេអូសុំទោសរបស់គាត់មួយនោះ គ្រប់គ្រាន់ឲ្យនាងខ្ញុំលើកលែងឲ្យគាត់ទេ ? តើស្ត្រី និងក្មេងស្រី ដែលជួបបញ្ហា ដូច ឬស្រដៀងនឹងនាងខ្ញុំ គួរធ្វើបែបណា រកអ្នកណា ដែលអាចជួយគាំទ្រ និងដោះស្រាយឲ្យនាពេល ដែលអាចកើតឡើងលើកក្រោយទៀត ? តើអ្នកដែលមានម្តាយ ប្រពន្ធ បងប្អូនស្រី មិត្តស្រី ក៏នៅតែអាចមិនយល់ពីការផ្តល់តម្លៃស្ត្រី មែនទេ ? តើស័ក្តិសមទេ ដែលមនុស្សស្រី ត្រូវបានកំណត់ដោយទស្សនៈផ្សេងៗ ថាខ្សោយ ឬថាជាទេសភាពសម្រាប់ទស្សនា ដូចដែលពាក្យពិធីករថា បានឃើញហើយ (ក្តក់មាត់) មនុស្សប្រុសយើងអាយុវែងនោះ ? មតិយោបល់ និងដំបូន្មានរបស់បងប្អូន ពិតជាមានន័យណាស់ សម្រាប់នាងខ្ញុំ ជាពិសេស ស្ត្រី និងក្មេងស្រី គ្រប់រូប ។
រូបភាពវីដេអូមួយត្រូវបានគេបង្ហោះលើបណ្តាញសង្គម ដោយបានបង្ហាញពីការនិយាយបែបលេងសើចជាមួយក្បាលមេក្រូទៅលើនារីដែលជាអ្នកលើកស្លាកទឹកនៅចំពោះមុខមនុស្សម្នាជាច្រើនរយនាក់ដែលកំពុងទស្សនាកម្មវិធីប្រដាល់ ។
ពិធីករទូរទស្សន៍រូបនោះបាននិយាយលេងទៅកាន់នារីលើកទឹកថា «និយាយលេងសើចអី លេខ១នេះ(ទឹកទី១)ទំនងណាស់ ហើយបងប្អូនយល់ថា លេខ១នេះពីក្រោយ ឬពីមុខទំនងជាង សម្រាប់ខ្ញុំគឺយកខាងក្រោយហើយ ព្រោះខាងក្រោយទំនងជាង» ។
តាមរយៈវីដេអូជាមួយការប្រើពាក្យពេចន៍ខាងលើនេះ ត្រូវបានមហាជនជាអ្នកលេងបណ្តាញសង្គមផ្ទុះប្រតិកម្ម និងចេញរិះគន់យ៉ាងខ្លាំងទៅលើពិធីកររូបនេះ ខណៈពេលពួកគេចាត់ទុកថា ការនិយាយលេងសើចមួយនេះគឺមិនសមរម្យនោះឡើយ ។
គណនីហ្វេសប៊ុកមួយបានបង្ហោះវីដេអូខាងលើ ដោយភ្ជាប់ជាមួយនឹងសំណេរថា «ជា MC ម្នាក់ ប៉ុន្តែការលេងសើចបែបមិនអោយតម្លៃមនុស្សស្រី អ្នកកុំភ្លេចសម្លេងដែលចេញពីមាត់នាក់ចូលទៅSound មានមនុស្សប៉ុន្មាននាក់ដែលឮ0x017d7 ម្នាក់ដែលលោកកំពុងនិយាយលេងសើចនឹងគាត់ជា BA ដែលមានចរឹកល្អ ហើយក៏ជាតារាសម្តែងមួយរូបក្នុងផលិតកម្ម និងស្ពតជាច្រើនផងដែរ ។ ខ្ញុំស្គាល់នាងតាំងពីមិនទាន់ល្បី ជាBA ធម្មតា រហូតដល់ពេលនេះ នាងជាតារាម្នាក់មានចារឹកល្អ និងថ្លៃថ្នូរ មុនលោកប្រើពភាសាលេងសើចត្រូវឆ្លងកាត់ខួរក្បាលផង តើលោកមានមើលទឹកមុខគេទេ ពេលលោកនិយាយចឹង0x017d7 មិនអោយតម្លៃខ្លួនឯងគួរអោយតម្លៃមនុស្សនៅជុំវិញខ្លួនផង ។ ត្រូវចាំថា ការងារអ្វីក៏មានតម្លៃដែរ និយាយអីចេះគិតពីអារម្មណ៍គេផង ។
