ខេត្តបាត់ដំបង ៖ យ៉ាងហោចណាស់ មនុស្សចំនួន០៥នាក់ បានស្លាប់ និងចំនួន០៣នាក់ទៀត រងរបួសធ្ងន់និងស្រាល នៅក្នុងឧប្បតិហេតុគ្រោះថ្នាក់ចរាចរណ៏ ចន្លោះពេលត្រឹមជាង០៤ម៉ោងបានកើតឡើងចំនួន០៣លើកផ្ទូនៗក្នុងថ្ងៃតែមួយនៅក្នុងខេត្តបាត់ដំបង ។…
ខេត្តបាត់ដំបង ៖ យ៉ាងហោចណាស់ មនុស្សចំនួន០៥នាក់ បានស្លាប់ និងចំនួន០៣នាក់ទៀត រងរបួសធ្ងន់និងស្រាល នៅក្នុងឧប្បតិហេតុគ្រោះថ្នាក់ចរាចរណ៏ ចន្លោះពេលត្រឹមជាង០៤ម៉ោងបានកើតឡើងចំនួន០៣លើកផ្ទូនៗក្នុងថ្ងៃតែមួយនៅក្នុងខេត្តបាត់ដំបង ។
យោងតាមរបាយការណ៍របស់មន្ត្រីជំនាញបានឲ្យដឹងថា ឧប្បត្តិហេតុគ្រោះថ្នាក់ចរាចរណ៍ផ្ដាច់យកជីវិតមនុស្សយ៉ាងរន្ធត់នៅលើដងផ្លូវខាងលើនេះ បានកើតឡើងនៅស្រុករុក្ខគិរី ស្រុករតនមណ្ឌល និងស្រុកភ្នំព្រឹក ។ បើតាមសេចក្ដីរាយការណ៍ជាបន្តបន្ទាប់បានឲ្យដឹងថា លើកទី១-កើតឡើងនៅស្រុករុក្ខគិរី នៅចំណុចភូមិព្រៃអម្ពាន់ ឃុំស្ដុតប្រវឹក គ្រោះថ្នាក់ចរាចរណ៍បានកើតឡើងនៅម៉ោង២ និង៤៥នាទីរសៀលថ្ងៃទី០៨ កុម្ភៈ រវាងរថយន្តបុកជាមួយអ្នកជិះម៉ូតូ ក្នុងពេលធ្វើដំណើរក្នុងគោលដៅផ្ទុយគ្នាពីកើតទៅលិច ។
នៅក្នុងរបាយការណ៍នេះ គេមិនបាននិយាយពីមូលហេតុដែលមានឲ្យមានគ្រោះថ្នាក់ទេ តែបានឲ្យដឹងថា ស្ត្រីម្នាក់ឈ្មោះ ស៊ាង ហេង អាយុ៦៣ឆ្នាំ រស់នៅឃុំតាលោ ស្រុកតាលោសែនជ័យ ខេត្តពោធិសាត់ បានស្លាប់នៅកន្លែងកើតហេតុ ។ ដោយឡែក ភាគីអ្នកបើករថយន្តបាត់រត់គេចខ្លួន ក្រោយបង្កគ្រោះថ្នាក់ស្លាប់មនុស្ស ។ រថយន្តម៉ាក KIA ប្រភេទដឹកទំនិញ ពាក់ស្លាកលេខ ភ្នំពេញ 2X-4086 ។
ឧប្បត្តិហេតុលើកទី២-បើតាមសេចក្ដីរាយការណ៍បានឲ្យដឹងថា បានកើតឡើងនៅវេលាម៉ោង៣និង១០នាទីរសៀលថ្ងៃទី ០៨ កុម្ភៈ នៅចំណុចភូមិអូរដា ឃុំផ្លូវមាស ស្រុករតនមណ្ឌល រវាងរថយន្តសណ្ដោងរ៉ឺម៉កប្រភេទដឹកទំនិញ ជាមួយអ្នកជិះម៉ូតូ ក្នុងគោលដៅផ្ទុយគ្នា ។
បើតាមសមត្ថកិច្ចបានឲ្យដឹងថា រថយន្តចូលពីប្រទេសថៃ ចូលដឹកកសិផលនៅក្នុងដីខ្មែរ ។ គេមិនស្គាល់អត្តសញ្ញាណអ្នកបើករថយន្តទេ តែជាជនជាតិថៃ ។ រថយន្តនេះ បានបុកអ្នកជិះម៉ូតូ ដែលជិះឌុបគ្នា០៣នាក់ បណ្ដាលឲ្យម្នាក់ស្លាប់គឺឈ្មោះ ណាង ស្រីនីត ស្រីអាយុ២១ឆ្នាំ និងអ្នករួមដំណើរ២នាក់រងរបួសគឺ ឈ្មោះ សឹម ស្រីយ៉ា ស្រីអាយុ២០ឆ្នាំ និងឈ្មោះ បារាំង ស្រីណាង ភេទស្រី អាយុ១៥ឆ្នាំ ។
បើតាមសមត្ថកិច្ចបានបញ្ជាក់ថា ក្រោយបុកមនុស្សស្លាប់និងរបួសរថយន្តបង្កបានបើករត់ទៅលាក់ទុកនៅក្នុងសៃឡូស្ដុកកសិផលមួយកន្លែង រួចតៃកុងរត់គេចខ្លួនបាត់ ។ ដោយឡែក ករណីទី៣-គ្រោះថ្នាក់ចរាចរណ៍ដ៏រន្ធត់ចុងក្រោយ បានកើតឡើងនៅវេលាម៉ោង៦និង៣០នាទីព្រលប់ថ្ងៃទី ០៨ កុម្ភៈ នៅចំណុចភូមិភ្នំប្រាំពីរ ឃុំបួរ ស្រុកភ្នំព្រឹក រវាងម៉ូតូជាមួយម៉ូតូ ក្នុងគោលដៅផ្ទុយគ្នា បណ្ដាលឲ្យមនុស្ស០៣នាក់ស្លាប់ និងម្នាក់ទៀតរងរបួសធ្ងន់ ។
បើតាមរបាយការណ៍បានឲ្យដឹងថា ភាគីម៉ូតូទាំង០២បានជិះបុកគ្នាពេញទំហឹង ពេលកំពុងធ្វើដំណើរបញ្ច្រាស់ទិសគ្នា ។ ហេតុការណ៍នេះ បណ្ដាលឲ្យស្លាប់ចំនួន០៣នាក់ និងម្នាក់ទៀតរបងរបួសធ្ងន់ ។ នៅក្នុងឧប្បត្តិហេតុគ្រោះថ្នាក់ចរាចរណ៍ទាំង០៣ករណីខាងលើនេះ មនុស្ស៥០នាក់ បានស្លាប់ និងចំនួន០៣នាក់រងរបួសធ្ងន់ និងស្រាល ។ គ្រប់មធ្យោបាយបង្កគ្រោះថ្នាក់ទាំងអស់ត្រូវបានមន្ត្រីនគរបាលជំនាញយកមករក្សាទុក ដើម្បីដោះស្រាយតាមនីតិវិធីហើយ ៕
ចែករំលែកព័តមាននេះ