សារព័ត៌មានបរទេសផ្សាយថា អ្នកស្រីការ៉េន ហ្សូមុក ជនជាតិបារាំងអាចប្រារព្ធពិធីរៀបការជាមួយលោកអេនតូនី ម៉េលឡត មិត្តប្រុសដែលស្លាប់បាត់បង់ជីវិតដោយគ្រោះថ្នាក់រថយន្តកាលពីឆ្នាំ២០០៩ ដោយអ្នកស្រីបានទទួលការអនុញ្ញាតពីប្រធានាធិបតីបារាំងលោកនីកូឡា ហ្សាកូហ្ស៊ី ព្រោះលោកស្រីការ៉េនបញ្ជាក់ថា នាងមានគំរោងរៀបការជាមួយលោកអេនតូនី យ៉ាងពិតប្រាកដនៅមុនពេលស្លាប់។ ពួកគេទាំង២នាក់បានសេពគប់គ្នាកាលពីឆ្នាំ២០០៧ និងមានកូនប្រុសនៅឆ្នាំ២០០៩នៅមុនពេលលោកអេនតូនីស្លាប់ក្នុងអាយុ២០ឆ្នាំ។
នៅក្នុងរបាយការណ៍បញ្ជាក់ឱ្យដឹងថា អ្នកស្រីការ៉េនបានរៀបការក្នុងឈុតអាពាហ៍ពិពាហ៍ពណ៌ស និងមានក្រុមគ្រួសារ រួមទាំងមិត្តភក្តិធ្វើជាសាក្សីនៅឯសាលាក្រុងក្នុងទីក្រុងឌីសីុឡេគ្រូស ភាគខាងកើតប្រទេសបារាំង។ អ្នកស្រីបញ្ជាក់ថា «លោកអេនតូនី ជាគូស្នេហ៍ដំបូង និងបានរស់នៅរួមគ្នារយៈពេល៤ឆ្នាំ។ យើងទាំង២នាក់មានក្តីសង្ឃឹមថា នឹងបានចិញ្ចឹមកូនរួមគ្នា និងខ្ញុំមិនធ្លាប់គិតចង់រស់នៅតែឯងទេ។ បច្ចុប្បន្នខ្ញុំបានក្លាយជាប្រពន្ធរបស់គេ និងស្រឡាញ់គ្នាជារៀងរហូត»។
ចំណែកអ្នកជំនាញផ្នែកច្បាប់របស់បារាំងបានថ្លែងថា ប្រសិនបើអ្នកស្រីការ៉េន បានជួបនឹងបុរសថ្មី និងត្រូវការរៀបការជាថ្មីនាងត្រូវធ្វើបែបបទលែងលះសិន ប៉ុន្តែវាមិនមែនជារឿងពិបាក ព្រោះជាការលែងលះតែឯកឯងសំរាប់រូបនាងផ្ទាល់៕
ចែករំលែកព័តមាននេះ