ចំណែកអតីតតារាសម្តែងអ្នកនាងនូវ សូនីតា បានចែកចាយនូវវីដេអូខាងលើនេះ ដោយភ្ជាប់ជាមួយសំណេរថា «ពូភ្លាវសាហាវ យកគាត់មកលេងសើចបែបចំអកនៅមុខមនុស្សរាប់សិបនាក់ជាការកំសាន្តទៅវិញ😡 អត់សប្បាយទេពូ» ។
ដោយឡែក តារាចម្រៀងអ្នកនាង ពេជ្រ សូលីកា ក៏បានបង្ហោះសំណេររបស់ខ្លួនតាមបណ្តាញសង្គមពាក់ព័ន្ធទៅរឿងនេះដែរថា «ស្ត្រីប្រៀបដូចជាម្ដាយរបស់អ្នក ព្រោះបើគ្មានស្ត្រីអ្នកក៏គ្មានថ្ងៃបានឃើញពន្លឺដែរ លេងសើចអោយចេះគិត បើលេងមិនចេះសមនឹងត្រូវបែបនេះហើយ ។ នាងបញ្ជាក់ថា ខ្ញុំមិនគាំទ្រចំពោះអ្នកនិយាយគ្មានសុជីវធម៌តាមប្រព័ន្ធ social media ឫ ក្នុងកម្មវិធីធំៗណាមួយឡើយ» ។
តារាសម្តែង សុធីតា បូគីមថេង ក៏បានបង្ហោះសំណេរលើបណ្តាញសង្គមដែរថា ឃើញវីដេអូរប្អូនស្រី ធ្វើអោយខ្ញុំស្រមៃទៅដល់អតីតកាល៧ឆ្នាំមុន ក្នុងនាមជាម៉ូដែលស្រីធម្មតាម្នាក់ទៅឈរបង្ហាញម៉ូតឡាន ហើយត្រូវបានទទួលពាក្យលេបខាយ ដៀមដាមបែបមិនអោយតំលៃពីពិធិករប្រុសដែលគ្មានសីលធម៍២នាក់ អារម្មណ៍ដែលទ្រាំឈរញញឹម ដើម្បីកាងារទាំងដែលមានភាពអៀនខ្មាស់ជាខ្លាំងតែមិនអាចនិយាយអ្វីបាន ។
សូមគិតឡើងវិញ មនុស្សស្រីមិនមែនរបស់លេងសើចសូម្បីតែពាក្យសំដី សូមរៀនអោយតំលៃមនុស្សស្រីឡើងវិញ ព្រោះនាងជាមាតានៃពិភពលោក ព្រោះថា បើគ្មានមនុស្សស្រី គ្រប់គ្នាក៏មិនអាចមានរូបរាងនៅលើពិភពលោកនេះដែរ ។
យ៉ាងណា ក្រោយពីឃើញមានផ្ទុះប្រតិកម្មសម្តែងការមិនពេញចិត្តពីសំណាក់មហាជន ក៏ដូចជាអ្នកសិល្បៈនោះ ពិធីករ លោក វុត្ថា ដែលជាអ្នកនិយាយពាក្យសម្តីខាងលើនេះ ក៏បានចេញសុំទោសជាសាធារណៈផងដែរ ។
តាមរយៈវីដេអូសុំទោសបង្ហោះលើបណ្តាញសង្គមលោកបានលើកឡើងថា លោកសុំទោសទៅកាន់ប្អូនស្រីជាអ្នកលើស្លាកទឹក ដែលលោកបាននិយាយលេងសើចធ្វើអោយប៉ះពាល់ដល់កិត្តិយសប្អូនស្រី ខណៈពេលដែលរូបភាពវីដេអូនោះ គឺអេតមីនរបស់លោកជាអ្នកយកទៅផុស ។
ទោះជាយ៉ាងណា ក្រោយឃើញមានការរិះគន់ច្រើនពីសំណាក់បងប្អូននោះ លោកក៏សម្រេចលុបវីដេអូនោះចោលវិញ ហើយក៏បានធ្វើការសុំទោសទៅកាន់ប្អូនស្រីរួចហើយដែរ ៕
ចែករំលែកព័តមាននេះ