រាជធានីភ្នំពេញ ៖ តារាកំប្លែង និងជាតួអង្គយក្សល្ខោនបាសាក់នាយ ព្រីង ទុំ ត្រូវបានក្រុមគ្រួសារបញ្ជូនយកទៅមន្ទីរពេទ្យ ក្រោយពីស្ថានភាពជំងឺរបស់លោកធ្វើទុក្ខខ្លាំង ដែលតម្រូវឲ្យមានការព្យាបាលមួយជាចាំបាច់ បន្ទាប់ពីលោកបានពើប្រទះនូវជំងឺប្រចាំកាយជាច្រើនមុខ…
រាជធានីភ្នំពេញ ៖ តារាកំប្លែង និងជាតួអង្គយក្សល្ខោនបាសាក់នាយ ព្រីង ទុំ ត្រូវបានក្រុមគ្រួសារបញ្ជូនយកទៅមន្ទីរពេទ្យ ក្រោយពីស្ថានភាពជំងឺរបស់លោកធ្វើទុក្ខខ្លាំង ដែលតម្រូវឲ្យមានការព្យាបាលមួយជាចាំបាច់ បន្ទាប់ពីលោកបានពើប្រទះនូវជំងឺប្រចាំកាយជាច្រើនមុខ ។
កូនប្រុសរបស់លោកបានអះអាងប្រាប់កោះសន្តិភាពតាមសារអេឡិចត្រូនិចថា ឪពុកលោក (នាយ ព្រីងទុំ) បានចូលសម្រាកព្យាបាលនៅមន្ទីរពេទ្យប្រមាណជាជិត១សប្តាហ៍ហើយ បន្ទាប់ស្ថានភាពជំងឺប្រចាំកាយរបស់គាត់កាន់តែធ្វើទុក្ខខ្លាំង ។
លោកបញ្ជាក់ថា បានពើបប្រទះនូវជំងឺមួយចំនួនដូចជាទឹកនោមផ្អែម លើសឈាម ឡើងអាស៊ីដ បេះដូង ហើយទើបតែធ្វើទុក្ខខ្លាំងរហូតដំបៅជើងរលួយ ដែលក្រុមគ្រូពេទ្យតម្រូវអោយកាត់ជើង មួយចំហៀងក្រោមជង្គង់បន្តិច ។
លោកបន្តថា ឪពុករបស់លោកបានកើតជំងឺទាំងអស់នេះជាង១០ឆ្នាំមកហើយ ប៉ុន្តែស្ថានភាពជំងឺបានធ្វើទុក្ខខ្លាំងនៅក្នុងរយះពេលប៉ុន្មានឆ្នាំចុងក្រោយនេះប៉ុណ្ណោះ ក្នុងពេលដែលកត្តាមានជំងឺនេះហើយ ដែលធ្វើឲ្យឪពុករបស់លោកបាត់មុខពីសិល្បះអស់ពេលជាច្រើនមកហើយ ។
ក្នុងវ័យ៦៣ឆ្នាំ នាយ ព្រីងទុំ ត្រូវបានគេស្គាល់ថា លោកជាតារាកំប្លែងមួយរូបដែលធ្លាប់បង្ហាញវត្តមានសម្តែងជាញឹកញាប់ជាមួយក្រុមកំប្លែងនាយ កុយ និងនាយក្រឹម ហើយលោកធ្លាប់បានចូលសម្តែងនៅក្នុងកម្មវិធីសំណើចចុងសប្តាហ៍របស់ស្ថានីយទូរទស្សន៍បាយ័នផងដែរ ។
ក្រៅពីអាជីពកំប្លែងនោះ នាយ ព្រីងទុំ ក៏ជាតួអង្គយក្សល្ខោនមួយរូបផងដែរ ប៉ុន្តែប៉ុន្មានឆ្នាំចុងក្រោយនេះលោកក៏បានបាត់វត្តមានពីឆាកសម្តែងនានាស្ទើរទាំងស្រុង ដោយសារតែលោកបានរួមរិតជាមួយនឹងជំងឺជាច្រើនមុខ ។
ពាក់ព័ន្ធការធ្លាក់ខ្លួនឈឺនាពេលនេះដែរ កូនប្រុសរបស់នាយ ព្រីង ទុំ បានអះអាងថា កន្លងមកក៏មានសប្បុរសជននានា ជាពិសេសលោក អ៊ឹម ជីវ៉ា បាននាំយកអំណោយមកជួយឪពុកលោកជាបន្តបន្ទាប់ ជាពិសេសសមាគមសិល្បះករ ប៉ុន្តែក្រោយពីប្តូរប្រធានថ្មីឪពុកលោកមិនទាន់ទទួលបានការជួយពីសមាគមនៅឡើយទេ ៕
ចែករំលែកព័តមាននេះ