ប្រទេសឡាវ ៖ ក្រុមបាល់ទាត់ជម្រើសជាតិនារីកម្ពុជា ក្រោមការដឹកនាំរបស់គ្រូបង្គោល លោក ឃួន ឡាបូរ៉ាវី ឈានដល់វគ្គផ្តាច់ព្រ័ត្រជាលើកដំបូងក្នុងប្រវត្តិសាស្រ្ត នៃពានរង្វាន់ AFF Women’s Cup 2024 ដែលប្រទេសឡាវធ្វើជាម្ចាស់ផ្ទះ ក្រោយយកឈ្នះក្រុមនារីទីម័រខាងកើត នៅក្នុងលទ្ធផល ៣-០ កាលពីរសៀលថ្ងៃទី២ ខែធ្នូ ឆ្នាំ២០២៤។ ស្របពេលដែលឥណ្ឌូណេស៊ី ក៏បានយកឈ្នះសិង្ហបុរី ដោយលទ្ធផល ៣-០ ផងដែរ។

តាមរយៈជ័យជម្នះនេះ កម្ពុជា នឹងត្រូវប៉ះ ឥណ្ឌូណេស៊ី នៅវគ្គផ្តាច់ព្រ័ត្រ នៅថ្ងៃទី៥ ខែធ្នូ នៅឯកីឡដ្ឋាន New Laos National នាទីក្រុងវៀងច័ន្ទ ហើយក្រុមទាំងពីរសុទ្ធតែធានាបានកៅអីទៅកាន់ព្រឹត្តិការណ៍ ASEAN Women’s Championship ឆ្នាំ ២០២៥ ដូចគ្នា។ ដ្បិតទីម័រខាងកើត និងសិង្ហបុរី ត្រូវតទល់គ្នាដណ្តើមចំណាត់ថ្នាក់លេខ៣ ដើម្បីទទួលបានកៅអីទៅកាន់ព្រឹត្តិការណ៍ឆ្នាំ ២០២៥។

ការប្រកួតពានរង្វាន់ AFF Women’s Cup 2024 ដែលចាប់ផ្តើមនៅថ្ងៃទី២៣ ខែវិច្ឆិកា ហើយគ្រោងបញ្ចប់នៅថ្ងៃទី៥ ខែធ្នូ មាន៦ក្រុមចូលរួម ចែកចេញជា២ពូល ដោយពូល A មាន ម្ចាស់ផ្ទះឡាវ ទីម័រខាងកើត និងសិង្ហបុរី។ ចំណែកពូល B មាន កម្ពុជា ឥណ្ឌូណេស៊ី និងម៉ាឡេស៊ី។ ក្រុមឈរនៅចំណាត់ថ្នាក់លេខ១ និងលេខ២ នៃពូលទាំងពីរ បានកៅអីឡើងទៅវគ្គពាក់កណ្តាលផ្តាច់ព្រ័ត្រ។ ដូច្នេះយើងបានឃើញថា កម្ពុជាបញ្ចប់នៅកំពូលតារាងពូល B ក្រោយស្មើជាមួយ ឥណ្ឌូណេស៊ីក្នុងលទ្ធផល ០-០ និងបន្តយកឈ្នះម៉ាឡេស៊ីក្នុងលទ្ធផល ២-០ មុនបំបាក់ទីម័រខាងកើតក្នុងលទ្ធផល ៣-០។

ក្រុមបាល់ទាត់នារីកម្ពុជា ក្រោមការដឹកនាំរបស់លោក ឃួន ឡាបូរ៉ាវី អតីតខ្សែប្រយុទ្ធឆ្នើមក្រុមជម្រើសជាតិកម្ពុជា បានបើកទំព័រប្រវត្តិសាស្ត្រថ្មី ដោយឈានដល់វគ្គផ្តាច់ព្រ័ត្រពានរង្វាន់ AFF Women’s Cup លើកដំបូង ខណៈការចូលរួម៣លើកកន្លងមក ឆ្នាំ ២០១៨ ២០១៩ និង ២០២២ មិនធ្លាប់ឆ្លងផុតវគ្គចែកពូលឡើយ។

បច្ចុប្បន្ន ពឿន គន្ធា កំពុងឈរជាកីឡាការិនីរកគ្រាប់បាល់ច្រើនជាងគេ ឬ Top Scorer បណ្តោះអាសន្ន នៃពានរង្វាន់ AFF Women’s Cup 2024 ក្រោយកីឡាការិនីពាក់អាវលេខ១៩រូបនេះ រកបាន៣គ្រាប់ តាមពីក្រោយដោយកីឡាការិនីឥណ្ឌូណេស៊ី Claudia Scheunemann ដែលរកបាន២គ្រាប់។ ក្រៅអំពី ពឿន គន្ធា កីឡាការិនីកម្ពុជាពីររូបទៀតរួមមាន ឈិត សាភឿន និង សឿន វីផា ក៏​រកបានម្នាក់មួយគ្រាប់ផងដែរ៕ (រូបភាព ៖ សហព័ន្ធកីឡាបាល់ទាត់កម្ពុជា)