ខេត្តស្វាយរៀង ៖ បងប្អូនប្រជាកសិករ រស់នៅឃុំនានា ក្នុងស្រុកចន្ទ្រា ខេត្តស្វាយរៀង បានថ្លែងអំណរគុណយ៉ាងខ្លាំងដល់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា…
ខេត្តស្វាយរៀង ៖ បងប្អូនប្រជាកសិករ រស់នៅឃុំនានា ក្នុងស្រុកចន្ទ្រា ខេត្តស្វាយរៀង បានថ្លែងអំណរគុណយ៉ាងខ្លាំងដល់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានបញ្ជូនកងកម្លាំងកងពលតូចដឹកជញ្ជូនលេខ៩៩ នៃអគ្គនាយកដ្ឋានភស្តុភារ ហិរញ្ញវត្ថុក្រសួងការពារជាតិចុះអន្តរាគមន៍បូមទឹកសង្គ្រោះស្រែប្រាំងជូនដល់ពួកគាត់ ខណៈស្រែរបស់ពួកគាត់កំពុងខ្វះខាតទឹកស្រោចស្រព ហើយកំពុង ប្រឈមនឹងការខូចខាតនោះ ។
បងប្អូនប្រជាកសិករទាំងនោះ បានលើកឡើងថា ពួកកាត់ពិតជាសប្បាយចិត្តយ៉ាងខ្លាំង ក្រោយឃើញស្រែរបស់ពួកគាត់មានសង្ឃឹមឡើងវិញ បន្ទាប់ពីកងកម្លាំង កងពលតូចដឹកជញ្ជូនលេខ៩៩ បានយកម៉ាស៊ីនបូមទឹកជាច្រើនគ្រឿងមកជួយបូមទឹកពីទន្លេ បង្ហូរដាក់មកបន្លាយហើយបូមបញ្ជូនដាក់ស្រែពួកគាត់បន្តទៀត ដោយមិនគិតថ្លៃសូម្បីតែមួយរៀលនោះ ។
ប្រជាកសិករទាំងនោះបានរៀបរាប់ទៀតថា ពួកគាត់បានធ្វើស្រូវមួយរដូវរួចមកហើយ ប៉ុន្តែកាលពីរដូវវស្សាបានលិចលងអស់គ្មានសល់ ទើបបានជាពួកគាត់សម្រេចធ្វើស្រូវប្រាំងមួយរដូវទៀត បើទោះបីពួកគាត់ដឹងថា អាចប្រឈមនឹងកង្វះទឹកស្រោចស្រពក្តី ប៉ុន្តែទោះបីជាយ៉ាងណាក៏ដោយ ពួកគាត់លែង បារម្ភបន្តទៀតហើយ ដោយសារតែសម្តេចធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដាក់ខ្ពស់ដល់ចំពោះទុក្ខលំបាករបស់ប្រជាកសិករ ហើយបានបញ្ជូនក្រុមការងារឲ្យមកជួយពួកគាត់ទាន់ពេលវេលា ជាក់ស្តែងបងប្អូនកងកម្លាំងកងពលតូចដឹកជញ្ជូនបានមកជួយបូមទឹកជូនពួកគាត់ទាំងយប់ទាំងថ្ងៃដោយមិនគិតពីការនឿយហត់នោះឡើយ ។
សូមបញ្ជាក់ថា ក្រោយមានបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បទបញ្ជារបស់រដ្ឋមន្ត្រីក្រសួងការពារជាតិ ដោយគោរពបទបញ្ជាយ៉ាងម៉ឹងម៉ាត់របស់នាយឧត្តមសេនីយ៍ ម៉ឹង សំផន រដ្ឋលេខាធិការ ក្រសួងការពារជាតិ និងជាប្រធានក្រុមការងារសម្របសម្រួលការត្រៀមរៀបចំឆ្លើយតបការសង្គ្រោះ គ្រោះមន្តរាយក្រសួងការពារជាតិ និងបទបញ្ជាផ្ទាល់របស់ ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ-ហិរញ្ញវត្ថុក្រសួងការពារជាតិ ឧត្តមសេនីយ៍ទោ ហ៊ុល សំអុន កាលពីថ្ងៃទី២ ខែកុម្ភៈកន្លងទៅថ្មីៗនេះ បានដឹកនាំកម្លាំងទ័ពចំនួន១៥០នាក់ រួមនិងម៉ាស៊ីនបូមទឹកចំនួន៣០គ្រឿង ទុយោបូមទឹក ចប បង្គី និងសម្ភារៈចាំបាច់មួយចំនួន ចុះជួយអន្តរាគមន៍ដោយផ្ទាល់ជាមួយអាជ្ញាធរស្រុកចន្ទ្រា ដើម្បីជួយសង្គ្រោះស្រូវប្រជាពលរដ្ឋ ដែលកំពុងប្រឈមនិងកង្វះទឹកស្រោចស្រព ខណៈរហូតមកដល់ពេលនេះ កងកម្លាំងបានជួយសង្គ្រោះស្រូវប្រាំងពួកគាត់ឲ្យរួចផុតពីការខូចខាតបានជិតមួយពាន់ហិកតា ហើយនោះ ៕
ចែករំលែកព័តមាននេះ