ខេត្តកំពង់ស្ពឺ ៖ ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម និងជានាយកគម្រោងស្តារនិងកែលម្អឡើងវិញប្រព័ន្ធស្រោចស្រព និងប្រព័ន្ធដោះទឹកភាគនីរតីរាជធានីភ្នំពេញ បានជំរុញឱ្យក្រុមការងារគម្រោង…
ខេត្តកំពង់ស្ពឺ ៖ ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម និងជានាយកគម្រោងស្តារនិងកែលម្អឡើងវិញប្រព័ន្ធស្រោចស្រព និងប្រព័ន្ធដោះទឹកភាគនីរតីរាជធានីភ្នំពេញ បានជំរុញឱ្យក្រុមការងារគម្រោង និងក្រុមហ៊ុនពន្លឿនសកម្មភាពការងារសាងសង់ ដើម្បីឱ្យគម្រោងស្តារ និងកែលម្អឡើងវិញប្រព័ន្ធស្រោចស្រព និងប្រព័ន្ធដោះទឹកភាគនិរតីរាជធានីភ្នំពេញ ក្នុងខេត្តកំពង់ស្ពឺ សម្រេចបានតាមផែនការ ។
ការណែនាំនេះ ក្នុងពេលដឹកនាំក្រុមការងារបច្ចេកទេសក្រសួង និងមន្ទីរធនធានទឹក និងឧតុនិយម ចុះពិនិត្យវឌ្ឍនភាពនៃការងារសាងសង់របស់គម្រោងក្នុងខេត្តកំពង់ស្ពឺ ដែលគិតត្រឹមថ្ងៃទី២២ ខែធ្នូ ឆ្នាំ២០២៤ សម្រេចបានប្រមាណ៣២% នៃទំហំការងារសរុបគម្រោង។
អនុរដ្ឋលេខាធិការក្រសួងធនធានទឹក និងឧតុនិយម ឯកឧត្តម ពេជ្រ វាសនា បានលើកឡើងថា មន្ទីរពាក់ព័ន្ធចំណុះឱ្យខេត្តកំពង់ស្ពឺ អាជ្ញាធរមូលដ្ឋានស្រុក-ឃុំ និងប្រជាកសិករ បានចូលរួម និងសម្រួលដល់ការងារស្តារ និងកែលម្អឡើងវិញប្រព័ន្ធស្រោចស្រព និងប្រព័ន្ធដោះទឹក ដោយធ្វើឱ្យការងាររបស់ក្រុមបច្ចេកទេសប្រព្រឹត្តិទៅបានរលូន ។
ទន្ទឹមនេះ ការចូលរួមរបស់អាជ្ញាធរមូលដ្ឋាន កសិករបានបង្ហាញឱ្យឃើញអំពីការយកចិត្តទុកដាក់របស់ក្រសួងក្នុងការផ្គត់ផ្គង់ទឹកតាមដងស្ទឹងព្រែកត្នោត សម្រាប់ប្រើប្រាស់តាមវិស័យនានា ក៏ដូចជាទឹកស្អាតសម្រាប់ការប្រើប្រាស់ប្រចាំថ្ងៃរបស់ប្រជាពលរដ្ឋនៅក្នុងរដូវប្រាំងផងដែរ ។
ឯកឧត្តម ពេជ្រ វាសនា ក៏បានអរគុណចំពោះអាជ្ញាធរមូលដ្ឋានស្រុក-ឃុំ និងប្រជាកសិករនៅក្នុងតំបន់គម្រោង ដែលបានទទួលយក និងបានអនុវត្តតាមសេចក្តីជូនដំណឹងរបស់ក្រសួងធនធានទឹក និងឧតុនិយមរដ្ឋបាលខេត្តកំពង់ស្ពឺ និងមន្ទីរធនធានទឹក និងឧតុនិយមខេត្តកំពង់ស្ពឺស្តីពី ការស្នើសុំផ្អាកការដាំដុះស្រូវប្រាំងនៅក្នុងតំបន់គម្រោងនៅក្នុងអំឡុងពេលនៃការជួសជុល និងសាងសង់ឡើងវិញនៃគម្រោង៕
ចែករំលែកព័តមាននេះ