ទីក្រុងយេរូសាឡឹម៖ ជនជាតិថៃ៥នាក់ត្រូវក្រុមហាម៉ាស់ដោះលែងឱ្យមានសេរីភាពឡើងវិញហើយនៅថ្ងៃនេះរួមជាមួយចំណាប់ខ្មាំងជនជាតិអ៊ីស្រាអែលបីនាក់ទៀត។ ជាថ្នូរត្រឡប់ទៅវិញ អ៊ីស្រាអែលដោះលែងអ្នកទោសជនជាតិប៉ាឡេស្ទីន១១០នាក់។ នេះជាផ្នែកមួយនៃកិច្ចព្រមព្រៀងឈប់បាញ់គ្នា និងការដោះដូរចំណាប់ខ្មាំង និងអ្នកទោសទៅវិញទៅមកដើម្បីឈានទៅដល់ការបិទបញ្ចប់សង្គ្រាមទាំងស្រុង និងនាំមកនូវសន្តិភាពពិតប្រាក និងយូរអង្វែងសម្រាប់តំបន់ហ្កាហ្សា។
ការប្រគល់ចំណាប់ខ្មាំងទាំង៨នាក់នោះធ្វើឡើងនៅទីក្រុងខាន់យូនីស (Khan Yunis) ស្ថិតនៅតំបន់ហ្កាហ្សាខាងត្បូងដែលមិនឆ្ងាយប៉ុន្មានពីស្រុកកំណើតរបស់អតីតមេក្រុមហាម៉ាស់លោកយ៉ាយ៉ា ស៊ីនវ៉ា (Yaya Sinwar) ដែលត្រូវអ៊ីស្រាអែលសម្លាប់កាលពីប៉ុន្មានខែមុន។ សាក្សីនិយាយថាមុនពេលដោះលែងចំណាប់ខ្មាំងនោះមានហេតុការណ៍ជ្រួលច្របល់១សន្ទុះដោយសារមនុស្សរាប់រយនាក់សម្រុកទៅមើលចំណាប់ខ្មាំងទាំងនោះ។
នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បានចេញសេចក្ដីព្រមានធ្ងន់ៗនៅពេលមានរូបភាពមិនល្អនៅលើកញ្ចក់ទូរទស្សន៍ដែលបង្ហាញជនប្រដាប់អាវុធរបស់ក្រុមហាម៉ាស់ប្រដាប់ដោយកាំភ្លើងនៅក្នុងដៃបានខិតខំទប់ទល់នឹងហ្វូងមហាជន។ អ្នកខ្លះទាញទូរស័ព្ទមកថតរូបចំណាប់ខ្មាំង ហើយអ្នកខ្លះទៀតហ៊ុមព័ទ្ធយ៉ាងជុំជិតទៅលើឡានរបស់កាកបាទក្រហម។
លោកណឺតាន់យ៉ាហ៊ូថ្លែងថាលោកពិនិត្យមើលស្ថានការណ៍នៅពេលនោះដោយយកចិត្តទុកដាក់ជាទីបំផុត។ លោកឆ្លៀតនិយាយឌឺដងថានេះជាជាឧទាហរណ៍ថ្មីមួយទៀតដែលបង្ហាញអំពីចរិតឃោរឃៅរបស់ក្រុមហាម៉ាស់។ លោកសូមទាមទារឱ្យក្រុមអ្នកសម្របសម្រួលការដោះលែងចំណាប់ខ្មាំងត្រូវតែធានាឱ្យបានថាគ្មានករណីបែបនេះកើតឡើងសាជាថ្មីទេ។
ចំណាប់ខ្មាំងត្រូវតែមានសុវត្ថិភាពពេញលេញ។ អ្នកណាហ៊ានប៉ះពាល់ចំណាប់ខ្មាំងតែប៉ុនសរសៃសក់ ពួកគេនឹងរងនូវការខាតបង់ដ៏ធ្ងន់ធ្ងរបំផុត។ ក្រឡេកទៅមើលទិដ្ឋភាពនៅទីក្រុងតែឡាវីវក្រោយការដោះលែងចំណាប់ខ្មាំងនោះ គេឃើញថាក្រុមគ្រួសារ និងមិត្តភក្ដិចំណាប់ខ្មាំងមានចិត្តត្រេកអរណាស់។ ពួកគេហ៊ោរកញ្ជ្រៀវ។ អ្នកខ្លះសប្បាយពេកដល់ថ្នាក់ស្រក់ទឹកភ្នែកទាំងមិនដឹងខ្លួន។
អ្នកខ្លះរាំច្រៀងយ៉ាងកងរំពង អមដោយការលើកបដា និងទង់ជាតិគ្រវីទៅលើអាកាសដើម្បីបង្ហាញថាការវិលត្រឡប់មកវិញលើកនេះប្រៀបបាននឹងការចាប់កំណើតសាជាថ្មី។ នៅក្នុងចំណោមជនជាតិអ៊ីស្រាអែលទាំងបីនាក់នោះម្នាក់ជាទាហានស្រីឈ្មោះអាហ្កាំ បឺហ្គើ (Agam Berger), ម្នាក់ឈ្មោះហ្កាឌី ម៉ូសេ (Gadi Moses) និងម្នាក់ទៀតឈ្មោះអាបែល យ៉ាហ៊ូត (Arbel Yahud)។ ទោះជាយ៉ាងណាក្ដី ចំណាប់ខ្មាំងជនជាតិថៃទាំង៥នាក់មិនត្រូវគេទម្លាយឱ្យដឹងអំពីអត្តសញ្ញាណរបស់ពួកគេទេ៕
ចែករំលែកព័តមាននេះ