ទីក្រុងម៉ូស្គូ៖ ទាហានរុស្ស៊ីរាប់រយនាក់កំពុងសម្រាកព្យាបាលមុខរបួសនៅកូរ៉េខាងជើង។ នេះជាការអះអាងរបស់ឯកអគ្គរដ្ឋទូតរុស្ស៊ីប្រចាំទីក្រុងព្យុងយ៉ាងប្រាប់សារព័ត៌មានរបស់រដ្ឋរុស្ស៊ី។ ពួកគេទទួលបានសេវាថែទាំសុខភាពមួយកំផ្លេនៅទីនោះ។ លោកឯកអគ្គរដ្ឋទូតអាឡិចសាន់ដឺ ម៉ាសេហ្គោរ៉ា (Alexander Macegora) ចាត់ទុកថានេះជាឧទាហរណ៍បញ្ជាក់ថារុស្ស៊ី និងកូរ៉េខាងជើងប្រៀបបាននឹងមិត្តចិត្តមួយថ្លើមមួយជាមួយគ្នា។
លោកថ្លែងបន្តទៀតថាទីក្រុងម៉ូស្គូផ្គត់ផ្គង់ទៅឱ្យទីក្រុងព្យុងយ៉ាងនូវធ្យូងថ្ម ស្បៀងអាហារ និងថ្នាំពេទ្យ។ នៅក្នុងការចុះផ្សាយកាលពីថ្ងៃចន្ទ វិទ្យាស្ថានសិក្សាស្រាវជ្រាវអំពីសង្គ្រាម (មានទីស្នាក់ការនៅអាមេរិក) តាមដានដោយយកចិត្តទុកដាក់ចំពោះការលើកឡើងរបស់ទូតរុស្ស៊ីរូបនេះ។ មានន័យថាមិនទាន់ជឿជាក់១០០%ទេ។ ប៉ុន្តែវិទ្យាស្ថានយល់ថាអាចជាការពិតដែរ។
សារព័ត៌មានចុះផ្សាយថាវត្តមាននៃកងទ័ពរុស្ស៊ីនៅលើទឹកដីកូរ៉េខាងជើងអាចជាឱកាសសហការគ្នារវាងកងទ័ពទាំង២ដើម្បីសិក្សារៀនសូត្រ និងដកពិសោធពីគ្នាទៅវិញទៅមក។ ជាពិសេសដកពិសោធពីទាហានរុស្ស៊ីក្នុងនាមជាអ្នកមានបទពិសោធជោគជាំនៅក្នុងសង្គ្រាមអ៊ុយក្រែន។ ទូរទស្សន៍ស៊ីអឹនអឹន (CNN) ផ្សាយទុកជាការពិចារណាថារុស្ស៊ីមានប្រព័ន្ធសុខាភិបាលកម្រិតខ្ពស់ជាងកូរ៉េខាងជើង។ សួរថាតើរបបក្រុងព្យុងយ៉ាងមានប្រព័ន្ធសុខាភិបាលល្អគ្រប់គ្រាន់សម្រាប់ព្យាបាលទាហានរុស្ស៊ីដែរឬទេ?
កាលពី២ឆ្នាំមុន មានព័ត៌មានផ្សាយថាកូរ៉េខាងជើងខ្វះសព្វខ្វះគ្រប់នៅក្នុងវិស័យសុខាភិបាលមិនថាថ្នាំពេទ្យ និងគ្រឿងបរិក្ខារពេទ្យទេ។ សូម្បីតែសេវាព្យាបាលកម្រិតបឋមក៏គ្មានគ្រប់គ្រាន់ផង។ ដូច្នេះមិនដឹងថាក្រុងព្យុងយ៉ាងមានអ្វីទៅជួយព្យាបាលមុខរបួសឱ្យទាហានរុស្ស៊ីទេ។ ភ្នាក់ងារសម្ងាត់អ៊ុយក្រែន និងបស្ចិមប្រទេសវាយតម្លៃថាកូរ៉េខាងជើងបានបញ្ជូនកងទ័ព១១០០០នាក់ទៅតំបន់ខឺសដើម្បីសហការជាមួយរុស្ស៊ីបណ្ដេញទាហានអ៊ុយក្រែនចេញពីទីនោះ។
រុស្ស៊ី និងកូរ៉េខាងជើងរក្សាភាពស្ងៀមស្ងាត់នៅក្នុងបញ្ហានេះ។ មានន័យថាមិនបដិសេធ ហើយក៏មិនទទួលស្គាល់ថាជាការពិត។ អ្នកនាំពាក្យវិមានក្រឹមឡាំងគ្រាន់តែនិយាយមួយម៉ាត់ដោយខ្លីថាទោះបីប្រទេសទាំង២ពង្រីកកិច្ចសហការដល់កម្រិតណាក៏មិនខុសច្បាប់ដែរ។ កាលពីចុងខែមករា អ្នកនាំពាក្យកងទ័ពអ៊ុយក្រែនថ្លែងថាទាហានកូរ៉េខាងជើងដែលបញ្ជូនទៅតំបន់ខឺសនោះនៅសុខៗស្រាប់តែបាត់អស់រលីង មិនដឹងថាពួកគេដកថយទៅណាអស់។
ទំនងជាពួកគេសម្រេចចិត្តលែងប្រឡូកនៅក្នុងសមរភូមិតទៅទៀតបន្ទាប់ពីស្លាប់ និងរបួសច្រើនពេក។ ប្រភពខ្លះថាកូរ៉េខាងជើងបាត់បង់កម្លាំងប្រយុទ្ធ៣ពាន់នាក់។ ប៉ុន្តែការដកថយនេះប្រហែលជាដកតែ១រយៈពេលខ្លីប៉ុណ្ណោះជាលក្ខណៈដកថយមួយជំហានដើម្បីទៅមុខដប់ជំហាន។ ជាក់ស្ដែង ភ្នាក់ងារសម្ងាត់កូរ៉េខាងត្បូងរាយការណ៍ថានៅពេលឆាប់ៗនេះ របបក្រុងព្យុងយ៉ាងត្រៀមបញ្ជូនកងទ័ពទៅរុស្ស៊ីថែមទៀត។
ការសន្និដ្ឋានដូចខាងលើនេះក៏ជាការត្រឹមត្រូវ និងសមហេតុផលម៉្យាងដែរព្រោះកាលពីខែមិថុនា ឆ្នាំ២០២៤ ប្រមុខដឹកនាំរុស្ស៊ី និងកូរ៉េខាងជើងបានអភិវឌ្ឍទំនាក់ទំនងទ្វេភាគីនៃប្រទេសទាំង២ដល់កម្រិតភាពជាដៃគូយុទ្ធសាស្ត្រគ្រប់ជ្រុងជ្រោយ។ កាលនោះ ថ្នាក់ដឹកនាំទាំង២បានចុះហត្ថលេខាលើកតិកាសញ្ញាជួយគ្នាទៅវិញទៅមក។ មានន័យថាបើភាគី១កំពុងជាប់ដៃធ្វើសង្គ្រាមជាមួយប្រទេសដទៃ ភាគី១ទៀតត្រូវតែចេញមុខជួយជាអាវុធយុទ្ធភ័ណ្ឌ ឬបញ្ជូនកងទ័ពទៅជួយច្បាំងនៅលើសមរភូមិ៕
ចែករំលែកព័តមាននេះ